ပိုၼ်းပဵၼ်မႃးလွင်ႈၵွင်းမူးၶၢဝ် တီႈႁိမ်းၼမ်ႉပိင်းဝဵင်းၵဵင်းမႆႇ မိူင်းထႆး

 ၵွင်းမူးၶၢဝ် ဢၼ်ဢမ်ႇလႆႈမီးၸွမ်းဝတ်ႉၵျွင်း ၸိုင်သမ်ႉမီးဝႆႉၼႂ်းၵၢင်ၵိဝ်ႇတၢင်း ၊ တီႈတေႉမၼ်းၵွင်းမူးဢၼ်ဝႃႈၼၼ်ႉတေမီးဝႆႉၸွမ်းဝတ်ႉၵျွင်းၵူၺ်းၼႆ ၵူၼ်ၸၢင်းၼမ်ၶဝ်တေဝူၼ်ႉၸိူင်ႉၼင်ႇၼႆ။

ၵွင်းမူးၶၢဝ်သူႇၼႆႉ မီးယူႇဝႆႉတီႈၼိူဝ်သဵၼ်ႈတၢင်းႁိမ်းမႄႈၼမ်ႉပိင်း မီးဝႆႉၽၢႆႇၼႃႈ ႁွင်ႈၵၢၼ်ၽၢႆႇလိူမ်ႈလႆႈမူတ်းသႂ်ၶွင်မိူင်းၵဵင်းမႂ်ႇ မီးႁိမ်းလုမ်းၵူင်းသုၼ် (လုမ်းၽွင်းတၢင်ဢမေႇရိၵၼ်ႇ) ၸမ်ႁိမ်းၵၢတ်ႇမိူင်းမႆႇယၢမ်းလဵဝ်။

မီးယူႇဝႆႉၼိူဝ်သဵၼ်ႈတၢင်းလူင်ဢၼ်လဵပ်ႈၸွမ်းမႄႈၼမ်ႉပိင်း တင်ႈမီးဝႆႉတီႈႁူဝ်ၵိဝ်ႇတၢင်းၶဝ်ႈၼႂ်းမိူင်းၵဵင်းမႂ်ႇၼႆယဝ်ႉ ၵွင်းမူးၶၢဝ်သူႇၼႆႉၵမ်ႈၽွင်ႈၵေႃႈႁွင်ႉဝႃႈၵွင်းမူးၵိဝ်ႇၼႆၵေႃႈမီးယဝ်ႉ။

ပိုၼ်းပဵၼ်မႃးလွင်ႈၵွင်းမူးၶၢဝ်  ဢမ်ႇၼၼ်ၵွင်းမူးၵိဝ်ႇ

မိူဝ်ႈၵွၼ်ႇၵွၼ်ႇၼၼ်ႉမိူင်းၵဵင်းမႂ်ႇလႆႈထုၵ်ႇသိုၵ်းမၢၼ်ႈၶဝ်ဢဝ်ႁႅင်းသိုၵ်းတၢင်းၼမ်တၢင်းလၢႆသေလွမ်ႉႁွပ်ႈဝႆႉမိူင်းၵဵင်းမႆႇဝႆႉၵူႈၽၢႆၵူႈတၢင်းသေၶဵင်ႇတႃႉၽၢႆႇၸဝ်ႈမိူင်းၵဵင်းမႆႇဝႃႈ တၢင်းသွင်ၽၢႆႇႁႂ်ႈမႃးလမ်ၼမ်ႉၶေႉၶဵင်ႇၵၼ် ၽၢႆႇၶႂ်လမ်ၼမ်ႉလႆႈႁိုင်ၵေႃႈၽၢႆႇၼၼ်ႉပဵၼ်ၽၢႆႉပေႉ သင်ဝႃႈၽၢႆႇၶုၼ်မိူင်းၵဵင်းမႆႇပဵၼ်ၽၢႆႇပေႉၸိုင် ၽၢႆႇၶုၼ်သိုၵ်ႈမၢၼ်ႈၶဝ်တေထွၼ်သိုၵ်းမိူဝ်းၶိုၼ်းၵမ်းလဵဝ် ၊ သင်ဝႃႈၽၢႆႇၶုၼ်သိုၵ်းမၢၼ်ႈၶဝ်ပဵၼ်ၽၢႆႇပေႉၼႆ မိူင်းၵဵင်းမႆႇတေလႆႈပဵၼ်မိူင်းၶိုၼ်ႈၶွင်မိူင်းမၢၼ်ႈဝႃႈၼႆသေ ပၼ်ၶၢဝ်းယၢမ်းႁႂ်ႈၶုၼ်ၽၢႆႇဢုပ်ႉပိူင်ႇမိူင်းၵဵင်းမႆႇ ၶဝ်ႁႃၵူၼ်းဢၼ်လမ်ၼမ်ႉလႆႈႁိုင်ႁိုင်ၼၼ်ႉမႃးၶေႉၶဵင်ႇ ႁႂ်ႈလႃႈၽၢႆႇၼႂ်းၶၢဝ်းတၢင်းႁိုင်သၢမ်ဝၼ်းၼႆယဝ်ႉ။

