ၵႂၢမ်းတႆး တႆးလူဝ်ႇႁူႉ တႆးလူဝ်ႇမေႃ

 

မိူဝ်ႈႁဝ်းႁၼ်မၢၵ်ႇမႆႉသုၵ်ႈႁမ်ႇဝႆႉယူႇတီႈၼိူဝ်တူၼ်ႈမၼ်းၼၼ်ႉ ပေႃးႁဝ်းၶႂ်ႈၵိၼ်ၼႆတေလႆႈႁဵတ်းႁိုဝ် တေၶိုၼ်ႈဢဝ်ၵေႃႈသမ်ႉဢမ်ႇၵႅပ်ႉမႆႉ တေလႆႈႁဵတ်းၸိူင်ႉႁိုဝ်ဢဝ် လၢႆးမၼ်းတႄႉတေလႆႈႁႃမႆႉယၢဝ်းယၢဝ်းသေ သေႇတမ်ဢဝ်ၵူၺ်းၸွင်ႇၸႂ်ႈႁိုဝ် ။

ၵူၺ်းၵႃႈၼႂ်းၶေႃႈၵႂၢမ်းတႆးႁဝ်းတႃႇၸႂ်ႉတိုဝ်းမၼ်းမီးလၢႆၶေႃႈ လႄႈ မီးလၢႆလၢႆးဝႆႉယူႇ မိူၼ်ၼင်ပႃတႂ်ႈၼႆႉ

1. တွႆႇ
2. တမ်
3. ယဝ်ႈ
4. သေႇ
5. သွႆ
6. မႅၼ်ႈ
7. ၵွင်ႉ
8. သုပ်း

တီႈၵွင်ႇၵွၢမ်းမၢႆမၼ်း

1.တွႆႇ တွႆႇဢဝ်

ဢဝ်မႆႉယၢဝ်း တွႆႇသႂ်ႇ ပေႃႉသႂ်ႇတီႈၶူဝ်ႈမၢၵ်ႇမႆႉၼၼ်ႉႁႂ်ႈႁူင်ႈတူၵ်း။

2.တမ် တမ်ဢဝ်

ဢဝ်မႆႉယၢဝ်းတမ်သႂ်ႇတီႈလုၵ်ႈ ၶူဝ်ႈ မၢၵ်ႇမႆႉၼၼ်ႉႁႂ်ႈႁူင်ႈတူၵ်း။

3.ယဝ်ႈ ယဝ်ႈဢဝ်

ဢဝ်မႆႉယၢဝ်းၸမ်ႈသႂ်ႇတီႇတီႈလုၵ်ႇမၢၵ်ႇမႆႉၼၼ်ႉႁႂ်ႈႁူင်ႈတူၵ်း။

4.သေႇ သေႇဢဝ်

ဢဝ်ပၢႆမႆႉယၢဝ်းယိူင်းသႂ်ႇတီႈၵႅၼ်ႈမၢၵ်ႇမႆႉၼၼ်ႉသေသေႇဢဝ်။

5.သွႆ သွႆဢဝ်

တီႈပၢႆမႆႉယၢဝ်းၼၼ်ႉႁဵတ်းႁႂ်ႈပဵၼ်မူၵ်ႇ ဢမ်ႇၼၼ်ဢဝ်မႆႉၶူၺ်းႁဵေတ်းပဵၼ်တူင်ႇ ဢဝ်ထူင်ၽႃႈ ဢမ်ႇၼၼ်ထူင်ၸေႈမတ်ႉၸပ်းသေ ဢဝ်ႁႂ်ႈမၢၵ်ႇမႆႉၼၼ်ႉယွၼ်ႇဝႆႉၼႂ်းတူင်ႇၼၼ်ႉသေၵွင်ႉသွႆဢဝ်။

6.မႅၼ်ႈ မႅၼ်ႈဢဝ်

တီႈပၢႆမႆႉယၢဝ်းၼၼ်ႉႁဵတ်းႁႂ်ႈပဵၼ်ငႅမ်ႈသေ ဢဝ်ငႅမ်ႈတီႈပၢႆမႆႉၼၼ်ႉသိူၵ်ႈသႂ်ႇတီႈၵႅၼ်ႈမၢၵ်ႇမႆႉၼၼ်ႉသေလိမ်ႇ ပၼ်ႇ ႁႂ်ႈၵႅၼ်ႈမၢၵ်ႇမႆႉၼၼ်ႉႁၵ်း ။

7.ၵွင်ႉ ၵွင်ႉဢဝ်

တီႈပၢႆမႆႉယၢဝ်းၼၼ်ႉႁဵတ်းႁႂ်ႈမီးၶေႃသေ ဢဝ်ၶေႃတီႈပၢႆမႆႉၼၼ်ႉၵွင်ႉဢဝ်။

8.သုပ်း သုပ်းဢဝ်

တီႈပၢႆမႆႉၼၼ်ႉႁဵတ်းႁႂ်ႈပဵၼ်သွင်း ဢမ်ႇၼၼ်ဢဝ်သွင်းလဵၵ်ႉဢွၼ်ႇမတ်ႉၸပ်းပၢႆမႆႉသေသုပ်းဢဝ်။