ပိုၼ်းၸွမ်ပိဝ် မိူင်းတႆး

 ပိုၼ်းၸွမ်ပိဝ် မိူင်းတႆး

ၸိုဝ်ႈပၢၼ်ၵွၼ်ႇ ၶီႉတုင်း၊ တုင်း၊ တမ်းၶွၼ်ႇမၵ်းမၼ်ႈႁဵတ်းမိူဝ်ႈ 7 ႉ လိူၼ်ၵမ် ႉ 1947 ၸႂ်ႉတိုဝ်းတီႈႁႅၵ်ႈ ပၢင်လူင် ၽူႈၶွတ်ႇၽွတ်ႈ ၸုမ်းၶွင်ႇသီႇၸိုင်ႈတႆး (14 ၵေႃႉ) ၸဝ်ႈၾႃႉ 7 ၸဝ်ႈ၊ ၵူၼ်းမိူင်း 7 ၵေႃႉ ပႃးဝႆႉသီ လိူင်၊ ၶဵဝ်၊ လႅင် လႄႈ ၶၢဝ်

ၵႂၢမ်းၶေႃႈဝႃႈ ၸွမ်ပိဝ်ၼႆၼၼ်ႉ ၸႂ်ႉတိုဝ်းမႃးႁူဝ်သိပ်းပီမိူင်းၵူၺ်း မိူဝ်ႈဢွၼ်တၢင်း ဢမ်ႇၼၼ် မူိဝ်ႈမိုၼ်ႉၵွၼ်ႇၼၼ်ႉ ႁွင်ႉဝႃႈ တမ်းၶွၼ်ႇ၊ တုင်း ဢမ်ႇၼၼ် ၶီႉတုင်း ၼႆယဝ်ႉ။

ဢွၼ်တၢင်းသိုၵ်းလုမ်ႈၾႃႉပွၵ်ႈသွင်ၼၼ်ႉ ၸၢဝ်းၶိူဝ်းတႆးပႆႇပႃႈမီးၸွမ်ပိဝ်ၸိုင်ႈမိူင်းၶေႃၶေႃ (ဢၼ်မိူၼ်ၵၼ်) ၸႂ်ႉတိုဝ်းပိဝ်ၸွမ် ၸဝ်ႈၾႃႉမိူင်းၽႂ်မၼ်း ဢမ်ႇၼၼ်ၸွမ်ပိဝ်ၸၢဝ်းၶိူဝ်းဢၼ်ဢုပ်ႉပိူင်ႇမိူင်းတႆးၼၼ်ႉၼႆယဝ်ႉ။

ဝၢႆးသေသိုၵ်းလုမ်ႈၾႃႉပွၵ်ႈသွင်ယဝ်ႉတူဝ်ႈၵႂႃႇ ၵူႈၸၢဝ်းၶိူဝ်းၸိူဝ်းယူႇတႂ်ႈဢင်းၵိတ်ႉ ဢွၼ်ၵၼ်တူင်ႉတိုၼ်ႇတႃႇတေယွၼ်းဢဝ်မိူင်းသဝ်းၶေႃလႄႈ ၸၢဝ်းၶိူဝ်းတႆးၵေႃႈ မီးၸဝ်ႈၾႃႉၶဝ်ဢွၼ်ၵၼ်ႁဵတ်းပၢင်ၵုမ်တႃႇတေၽွမ်ႉၵၼ်တုၵ်းယွၼ်းဢဝ်ဝၢၼ်ႈမိူင်းသဝ်းၶေႃယူႇလၢႆလၢႆပွၵ်ႈသေ လွင်ႈၸွမ်ပိဝ်မိူင်းတႆးၼႆႉၵေႃႈ ယၢမ်ႈဢဝ်ဢုပ်ႇၵုမ်ၵၼ်ၼႂ်းပၢင်ၵုမ်ၸဝ်ႈၾႃႉတႆး မိူဝ်ႈပီ 1946 ၼၼ်ႉယူႇ ၵူၺ်းပႆႇလႆႈၶေႃႈမၵ်းမၼ်ႈမႃး။