ၽၢႆႇၶုၼ်းမိူင်းၵဵင်းမႆႇၶဝ်ၵေႃႈၼဵတ်ႈပိုၼ်ၽၢဝ်ႇႁႃၵူၼ်းဢၼ်မီးတၢင်းၵတ်ႉၶႅၼ်ႇၽၢႆႇလမ်ၼမ်ႉၵူႈၵိဝ်ႇၵူႈတၢင်းပေႃးၸွတ်ႇတူဝ်ႈတၢင်းဝဵင်း လႆႈမႃးၶၢဝ်းတၢင်းသွင်ဝၼ်းယဝ်ႉၵေႃႈဢမ်ႇမီးၽႂ် သေမဝ်ႇၵႃးၵူၼ်းၼႂ်းမိူင်းၵဵင်းမႂ်ႇၶဝ်ၵူဝ်လႆႈတၢႆၼႂ်းမိုဝ်းသိုၵ်းၵူၼ်းတၢင်ႇၸၢတ်ႈလႄႈတၢင်းၼမ်ၵေႃႈဢွၼ်ၵၼ်သွင်ႉပၢႆႈၵႂႃႇယူႇတၢင်ႇဝဵင်း

ၶၢဝ်းယၢမ်းႁိုင်ပူၼ်ႉၵႂႃႇသွင်ဝၼ်းယဝ်ႉယဝ်ႉၵေႃႈပႆႇမီးၽႂ်တေမႃးလမ်ၼမ်ႉၶေႉၶဵင်ႇၶုၼ်သိုၵ်းမၢၼ်ႈလႆႈ လႄႈ ၶၢဝ်းယၢမ်းလိူဝ်ယူႇဝၼ်းလဵဝ် ၽၢႆၶုၼ်မိူင်းၵဵင်းမႆႇၶဝ်ၵေႃႈသိုပ်ႇပိုၼ်ၽၢဝ်ႇၵႂႃႇၸွမ်းဝၢၼ်ႈၼွၵ်ႈ ႁွင်ႉလၢတ်ႈလူင်ၵႂႃႇၵမ်းၵေႃႉၵေႃႉ ၵမ်းႁိူၼ်းႁိူၼ်း ၵူၼ်းသိုၵ်းဢၼ်ၵႂႃႇႁွင်ႉပၢဝ်ႇ ၸိူဝ်းၼၼ်ႉႁွင်ႉလၢတ်ႈလူင်ၵႂႃ ႇ ၵူႈႁိူၼ်းၼႆယဝ်ႉ။

ၸွမ်းဝၢၼ်ႈၼွၵ်ႈၼၼ်ႉ မီးၵူၼ်းၵေႃႉၼိုင်ႈ ၸိုဝ်ႈႁွင်ႉဝႃႈ ပူႇပဵင်း ပဵၼ်ၵူၼ်းဢမ်ႇႁူႉၸၵ်းႁဵတ်းၵၢၼ်ႁဵတ်းငၢၼ်း တၢင်းဝၼ်း တၢင်းဝၼ်းၵေႃႈႁႃၵိၼ်လဝ်ႈ ဢမ်ႇၶဝ်ႈပိူင်ပိူၼ်ႈ တၢင်းဝၼ်းတၢင်းဝၼ်းၵေႃႈမဝ်းလဝ်ႈသေယူႇၵႂႃႇဝၼ်းလႂ်ဝၼ်းၼၼ်ႉသေပဵၼ်ၵူၼ်းပႅတ်ႈလၢႆၵေႃႉၼိုင်ႈၼႆယဝ်ႉ ၊ ပူႇပဵင်းၼႆႉဢမ်ႇမီးလုၵ်ႈ ယူႇ ၵူၺ်းၵေႃႉလဵဝ်ၼႆယဝ်ႉ။

