ပိုၼ်းၵေႃႇတၢင်ႈ SSA ပွတ်းႁွင်ႇ

      ၶွတ်ႇၽွတ်ႈပူၵ်းတင်ႈ  SSA 

  ဝၼ်းတီႈ ( 24 ) လိူၼ်  April  , 1964 ) ပဵၼ်ဝၼ်းၶွတ်ႇၽွတ်ႈတပ်ႉသိုၵ်းၸိုင်ႈတႆး SSA (Shan State Army ) ဢၼ်ၸဝ်ႈၼၢင်းႁိူၼ်းၶမ်း မႁႃႇတေႇဝီႇ ယွင်ႁူၺ်ႈ ႁပ်ႉပဵၼ်ၽူႈဢွၼ်ႁူဝ် ၶွတ်ႇၽွတ်ႈတီႈၼႂ်း ဢိူင်ႇတႃႈတွၼ်း  ၸေႈဝဵင်း မႄႈဢၢႆး  ၸေႈတွၼ်ႈၵဵင်းမႆႇ ၸိုင်ႈထႆး ။

 ဝၼ်းမိူဝ်ႈၼႆႉ ပဵၼ်ဝၼ်းယႂ်ႇလူင်ၵိုၵ်းပိုၼ်း လုၵ်ႉၽိုၼ်ႉမႃးႁၢၼ်ႉတေႃႇယၢမ်းၼႆႉ ၶွပ်ႈၶူပ်ႇယဝ်ႉ  ( 74 ) ပီ ။ 

       ငဝ်းလၢႆးမိူဝ်ႈပီ ( 1964 ) ၼၼ်ႉ၊ ၼင်ႇမုၵ်ႉၸုမ်းယိပ်းၵွင်ႈၵၢင်ႇ၊  လုၵ်ႉၽိုၼ်ႉလၢႆၸုမ်း ဢွၵ်ႇႁႃၵပ်းသၢၼ်ၵၼ် တပ်ႉဢဵၼ်ႁႅင်းလူင် ( 3 ) တပ်ႉ၊ 

1. တပ်ႉလွတ်ႈလႅဝ်းသဝ်းၶေႃၸိုင်ႈတႆး  (SSAI )
2. တပ်ႉၽွမ်ႉႁူမ်ႈၸိူဝ်ႉၸၢတ်ႈၸိုင်ႈတႆး (SNUF )
3. တပ်ႉၸဝ်ႈၾႃႉၵူဝ်းၵၢင်ႉ

သၢမ်တပ်ႉၼႆႉပဵၼ်ႁႅင်းလုၵ်ႉၽိုၼ်ႉယိပ်းၵွင်ႈ ၵၢင်ႇၸိုင်ႈတႆး ၊ ၵႃႈၼင်ႇယိုၼ်းထိုင် ပွင်ပဵၼ်လႆႈၸိူဝ်းၼၼ်ႉ ႁူမ်ႈၵၼ်ၽွတ်ႈႁႅင်း ပူၵ်းတင်ႈပဵၼ်မႃး ( SSA ) 

 ဝၼ်းၶွတ်ႉၽွတ်ႈႁႅၼ်းပူၵ်းတင်ႈ  တပ်ႉသိုၵ်းၸိုင်ႈတႆး ( SSA )  ( 24 , 4 , 1964 )၊ မႅၼ်ႈၺႃးဝၼ်းၸဝ်ႈ ၾႃႉၸိုင်ႈတႆး ပွႆႇပိုၼ်ႉဢႃႇ ၼႃႇ ၊ ၵွပ်ႈၼႆ ( 1959  , April ,  24 ) ၼၼ်ႉ ၊ ႁဵတ်းပၢင်ၵႅဝ်ႈတႄႇတင်ႈ ၵၢၼ်ၽွင်းငမ်း ၵူၼ်းမိူင်းၸိုင်ႈတႆးသေ ၸဝ်ႈၾႃႉ ( 29 )ၵေႃႉ ၊ လူင်းလၢႆးမိုဝ်း ယိုၼ်ႈမွပ်ႈဢႃႇၼႃႇထိုင် လူင်ပွင်ႈၸိုင်ႈတႆး၊  မိူဝ်ႈၼၼ်ႉ လူင်ပွင်ႈၸိုင်ႈတႆးပဵၼ် ၸဝ်ႈၾႃႉသႅၼ်ဝီ ၸဝ်ႈႁူမ်ႇၾႃႉ ၊ ဢမ်ႇၸႂ်ႈဝႃႈၸဝ်ႈၾႃႉၶဝ်ဝၢင်းဢႃႇပၼ်မၢၼ်ႈ။