ၽိူဝ်ႇထိုင်ပီ 1947 ႁဵတ်းပၢင်ၵုမ်လိၵ်ႈႁူမ်ႈမၢႆပၢင်လူင်ၼၼ်ႉၸုမ်းၶွင်ႇသီႇၸိုင်ႈတႆး ၽူႈတၢင်တူဝ်ၸဝ်ႈၾႃႉ 7 ၸဝ်ႈ လႄႈ ၵူၼ်းမိူင်း 7 ၵေႃႉ ဢွၼ်ၵၼ်ၶွတ်ႇၽွတ်ႈမၵ်းမၼ်ႈၸွမ်ပိဝ်မိူင်းတႆး ၼႃႈယၢဝ်းမီး 5ထတ်း၊ ၼႃႈပွတ်းမီး 3ထတ်း၊ဝူင်းသီၶၢဝ် မီး 1ႉ5 ထတ်း ပၼ်ႇမူၼ်းယဝ်ႉ ပဵၼ်သီၵေႇၸမ်ႉလွၼ်ႉလွၼ်ႉ ၼႆသေ တူၵ်းလူင်းၵၼ်ဝႃႈပဵၼ်ဝၼ်း မၵ်းမၼ်ႈၸွမ်ပိဝ်မိူင်းတႆးပဵၼ်ဝၼ်း မၵ်းမၼ်ႈၵႂၢမ်းတၢင်ႇၸွမ်ပိဝ်မိူင်းတႆး ပဵၼ်ဝၼ်း ၸဝ်ႈၾႃႉလႄႈၵူၼ်းမိူင်းၽွမ်ႉလႆႈၸႂ်ၵၼ် (ဝၼ်းၸိူဝ်ႉၸၢတ်ႈၸိုင်ႈတႆး) ၼႆမႃးၼႂ်းဝၼ်းတီႈ7 ၊ လိူၼ်ၽေႇၽ်ဝႃႇရီႇ (လိူၼ်သွင်) ၊ ပီ1947တီႈဝဵင်းပၢင်လူင်ၼၼ်ႉယဝ်ႉ။

ၽူႈတၢင်တူဝ် ဢမ်ႇၼၼ် ၶွင်ႇသီႇၸိုင်ႈတႆး 14 ၵေႃႉ ပဵၼ်ၽႂ်?

ၽူႈတၢင်တူဝ်ၸဝ်ႈၾႃႉ 7 ၸဝ်ႈ

1. ၶုၼ်ပၢၼ်းၸိင်ႇ (ၸဝ်ႈၾႃႉလူင် ၼမ်ႉသၼ်ႇ၊ ၶိူဝ်းပလွင်ႈ)
2. ၸဝ်ႈၶမ်းသိူၵ်ႈ (ၸဝ်ႈၾႃႉလူင် ယွင်ႁူၺ်ႈ၊ ၶိူဝ်းတႆးၼွင်)
3. ၸဝ်ႈႁူမ်ႇၾႃႉ (ၸဝ်ႈၾႃႉလူင် သႅၼ်ဝီ၊ ၶိူဝ်းတႆး)
4. ၸဝ်ႈၼုမ်ႇ (ၸဝ်ႈၾႃႉလူင် လၢႆးၶႃႈ၊ ၶိူဝ်းတႆး)
5. ၸဝ်ႈၸၢမ်ႇထုၼ်း (ၸဝ်ႈၾႃႉလူင် မိူင်းပွၼ်၊ ၶိူဝ်းတႆး)
6. ဢူးၽိဝ်ႇ (ၽူႈတၢင်တူဝ် ၸဝ်ႈၾႃႉသီႇသႅင်ႇ၊ ၶိူဝ်းပဢူဝ်း)
7. ၸဝ်ႈထုၼ်းဢေး (ၸဝ်ႈၾႃႉလူင် မိူင်းသႃမိူင်းၶမ်း၊ (ၶိူဝ်းတႆးထၼူႉ)

