ၾိင်ႈပွႆးၵိၼ် ပွႆးလူႇ ၸွမ်းဝၢၼ်ႈၼွၵ်ႈမိူင်းတႆးႁဝ်း
ၸွမ်းဝၢၼ်ႈၼွၵ်ႈဝၢၼ်ႈၼႃး မိူင်းတႆးႁဝ်းၼႆႉ ပေႃးပဵၼ်ဝၢၼ်ႈယႂ်ႇ ၼႆ တေမီးဝတ်ႉၵျွင်းႁင်းၵူၺ်းၶဝ်ၼိုင်ႈလင်ဝႆႉယဝ်ႉ ၊ သင်ဝႃႈဝၢၼ်ႈၵူၼ်းဢမ်ႇပေႃးႁၢင်ႇၵႆၵၼ်ၼႆၵေႃႈတေမီးလၢႆလၢႆဝၢၼ်ႈသေႁူမ်ႈၶိုၼ်ႈႉၵျွင်းလင်လဵဝ်ၵၼ်ၼႆယဝ်ႉ။
ၵျွင်းၼိုင်ႈလင်ၼၼ်ႉ ၵူၼ်းဝၢၼ်ႈၸိူဝ်းမီးၼႃး ၶဝ်တေလႆႈသႂ်ႇပၼ်ၶဝ်ႈႁူဝ်ၵျွင်း ၼိုင်ႈၸူဝ်ႈၶူပ်ႇပီႊၼိုင်ႈပွၵ်ႈၸွမ်းၼင်ႇဢၼ်လႆႈမၵ်းၶၢၼ်းၵၼ်ဝႆႉၼၼ်ႉယဝ်ႉ ၊ ၵူၼ်းၸိူဝ်းဢမ်ႇမီးၼႃးၶဝ်သမ်ႉတေလႆႈသႂ်ႇပၼ်ၽိုၼ်းၵျွင်းၸွမ်းၼင်ႇလႆႈမၵ်းၶၢၼ်းၵၼ်ဝႆႉမိူၼၵၼ်ယူႇ ၊
လွင်ႈၶဝ်ႈႁူဝ်ၵျွင်း ဢၼ်ၵူၼ်းဝၢၼ်ႈၶဝ်လႆႈသႂ်ႇပၼ်ၼၼ်ႉ ၵွပ်ႈပိူဝ်ႈတႃႇဢဝ်ဝႆႉလဵင်ႉလူ မိူဝ်ႈမီးပွႆးၵိၼ်ပွႆးလူႇၼႆယဝ်ႉ ၽိုၼ်းၵျွင်းဢၼ်ၵူၼ်းဝၢၼ်ႈၶဝ်လႆႈသႂ်ႇပၼ်ၼၼ်ႉၵေႃႈဢဝ်ဝႆႉတႃႇမိုဝ်ႉႁုင်ၶဝ်ၽၵ်းမိူဝ်ႈမီးပွႆးၵိၼ်ပွႆးလူႇ ပွႆးမူၼ်ႈၸိူဝ်းၼႆႉယဝ်ႉ
ပေႃးဝႃႈတီႈဝတ်ႉၵျွင်းၼၼ်ႉတေမီးပွႆးၼႆၸိုင် ၵူၼ်းဝၢၼ်ႈၶဝ်တေႁဵတ်းပၢင်ၵုမ်ၵၼ်သေမႅင်ႇပုၼ်ႈၽွၼ်းၵၼ် မိူၼ်ၼင်ႇ
- ၽၢႆႇမိုဝ်ႉႁုင်ၶဝ်ႈၽၵ်း
- ၽၢႆႇဝေႇယႃႇဝိၸ်ႉၸ ၊ ၵၢပ်ႈသွမ်းၸဝ်ႈသင်ႇၶႃႇရႁၢၼ်း လႄႈ ၸဝ်ႈသၢင်ႇၶဝ်
- ၽၢႆႇလဵင်ႉလူ ၽူႈမႃးၶိုၼ်ႈၵျွင်း
- ၽၢႆႇၽဵဝ်ႈလၢင်ႉ ၵဵပ်းသိမ်း