ဝၼ်းၼၼ်ႉၵူၼ်းသိုၵ်းၽၢႆႇၶုၼ်းမိူင်းၵဵင်းမႆႇၶဝ်လႆႈႁွင်ႉလၢတ်ႈထိုင်ၵႂႃႇတီႈႁိူၼ်းပူႇပဵင်း ယူႇသေတႃႉ ၵွပ်ႈႁၼ်ဝႃႈပူႇပဵင်းပဵၼ်ၶီႈလဝ်ႈၼႆသေပူၼ်ႉၵႂႃႇယူႇ ၊ ၽွင်းၼၼ်ႉ ၵွပ်ႈၵူဝ်ၽၢႆႇသိုၵ်းမၢၼ်ႈၶဝ်ၶႃႈႁႅမ်တၢႆလႄႈၵူၼ်းတၢင်းၼမ်ဢွၼ်ၵၼ်ပၢႆႈလႄႈ ၵမ်းၼၼ်ႉၵိုတ်းဝႆႉပူႇပဵင်းၵေႃႉလဵဝ် မၼ်းၸင်ႇၼင်ႈသေဝူၼ်ႉ ၼွၼ်းသေဝူၼ်ႉ တၢင်းၶိုၼ်း သေတႅပ်းတတ်းၸႂ်မၼ်းသေတေပဵၼ်ၵူၼ်းၵႂႃႇလမ်ၼမ်ႉၶေႉၶဵင်ႇၶုၼ်မၢၼ်ႈၶဝ်ၼႆသေထိုင်ၵၢင်ၼႆမိူင်းလႅင်းမႃးမၼ်းၸင်ႇၵႂႃႇၸူးတီႈၶုၼ်မိူင်းၵဵင်းမႆၶဝ်ယူႇ

ဢွင်ႈတီႈဢၼ်ၶဝ်ၶေႉၶဵင်ႇလမ်ၼမ်ႉၵၼ်ၼၼ်ႉၵေႃႈပဵၼ်မႄႈၼမ်ႉပိင်းတီႈႁိမ်းၵွင်းမူးၶၢဝ်ယၢမ်းလဵဝ်ၼႆႉယဝ်ႉ ။

ယၢမ်းၼၼ်ႉတၢင်းသွင်ၽၢႆလႆႈလူင်းတွၵ်ႇလၵ်းဝႆႉပၼ်တႂ်ႈပိုၼ်ႉၼမ်ႉႁႂ်ႈၵူၼ်းလမ်ၼမ်ႉၼၼ်ႉမီးတီႈယိပ်းၵမ် သေပေႃးယဝ်ႉၵေႃႈ ႁႂ်ႈၵူၼ်းတၢင်းသွင်ၽၢႆႇလူင်းၼမ်ႉသေလမ်ၼမ်ႉၽွမ်ႉၵၼ်ယဝ်ႉ။

ၶၢဝ်းယၢမ်းဢၼ်တေလႆႈလမ်ၼမ်ႉၼၼ်ႉ ၶဝ်ဢဝ်ၵွၵ်းတွင်းၸီးၵူၼ်ႈမၼ်းပွင်ႇတၢၼ်ႇႁူၶဵမ်သေ ဢဝ်ၵွၵ်းတွင်းၼၼ်ႉဝၢင်းသႂ်ႇၼိူဝ်ၼမ်ႉ ႁႂ်ၼမ်ႉၸိုမ်းၶဝ်ႈၼႂ်းၵွၵ်းတွင်းၼၼ်ႉတဵမ် ပေႃးၼမ်ႉတဵမ်ယဝ်ႉ ၵွၵ်းတွင်းၼၼ်ႉ ၵေႃႈတေၸူမ် ၶၢဝ်းယၢမ်းလမ်ၼမ်ႉၼၼ်ႉသမ်ႉ ႁႂ်ၵွၵ်းတွင်းၼၼ်ႉၸူမ်ၼမ်ႉတႃသၢမ်ဢၼ်ၼႆယဝ်ႉ

ၽွင်းမိူဝ်ႈၵွၵ်းတွင်းၼၼ်ႉလႆႈၸူမ်ၵႂႃႇသၢမ်ဢၼ်ယဝ်ႉၼၼ်ႉ ၵူၼ်းလမ်ၼမ်ႉၽၢႆႇၶုၼ်မၢၼ်ႈၶဝ်လႆႈၶိုၼ်ႈမႃးၼိူဝ်ၼမ်ႉဢွၼ်တၢင်းလႄႈလႆႈဝႃႈၶုၼ်မၢၼ်ၶဝ်ပဵၼ်ၽၢႆႇသုမ်းၼႆယဝ်ႉ ၊ ၽၢႆၶုၼ်မၢၼ်ႈၶဝ်ၼၼ်ႉပေႃးႁူႉဝႃႈၶဝ်ပဵၼ်ၽၢႆသုမ်းၼႆၵေႃႈဢဝ်သိုၵ်းၶဝ်ထွႆမိူဝ်းဝၼ်းၼၼ်ႉၵမ်းလဵဝ်ယဝ်ႉ။