ၽူႈတၢင်တူဝ်ၵူၼ်းမိူင်း 7 ၵေႃႉ

1. ၶုၼ်ၽူင်း ၶိူဝ်းၶၢင် တၢင်တူဝ်တွၼ်ႊၵူတ်ႉၶၢႆ
2. လုင်းတိၼ်ႇဢေး တႆးၼွင် တၢင်တူဝ်တွၼ်ႊၼွင်ႁၢႆးယႃႈ
3. လုင်းၶုၼ်ၵျႃႇပူႉ ၶိူဝ်းတႆး တၢင်တူဝ်တွၼ်ႊသီႇပေႃႉ
4. လုင်းၶုၼ်ၸေႃး တႆးထၼူႉ တၢင်တူဝ်တွၼ်ႊပၢင်းတြႃႉ
5. လုင်းၶုၼ်ထီး ၶိူဝ်းတႆး တၢင်တူဝ်တွၼ်ႊပၢင်လူင်
6. ၸဝ်ႈယဵပ်ႇၾႃႉ ၶိူဝ်းတႆး တၢင်တူဝ်တွၼ်ႊသႅၼ်ဝီ။
7. လုင်းထုၼ်းမျိၼ်ႉ ၶိူဝ်းတႆး တၢင်တူဝ်တွၼ်ႊမွၵ်ႇမႆႇလၢင်းၶိူဝ်း။

ၽဵင်းၵႂၢမ်းတၢင်ႇၸွမ်ပိဝ်မူိင်းတႆးၼၼ်ႉ ဢဝ်တီႈလႂ်မႃး?

ၽဵင်းၵႂၢမ်းတၢင်ႇၸွမ်ပိဝ်မိူင်းတႆးၼႆႉ ဢမ်ႇၸႂ်ႈဝႃႈတိုၵ်ႉတေႇ တႅမ်ႈမိူဝ်ႈဝၼ်းမၵ်းမၼ်ႈၸွမ်ပိဝ်မိူင်းတႆး လိူင်၊ၶဵဝ်၊လႅင် လႄႈ ၶၢဝ် ၼႂ်းဝၼ်းတီႈ 7ႉ 2 ႉ1947 ၼၼ်ႉၵူၺ်း၊ တီႈတေႉမၼ်းလႆႈတႅမ်ႈဝႆႉၸဵမ်မိူဝ်ႈပီ 1942 လိူၼ်မေႇ (လိူၼ်ႁႃႈ) ပၢၼ်ၵျႃႇပၢၼ်ႇၶဝ်ႈမိူင်းတႆး ၼၼ်ႉယဝ်ႉ ၊ ၽူႈတႅမ်ႈပဵၼ် မေႃယႃ တွၵ်ႇတိူဝ်ႇၶူးပၺၢၼ်ႇ M.B.B.S.D.T. L.M. သေ၊ မိူဝ်ႈၽွင်းၶူးပၺၢၼ်ႇ ဢဝ်ပုၼ်ႈၽွၼ်း ၽၢႆႇပၢႆးယူႇလီ ၸေႈဝဵင်းသီႇပေႃႉၼၼ်ႉ တႅမ်ႈၵႂၢမ်းပုၵ်ႈၼႆႉ ၸႅၵ်ႇၽေပၼ်လုၵ်ႈၸုမ်း‌ေသႁွင်ႉတၢင်ႇၸွမ်ပိဝ် ၼႃႈလုမ်းမၼ်းၵူႈဝၼ်း ၼႆယဝ်ႉ၊ ၸွမ်ပိဝ်ပၢၼ်ၼၼ်ႉ ပႆႇပႃႈၸႂ်ႈ လိူင်၊ၶဵဝ်၊လႅင် လႄႈ ၶၢဝ် သေ ပဵၼ်ဝႆႉႁၢင်ႈႁူဝ်သိူဝ်ၼႆယဝ်ႉ ပၢၼ်ၼၼ်ႉ ၸဝ်ႈၾႃႉၶိူဝ်းႁိူၼ်းသိူဝ်ၼႆႉ ဢဵၼ်ႁႅင်းယႂ်ႇလိူဝ်ပိူၼ်ႈလႄႈ ၵမ်ႉပႃႈၼမ် တေၸႂ်ႉၸွမ်ပိဝ်ႁၢင်ႈႁူဝ်သိူဝ်ၼႆယူႇယဝ်ႉ။