သင်ၸိူဝ်ႉဝႃႈၼႂ်းဢုၵ်ႉၸူႉၶိုၼ်ႈၵျွင်းၼၼ်ႉမီးလၢႆလၢႆဝၢၼ်ႈယူႇၼႆ ၶဝ်တေမႅင်ႇပုၼ်ႈၽွၼ်းၵၼ်ၼိုင်ႈဝၢၼ်ႈၼိုင်ႈမဵဝ်း သင်ဝႃႈမီးဝၢၼ်ႈလဵဝ်ၵူၺ်းၼႆၸိုင် တေလႆႈမႅင်ႇၵၼ်ဢဝ်ပုၼ်ႈၽွၼ်းၼႆယူႇယဝ်ႉ
ၵူၺ်းၵႃႈၼႂ်းၼိုင်ႈဝၢၼ်ႈ ၶဝ်တေမီးၸုမ်းဝႆႉယူႇမိူၼ်ၼင်ႇ
- ၸုမ်းၵေႃႇမတီႇဝၢၼ်ႈ ဢၼ်ဢွၼ်ၵိၼ်ဢွၼ်လူႇ
- ၸုမ်းဝေႇယႃႇဝိၸ်ႉၸ
- ၸုမ်းပေႃႈႁိူၼ်းၼုမ်ႇ မႄႈႁိူၼ်းၼုမ်ႇ
- ၸုမ်းမၢဝ်ႇ ၵေႃႈတေမီးႁူဝ်မၢဝ်ႇ ပဵၼ်ၵူၼ်းၵုမ်းထိင်းလုၵ်ႈဢွၼ်ႇၸၢႆးမၢဝ်ႇ
- ၸုမ်းသၢဝ် ၵေႃႈတေမီး ႁူဝ်သၢဝ် ပဵၼ်ၵူၼ်းၵုမ်းထိင်းဢွၼ်ႇယိင်းသၢဝ်
ပေႃးထိုင်မႃးဝၼ်းပွႆးၼႆၸိူဝ်းတူၵ်းပုၼ်ႈၽွၼ်းၽၢႆႇမိုဝ်ႉၽၢႆႇႁုင်ၶဝ်တေဢွၼ်ၵၼ်မိုဝ်ႉႁုင်ဝႆႉ သေ ၽၢႆႇလဵင်ႉလူၶဝ်ဢဝ်ပုၼ်ႈၽွၼ်းလဵင်ႉလူၵႂႃႇယူႇယဝ်ႉ ၊ ၽွင်းမိူဝ်ႈတေလဵင်ႉလူၼၼ််ႉၸိူဝ်းပဵၼ်မၢဝ်ႇၶဝ်တေပဵၼ်ၵူၼ်းယုၵ်ႉၽိူၼ်ၶဝ်ႈ သေ သၢဝ်ၶဝ်သမ်ႉတေယိပ်းၵွၵ်းၼမ်ႉၸွမ်းလင်သေ ၽိူၼ်ၶဝ်ႈၼၼ်ႉတမ်းတီႈလႂ်ၵေႃႈတေလႆႈတမ်းပႃးၵွၵ်းၼမ်ႉၼႆယဝ်ႉ။
ၽွင်းယၢမ်ႈၼၼ်ႉသင်ဝႃၶဝ်ႈၽၵ်းၼၼ်ႉယွမ်းမူတ်းၵႂႃႇၸိုင် ၽၢႆႇထႅင်ႈၶဝ်ႈထႅင်ႈၽၵ်းၶဝ်ထႅင်ႈၸုမ်းၼိုင်ႈဢဝ်ပုၼ်ႈၽွၼ်းဝႆႉယဝ်ႉ ၊ ပေႃးဝႃႈပီႈၼွင်ႉၶဝ်ၵိၼ်ဢိမ်ႇယဝ်ႉၼႆ ၽၢႆႇလဵင်ႉလူၶဝ်တေၶိုၼ်းယုၵ်ႉဢဝ်ၽိူၼ်ၶဝ်ႈၼၼ်ႉ ၵႂႃႇဢၢပ်ႈပၼ်ၽၢႆႇၽဵဝ်ႈလၢင်ႉသိမ်းၶဝ်ဢဝ်ပုၼ်ႈၽွၼ်ၵဵပ်းလၢင်ႉသိမ်းၵႂႃႇယဝ်ႉ။
 |
| ၶႅပ်းႁၢင်ႈသၢဝ်ႁၢင်ႈလီ ထုင်ႉပုင်ႇဝူဝ်း ၵျွၵ်ႉမေး မိူင်းတႆးပွတ်းႁွင်ႇ |
Baht Exchange Rate