ၽၢႆႇၶုၼ်မိူင်းၵဵင်းမႂ်ႇၶဝ်ၼၼ်ႉပႂ်ႉယူႇတၢင်းဝၼ်းၵေႃႇပႆႇႁၼ်ပူႇပဵင်း ၶိုၼ်းမႃးၼိူဝ်းၼမ်ႉလႄႈ ၸင်ႇသင်ႇႁႂ်ႈ ၵူၼ်းၶဝ်လူင်းႁႃပူႇပဵင်းတႂ်ႈၼမ်ႉၼၼ်ႉ လႆႈႁၼ်ပူႇပဵင်းဢဝ်ၽႃႈႁတ်ႉဢႅင်ႈမၼ်းၼၼ်ႉမတ်ႉတူဝ်မၼ်းၸပ်းဝႆႉတီႈလၵ်းတႂ်ႈၼမ်ႉၼၼ်ႉဝႆႉသေတၢႆ လႄႈၸင်ဢဝ်ၶၢပ်ႈတူဝ်တၢႆပူႇပဵင်းၼၼ်ႉၶိုၼ်ႈမႃးသေလုမ်းလႃးႁဵတ်းၵွင်းမူးဝႆႉပၼ်တီႈၽင်ႇမႄႈၼမ်ႉပိင်းတီႈမၼ်းတၢႆၼၼ်ႉယူႇယဝ်ႉ။

ပူႇပဵင်းၼႆႉ တၢင်းၽၢႆႇထႆးၶဝ်တႄႉႁွင်ႉဝႃႈ ၽူႈႁတ်းႁၢၼ် ၼွၵ်ႈပိုၼ်းၼႆယဝ်ႉ ၊ ၵွပ်ႈပိူဝ်ႈပဵၼ်ၵူၼ်းဝၢၼ်ႈထမ်ႇမၼႃႇဢွၼ်ႇၵူၺ်းလႄႈ သမ်ႉပဵၼ်ၵူၼ်း ဢမ်ႉႁဵတ်းၵၢၼ်ႁဵတ်းငၢၼ်းသင် ပဵၼ်ၵူၼ်းမၵ်ႉလဝ်ႈ သေယူႇၵႂႃဝၼ်းလႂ်ဝၼ်းၼၼ်ႉၵူၺ်းၼႆသေတႃႉ မၼ်းၵေႃႈႁၵ်ႉၼိူဝ်ႉလိူတ်ႈၸိူဝ်ႉၶိူဝ်းမၼ်းဢမ်ႇယွမ်းၽႂ်ၼႆယဝ်ႉ။

တီႈႁိမ်းၵွင်းမူးၶၢဝ်ၼႆႉ ပေႃးႁူဝ်ၶမ်ႈႁူဝ်ၼႆမႃးၼႆ ပဵၼ်တီႈၵူၼ်းၵႃႉၶၢႆၽၵ်းၶဵဝ် မၢၵ်ႇမႆႇမၢၵ်ႇတွၵ်ႇၶဝ် မႃးၶၢႆပေႃးတဵမ်ၵႂႃႇသဵင်ႈ ပဵၼ်တီႈၵူၼ်းၵိုၼ်းငိုၼ်းၶွၼ်ႈတီႈၼိုင်ႈၼႆယဝ်ႉ။

သင်ဝႃႈၵူၼ်းၵေႃႉလႂ်မီးတၢင်းယၢပ်ႇၽိုတ်ႇၼႆ ဢဝ်တၢင်းၵိၼ်ဢၼ်ပူႇပဵင်းမၵ်ႉၼၼ်ႉလႄႈ တူင်ႇမွၵ်ႇၵႂႃႇလူႇဝႆႈသေယွၼ်းသူးၼႆၸိုင်ဢမ်ႇႁိုင်သင်လွင်ႈယၢပ်ႇၽိုတ်ႇၼၼ်ႉတေမူတ်းႁၢႆၵႂႃႇၼႆယဝ်ႉ။

ပေႃႈၵႃႉ မႄႈၵႃႉၶဝ်ၵေႃႈပေႃးဝႃႈၶၢႆဢမ်ႇလီမႃးၸိုင်ဝၢႆႇၼႃႈၸူးၵွင်းမူးသေ တိၵ်ႉထၢၼ်ႇယွၼ်းသူးႁႂ်ႈၸွႆႈၼႆၸိုင် တေၶၢႆလီၵမ်းလဵဝ်ၼႆယဝ်ႉ။

တူၺ်းပိုၼ်း ၵွင်းမူးၶၢဝ်