ယွၼ်ႉပိူဝ်ႈမိူဝ်ႈၼၼ်ႉ ၸွမ်ပိဝ်ပဵၼ်ႁၢင်ႈႁူဝ်သိူဝ်လႄႈ ၼႂ်းၵႂၢမ်းတၢင်ႇၸွမ်ပိဝ်မိူဝ်ႈၼၼ်ႉၵေႃႈ မီးဝႆႉဝႃႈ

ၶိူဝ်းတႆး ၶိူဝ်းရႃႇၸႃႇ

ဢလၢမ်ႇသမ်ႉ ပျၵ်ႉၶႃႇ

တူဝ်သိူဝ်ၸဝ်ႈမႁႃႇ

ႁႂ်ႈတႆးမီးတေႇၸႃႇ

ၽွမ်ႉပဵင်းၸႂ်ဝႃႇၸႃႇ

သူၸဝ်ႈႁဝ်းၶႃႈႁႂ်ႈမီးၸႂ်သတ်ႉၸႃႇ ၼႆသေ

ထိုင်မိူဝ်ႈၸုမ်းၶွင်ႇသီႇၸိုင်ႈတႆးၶဝ် မၵ်းမၼ်ႈမႃးတႄႉယွၼ်ႉဝႃႈတူၺ်းႁၼ်ထိုင်ၸၢဝ်းၶိူဝ်းၼႂ်းမိူင်းတႆးသေၸွမ်ပိဝ်ၵေႃႈ ဢမ်ႇၸႂ်ႈႁၢင်ႈႁူဝ်သိူဝ်ယဝ်ႉလႄႈ ၸင်ႇဝႃႈ

ၶိူဝ်းႁဝ်း ၶိူဝ်းရႃႇၸႃႇ

ၸွမ်ပိဝ်သမ်ႉၸၼ်ႇတႃႇ

လိူၼ်ၶမ်းၸဝ်ႈၸၵ်ႉၵျႃႇ

ႁႂ်ႈႁဝ်းမီးတေႇၸႃႇ

ၽွမ်ႉပဵင်းၸႂ်ဝႃႇၸႃႇ

သူၸဝ်ႈႁဝ်းၶႃႈ ၶိူဝ်းမီးၸႂ်သတ်ႉၸႃႇ၊

ၼႆ ဢဝ်‌ေၶႃႈဝႃႈ ႁဝ်း ၼၼ်ႉတၢင်တီႈ တႆး ‌‌ေသမၵ်းမၼ်ႈမႃးယူႇယဝ်ႉ။

ရႃႇၸႃႇ - ၶုၼ်၊

ပျၵ်ႉၶ/ပဵၵ်ႉၶ - သိူဝ်၊

ၸၼ်ႇတႃႇ-လိူၼ်၊

ၸၵ်ႉၵျႃႇ- ၶိူင်ႈယိပ်းၶုၼ်ၽီ (ဢၼ်ၸႂ်ႉတႃႇၸွႆႈထႅမ်ၼိူဝ်ပိူၼ်ႈ)