 ၵမ်ႈၽွင်ႈၽူႈၸိူဝ်းဢမ်ႇႁူႉတေႉ သမ်ႉၼႄးဝႃႈ ၸဝ်ႈၾႃႉၶၢႆၵိၼ် ၵၢၼ်မိူင်းၼႆၵေႃႈယၢမ်ႈငိၼ်းမႅၼ်ႈယူႇ ။ မိူဝ်ႈၽွင်းၼၼ်ႉ မိူင်းၸိုင်ႈတႆးပႆႇမီးသိုၵ်းႁူမ်ႇလူမ်ႈ ၵႅတ်ႇၶႄဝၢၼ်ႈမိူင်း  ၸဝ်ႈၾႃႉတင်းလၢႆၵေႃႈ တေႃႈဢမ်ႇသင်သိုၵ်းပႂ်ႉၼႃႈႁေႃယင်းဢမ်ႇမီး ၊ ၽိူဝ်ႇႁူႉတူဝ်ဝႃႈဢမ်ႇမီးသိုၵ်းဢဝ်ႁူမ်ႇလူမ်ႈ  ၽိူဝ်ႇႁႃၶိုင်ပွင် ၶွင်တႆးပေႃးတူၵ်းလိုၼ်းပႅတ်ႈယဝ်ႉ ။

          ပိူဝ်ႈၼႆလႄႈ ပီ (1964  , April , 24 ) ဝၼ်း၊ တေထိုင်ၼႆႉ ၶွပ်ႈၶူပ်ႇ ( 62 ) ပီ ၊ၸုမ်းယိပ်းၵွင်ႈၵၢင်ႇၸိုင်ႈတႆး ၸင်ႇႁဵတ်းပၢင်ၵုမ် တႃႈတွၼ်း ၸိုင်ႈထႆး ပူၵ်းတင်ႈ ( SSA ) တႃႇတေဢွ ၼ်ႁူဝ် တပ်ႉသိုၵ်းၵွင်ႇၸီႇၸိုင်ႈတႆး 

( Shan State War Council ) ၼင်ႇ

1. ၸဝ်ႈၼၢင်းႁိူၼ်းၶမ်း ပဵၼ်ၽူႈၼင်ႈၸိုင်ႈ
2. ၸဝ်ႈၶုၼ်တေႃႇတႃႇ ၽူႈပွင်ၵၢၼ်ၵပ်းသိုပ်ႇ ငဝ်ႈငုၼ်း
3. ၸဝ်ႈၵွၼ်းၸိူင်း ၽူပွင်ၵၢၼ်သိုၵ်း
4. ၸဝ်ႈလႅတ်ႇ ယၢင်ႇၵျီးသိင်ႇ ၽူႈပွင်ၵၢၼ်ၼွၵ်ႈမိူင်း
5. ၸဝ်ႈသိူဝ်ၶၢၼ်ႇ/ဢုင်းပွင်ႇ ၵေႃၵမ်ၵၢၼ်ပွင်သိုၵ်း
6. ၸဝ်ႈပိုၼ်းတႆး ၵေႃၵမ်ၵၢၼ်ပွင်ၵၢၼ်သိုၵ်း
7. ၸဝ်ႈသိူဝ်ထႅၼ်ႈ ၽူႈၵွၼ်းတိူင်း တိူင်းပွတ်းဢွၵ်ႇ
8. ၸဝ်ႈသႅင်သိုၵ်း/ၵျႃႇၼု ၽူႈၵွၼ်း တိူင်းပွတ်းၸၢၼ်း
9. ၸဝ်ႈပူဝ်ႇၵႃးမိူင်း တိူင်းပွတ်းၵၢင်
10. ၸဝ်ႈသိူဝ်လဵၼ်း တိူင်းပွတ်းႁွင်ႇ။ 

         မိူဝ်ႈတေႇၽွတ်ႈႁႅၼ်းပူၵ်းတင်ႈ တပ်ႉသိုၵ်း ( SSA ) ၼႆႉ၊ ဢဵၼ်ႁႅင်း လုၵ်ႉၽိုၼ်ႉ ယိပ်းၵွင်ႈၵၢင်ႇၸွတ်ႇတူဝ်ႈၼႂ်းၼႂ်းၸိုင်ႈတႆးၼၼ်ႉ ၊ ၵိုင်ႉၵၢင်ႉသူၼ်းတုမ်မႃးၶွၼ်ႈတုမ်လႆႈ ၵမ်ႈၼမ်လႄႈႁႅင်းသိုၵ်း ေတမီးမွၵ်ႈမိုၼ်ႇပၢႆ ။ 