မႁႃႇ - ယႂ်ႇလူင်၊

တေႇၸႃႇ - ဢူၽုင်း/ ဢဵၼ်ႁႅင်း/ သၢႆႁိူဝ်ႈလႅင်း

ဝႃႇၸႃႇ - လွင်ႈလၢတ်ႈၸႃ / မေႃလၢတ်ႈ

သတ်ႉၸႃႇ - ၵႂၢမ်းမၼ်ႈၵႅၼ်ႇ / ၵႂၢမ်းၸိုဝ်ႈၸႂ်ႈ။

တီႈပွင်ႇသီ ၸွမ်ပိဝ်မိူင်းတႆး လိူင်၊ ၶဵဝ်၊ လႅင် လႄႈ ၶၢဝ်

သီလိူင် - မီးတီႈပွင်ႇဝႃႈ ၶိူဝ်းတႆးပဵၼ်ၶိူဝ်းၵူၼ်းဢၼ်ၼပ်ႉယမ်ပုတ်ႉထၽႃႇသႃႇ၊ ပဵၼ်ၶိူဝ်းၵူၼ်းမုၼ်ႇၵူဝ်းႁိုဝ် မူင်ႇၵူဝ်း ဢၼ်မီးသႃၼိူဝ်ႉ(ၽိဝ်ၼိူဝ်ႉ)ပဵၼ်သီလိူင်ၼႆယဝ်ႉ။

ပေႃးဢဝ်လုမ်ႈၾႃႉမၵ်းမၼ်ႈဝႃႈ ၶိူဝ်းၵူၼ်းမိူဝ်ႈၸဝ်ႉၼၼ်ႉမၵ်းမၼ်ႈဝႆႉသီႇၶိူဝ်း

1 ၶိူဝ်းၵူၼ်းမုၼ်ႇၵူဝ်း Mongoloid ၼိူဝ်ႉလိူင်

2 ၶိူဝ်းၵူၼ်းယူးရူပ်ႉ Europid ၼိူဝ်ႉၶၢဝ်ၽိူၵ်ႇ

( ၶိူဝ်းၵူၼ်းဢႃႇရႃႇယၼ်ႇ ၼႆၵေႃႈႁွင်ႉ)

3 ၶိူဝ်းၵူၼ်းၼီႇၵရူဝ်း Negroid ၼိူဝ်ႉလမ်

4 ၶိူဝ်းၵူၼ်း‌ေဢႃးသထူဝ်း Australiod ၼိူဝ်ႉၵမ်ႇ

( ၶိူဝ်းၵူၼ်းၵွၵ်ႇၶ်ၵေးသႅၼ်ႇ Cancasian ၼႆၵေႃႈႁွင်ႉ)

ယွၼ်ႉဝႃႈၶိူဝ်းတႆးၼႆႉ ၽေဢွၵ်ႇမႃးတီႈၶိူဝ်းၵူၼ်းမုၼ်ႇၵူဝ်း လႄႈ ၸင်ႇဝႃႈပဵၼ်ၶိူဝ်းသႃၼိူဝ်ႉ(ၽိဝ်ၼိူဝ်)သီလိူင်ၼႆယဝ်ႉ၊ ႁဵတ်းႁိုဝ်ဝႃႈတႆးၽေဢွၵ်ႇမႃးတီႈၶိူဝ်းမုၼ်ႇၵူဝ်းၼႆၼၼ်ႉလၵ်းထၢၼ်မၼ်း ႁႃလူလႆႈတီႈၼႂ်းပပ်ႉလိၵ်ႈဢၼ်ၸိုဝ်ႈဝႃႈ The historical records of the Siamese and Chinese relation. ဢၼ် LiKit Hoontrakul တႅမ်ႈဝႆႉမိူဝ်ႈ1953ၼၼ်ႉတေၸႅင်ႈလႅင်းလီယူႇ ဢမ်ႇၼၼ် ပိုၼ်းတႆးမူၼ်ႇၵူဝ်းၸဝ်ႈဢၼ် သၢမ်ၸွမ်ၵဝ်ႈ တႅမ်ႈဝႆႉၼၼ်ႉၵေႃႈလီၶႃႈယဝ်ႉ။

သီၶဵဝ် - မီးတီႈပွင်ႇဝႃႈ ၶိူဝ်းတႆးၼႆႉ ပဵၼ်ၵူၼ်းဢၼ်သူင်ယူႇၸွမ်းထိူၼ်ႇပႃႇမႆႉၶဵဝ်ၶဵဝ် ၸွမ်းတူၼ်းလွႆ ဢမ်ႇၼၼ် တီႈပၢင်ႇပဵင်းဢၼ်မီးမႄႈၼမ်ႉ ၵွပ်ႈၼၼ် တီႈယူႇၸၢဝ်းၶိူဝ်းတႆးၼႆႉ မီးပႃႇမႆႉထိူၼ်ႇၶိူဝ်း ပေႃးၶဵဝ်လူင် ဝႆႉယူႇတင်းၽႅၼ်ႇလိၼ်ယဝ်ႉ၊ သိုပ်ႇၶႆႈတူၺ်း သဵၼ်ႈသၢႆတၢင်းဢၼ်တႆးယၢမ်ႈပၢႆႈယၢၼ်မႃး ၸိူဝ်းၼၼ်ႉၵေႃႈတေလႆႈဝႃႈ လူင်းမႃးၸွမ်းမႄႈၼမ်ႉၵမ်ႉပႃႈၼမ်ယူႇၼႆထၢင်ႇၸႅင်ႈလီယူႇ။

သီလႅင် - မီးတီႈပွင်ႇဝႃႈ ၸၢဝ်းၶိူဝ်းတႆးပဵၼ်ၶိူဝ်းဢၼ်ႁတ်းႁၢၼ်၊ ဢမ်ႇၸိုဝ်ႈဢမ်ႇၸႂ်ႈၸိုင်တိုၼ်းဢမ်ႇယွမ်းတေႃႇၽႂ် မီးတူၼ်ႈၸႂ်ဢၼ်ၵႅၼ်ႇၶႅင်ထၢင်ႇၸႅင်ႈၼင်ႇသီလႅင်ၼႆယဝ်ႉ။

ပေႃးလူတူၺ်းတီႈၼႂ်းပပ်ႉ ယၢၼ် ဢၼ်မႄႈၶူးၶိူဝ်းသႅၼ် တႅမ်ႈဝႆႉၼၼ်ႉ မိူဝ်ႈၽွင်း တႆး တင်း ၶႄႇ တိုၵ်းၵၼ် ၼႂ်းပၢင်ႇလူင်မိူင်း ပွတ်ႈတွၼ်ႈလွႆတႃႈၼၢႆးၼၼ်ႉ တူဝ်တၢႆသိုၵ်းတႆးဢၼ်ထုၵ်ႇၽၼ်းတင်းၵွင်းလင်သေတၢႆၼၼ်ႉဢမ်ႇမီးသေၵေႃႉၼႆယဝ်ႉ တီႈၼၼ်ႈ မၼ်းၼေဝႃႈ သိုၵ်းတႆးႁဝ်းမိူဝ်ႈၵွၼ်ႇၼၼ်ႉ ဢမ်ႇတွၼ်ႉပွႆႇပႅတ်ႈၵၼ် ဢမ်ႇထွႆလင်ပႅတ်ႈၵၼ်သေ မုင်ႈၼႃႈတိုၵ်းဢဝ်သၢႆၸႂ်ႁေႉၵင်ႈၶိူဝ်းတႆးမႃးၼႆယူႇယဝ်ႉ။

ယွၼ်ႉၵူၼ်းၵူႈပွၵ်ႈၶဝ် လၢတ်ႈဝႃႈ လၢႆးတိုၵ်းသိုၵ်းပၢၼ်လႅဝ်းၼၼ်ႉ တီႈ‌ေဢႇသုတ်း သၢမ်ၵေႃႉယၼ်ၵႃၵဵင်း ၵွင်လင်တေႃးၵၼ်သေ ႁပ်ႉတိုၵ်းၽူႈၶဵၼ်လႄႈ ၵေႃႉဢၼ်ၺႃးၽၼ်းတင်းၵွင်းလင်သေတၢႆၼၼ်ႉ ပဵၼ်ၵေႃႉဢၼ်ဢၢင်ႈလၵ်ႉပၢႆႈဝၢႆႇၼႃႈဢွၵ်ႇပၢင်တိုၵ်းသေ ပိူၼ်ႈၽၼ်းတၢႆၼႆၼၼ်ႉယဝ်ႉ။