ၵူၺ်းၵႃႈဝႃႈ တပ်ႉသိုၵ်း ( SSA ) သမ်ႉဢမ်ႇပႆႇမီးမူႇပိူင် ဢမ်ႇမီးသဵၼ်ႈတၢင်းၵၢၼ်ပၢႆးမိူင်း ဢၼ်တႅတ်ႈလီ ဢမ်ႇမီးပၢႆးသိုၵ်း ငဝ်ႈငုၼ်းဢၼ်ႁုပ်ႈၵုမ်းၵမ်လႆႈၼၼ်ႉ ထိုင်တီႈမီးမႃး လွင်ႈၵၢင်ၸႂ်ၸပ်းပႅၼ်း တပ်ႉၵဝ်တပ်ႉမႂ်းယူႇ

 #ဝူၼ်ႉတူၺ်းၵႆႇၼိုင်ႈတူဝ်ၶၼ်ၼိုင်ႈၵွၼ်းယဝ်ႉ ၊ ထုၵ်ႇလူင်ပွင်ၸိုင်ႈမၢၼ်ႈ ဢဝ်ႁၢဝ်ႈႁႅင်းသေဢဵၼ်ႁႅင်းတပ်းသိုၵ်း ၵေႃႈလႆႈယူမ်ႈယွမ်းလူင်းၵႂႃႇ ။

     ၶေႃႈလူပ်းလင် ၼႂ်းလိၵ်ႈၵိၼ်ၵႅၼ်ႇ ၸဝ်ႈၼၢင်းႁိူၼ်းၶမ်းလၢတ်ႈဝႃႈ

 " ၶႃႈႁဝ်းၸဝ်ႈၼၢင်းႁိူၼ်းၶမ်း တုင်းႁပ်ႉထွမ်ႇၶေႃႈတႅပ်းတတ်း တၵ်းတေဢွၼ်ႁူဝ်ထူဝ်းၼႃး မုၵ်ႉၸုမ်းၵႃႈပဵၼ်လၢႆးလုၵ်ႉၽိုၼ်ႉ မိူင်းတႆးႁဝ်းတင်းသဵင်ႈ ဢၼ်မႃးထူပ်းႁူပ်ႉၺႃး ဢုပ်ႇၵုမ်ၵၼ်တီႈၼႆႉ တေႇမိူဝ်ႈၼႆႉ ႁႂ်ႈပေႃးၶိုၼ်ႈယႂ်ႇမႂ်ႇသုင် ထိုင်တီႈယွတ်ႈႁွတ်ႈတီႈပၢႆၼၼ်ႉ ပေႃးဝႃႈၵူႈၸဝ်ႈတၵ်းပွင်ပဵၼ်လႆႈ " 

• ၼပ်ႉပဵၼ်ၼိုင်ႈလဵဝ်ၵၼ်
• ႁပ်ႉႁွင်းဢဝ်ၵဝ်ၶႃႈ ပဵၼ်ၽူႈၼမ်းၼႃႈသေ ၸင်ႇလူင်းလၢႆးမိုဝ်းယူႇယဝ်ႉ ။

(  ၼင်ႇၽူႈႁပ်ႉႁွင်းသမ်ႉမီးၽႂ်ၼႆ  ) 

1. ၸဝ်ႈၶုၼ်လိုင်း
2. ၸဝ်ႈၶုၼ်ဝိၸိတ်ႇ
3. ၸၢႆးသႅင်ႁၢၼ်
4. ၸဝ်ႈၼၢင်းသီႇတႃႇ
5. ၸဝ်ႈၽိၵ်ႉၶု ၼႃႇၵိင်ႇ 

ဢိင်ၶေႃႈမုလ်း ပပ်ႉပိုၼ်းတပ်ႉသိုၵ်းၸိုင်ႈတႆး SSA  ႁႃႈသိပ်းပီ ၊ မၢႆတွင်း တပ်ႉသိုၵ်းၸိုင်ႈတႆးၽွတ်ႈတင်ႈတဵမ်ပီၵွၼ်းၶမ်း  ။