သီၶၢဝ် - မီးတီႈပွင်ႇဝႃႈ တႆးပဵၼ်ၵူၼ်းၶိူဝ်းဢၼ်မီးၼမ်ႉၸႂ်ၽိူၵ်ႇၸိုၼ်ႈၶၢဝ်သႂ်၊ ႁၵ်ႉပႅင်းလွင်ႈၵတ်းယဵၼ်ဢမ်ႇၶႂ်ႈႁဵတ်းၶဵၼ်တေႃႇၽႂ်ၼႆယဝ်ႉ။

လွင်ႈဢမ်ႇၶႂ်ႈႁဵတ်းၶဵၼ်တေႃႇၽႂ်ၼႆႉတႄႉ တိုၼ်းႁၼ်ၵၼ်ယူႇတေႃႇယၢမ်းၼႆႉ၊ တေႃႇပိူၼ်ႈယိုဝ်းၵူၼ်းတႆးတၢႆၼႂ်းဝၢၼ်ႈၼႂ်းဝဵင်း တင်းဢမ်ႇႁူႉၵေႃႉယိုဝ်းမၼ်းလူး၊ ပိူၼ်ႈႁဵတ်းၶဵၼ်‌ေတႃႇႁဝ်း တင်းဢမ်ႇၶိုၼ်း‌ႁဵတ်းၶဵၼ်‌ေတႃႇၽႂ်တေႉၼၼ်ႉယဝ်ႉ။

‌ေပႃးၼႆၸိုင် တူဝ်ၸဝ်ႈၵဝ်ႇလူးၸွင်ႇတိုၵ်ႉပဵၼ်ၶိူဝ်းသႃၼိူဝ်ႉလိူင်ဢၼ်ၼပ်ႉယမ်ၸၢဝ်းပုတ်ႉထယူႇႁိုဝ်?

ၸွင်ႇတိုၵ်ႉလႆႈႁၼ်ထိူၼ်ႇပႃႇမႆႉမိူင်းတႆးႁဝ်းတိုၵ်ႉၶဵဝ်

ၽဵင်ႇၵၼ်ယူႇႁိုဝ်?

ၸွင်ႇတိုၵ်ႉႁတ်းႁၢၼ်တႃႇၸိူဝ်ႉၶိူဝ်းသေ ဢမ်ႇၸိုဝ်ႈဢမ်ႇၸႂ်ႈၼၼ်ႉၸွင်ႇႁတ်းဢႃႈပၢၵ်ႇလၢတ်ႈယူႇႁိုဝ်?

ၼမ်ႉၸႂ်ၶၢဝ်သႂ်ၶိိူဝ်းႁဝ်းၼၼ်ႉ ၸွင်ႇလႆႈဝႆႉၸိူဝ်ႉၽၼ်းမၼ်းယူႇႁႃႉ?

ၼႆၸိူဝ်းၼႆႉ ၸွႆႈတွပ်ႇပၼ်တူဝ်ၸဝ်ႈၵဝ်ႇႁႂ်ႈလႆႈသေၵမ်း။

ၽိုၼ်ဢိင် -

ပိုၼ်းတႆးမိူဝ်ႈမိုၼ်ႉၵွၼ်ႇ ၸိူဝ်ႉလၢၼ်ႉၸဝ်ႈ

ၸဵတ်းသွင်ဝၼ်းၼိုင်ႈ ၶူးၶိူဝ်းသႅၼ်

Shannews.org (ၽူႈတႅမ်ႈၵႂၢမ်းတၢင်ႇၸွမ်ပိဝ်ပဵၼ်ၽႂ်)

Shn.m.wikipedia.org ၸွမ်ပိဝ်တႆး

သၢႆပႅၼ်း မၢႆ26