ပိုၼ်းပဵၼ်မႃး ပီႊမႂ်ႇၶေႇ

ပိုၼ်းပဵၼ်မႃးပီႊမႂ်ႇၶေႇ တွၼ်ႈ ဢၢႆႈၼုမ်ႇလဵင်ႉၵႂၢႆး လႄႈ ၼၢင်းၽီ ထဵပ်ႉထီႇတႃႇ 

မိူဝ်ႈယၢမ်းၼင်ႇၼၼ် ၼၼ်ႉတီႈၼိူဝ်မိူင်းၽီၼၼ်ႉမီးၼၢင်းၾႃႉၼၢင်းၼိုင်ႈ ၸိုဝ်ႈႁွင်ႉၼၢင်းထဵပ်ႉထီႇတႃႇ မိူဝ်ႈၼၼ်ႉၼၼ်ႉၶုၼ်ၽီလူင် ၸဝ်ႈၶုၼ်ဢိၼ်းလႆႈ ပၼ်ပုၼ်ႈၽွၼ်းမၼ်းၼၢင်းႁႂ်ႈပဵၼ်ၵေႃႉလုမ်းလႃးတူၺ်းထိုင် တွင်ႉၾႃႉၵၢင်ႁၢဝ်ဝႆႉလႄႈ ၼင်ႉႁိုဝ်တွင်ႉၾႃႉၵၢင်ႁၢဝ်တေလီယၵ်ႉလီတူၺ်းၼၼ်ႉမၼ်းၼၢင်းတေဢဝ်မွၵ်ႇၵုမ်ႈ ႁဵတ်းပဵၼ်ႁၢင်ႈၵူႈၸိူဝ်းၵူႈပိူင်ၼႆယူႇ မၢင်ပွၵ်ႈၵေႃႈၼႃႈၾႃႉပၢင်ႇသႂ်လီ မၢင််ပွၵ်ႈၵေႃႈပဵၼ်ၾႃႉငိုပ်းၾႃႉၵၢမ်ႈၵႂႃႇၸိူဝ်း ၼႆႉၵေႃႈပဵၼ်ၼၢင်းၽီထဵပ်ႉထီႇတႃႇၼႆႉႁဵၼးပဵၼ်ယဝ်ႉ။

မီးဝၼ်းၼိုင်ႈတီႈၼႂ်းမိူင်းၵူၼ်းသမ်ႉမီးၸၢႆးၼုမ်ႇၵေႃႉၼိုင်ႈ လႄႈ မၼ်းၸၢႆးမီးၵႂၢႆးငၢၼ်ထဝ်ႈလူင်တူဝ်ၼိုင်ႈ တိုၵ်ႉ လိုဝ်ႈႁိူဝ်ႉၵိၼ်ႈၶဝ်ႈၽွင်းၵၢင်ဝၼ်းတဵင်ႈတႂ်ႈတူၼ်ႈမႆႉလူင်တူၼ်ႈၼိုင်ႈ မၼ်းၸၢႆးပွႆႇၵႂၢႆးမၼ်းလႅမ်းၵိၼ်ယိူဝ်ႈယႃႈ ယူႇၸွမ်းႁိမ်းႁွမ်းမၼ်းၼၼ်ႉ ယူႇယူႇၵေႃႈမီးၼူၵ်ႇၵႃဝၢဝ်ႇတူဝ်ၼိုင်ႈမိၼ်သေတူၵ်းလူင်းမႃႈတီႈႁိမ်းမၼ်းၸၢႆး ၼၼ်ႉ မၼ်းၸၢႆးၵေႃႈၼႅတ်ႈၵဵပ်းဢဝ်ၼူၵ်ႉၼၼ်ႉမႃးတူၺ်းသေလႆႈႁၼ်ဝႃႈၼူၵ်ႉၼၼ်ႉလႆႈထုၵ်ႇၺႃးပိုတ်းယိုဝ်း မၢတ်ႇၸဵပ်းဝႆႉလႄႈ မၼ်းၸၢႆးၸင်ႇဢဝ်ၼူၵ်ႉၼၼ်ႉ ယူတ်းယႃလဵင်ႉဝႆႉယဝ်ႉ ပေႃးဝႃႈၼူၵ်ႉၼၼ်ႉၸိုၼ်ႈၶႅၼ်းလီ ၶိုၼ်းယဝ်ႉ မၼ်းၸၢႆးၵေႃႈၶိုၼ်းပွႆႇၼူၵ်ႉၼၼ်ႉၵႂႃႇယူႇယဝ်ႉ။

လွင်ႈတၢင်းၵူႈၸိူဝ်းၵူႈလွင်ႈဢၼ်မၼ်းၸၢႆးလႆႈၸွႆႈလိူဝ်ၼူၵ်ႉၼၼ်ႉ ၼၢင်းၽီ ထဵပ်ႉထီႇတႃႇ ႁူႉႁၼ်ၸွမ်းၵူႈလွင်ႈ မၼ်းၼၢင်းႁၼ်ဝႃႈမၼးၸၢႆးပဵၼ်ၵူၼးလီ မီးၸႂ်မႅတ်ႉတႃႇဝႃႈၼႆယူႇ ႁဵတ်းၼၼ်ယဝ်ၼၢင်းၽီထဵပ်ႉထီႇတႃႇၼၼ်ႉ ၵေႃႈတူၺ်းလူင်းမႃးတီႈၸၢႆးၼုမ်ႇၼၼ်ႉၵူႈဝၼ်း ယွၼ်ႉပိူဝ်ႈႁၼ်ဝႃႈၸၢႆးၼုမ်ႇၼႆႉမီးၸႂ်သိုဝ်ႈယူဝ်း မီးၸႂ်မုၼ် မီးၸႂ် မႅတ်ႉတႃႇ ၼႆယဝ်ႉ။

မီးမႃးဝၼ်းၼိုင်ႈ ၼၢင်းၽီထဵပ်ႉထီႇတႃႇၼၼ်ႉၵေႃႈ တႅပ်းတတ်းၸႂ်သေပွႆႇၽႃႈပႅတ်ႈၼႃႇတီႈပုၼ်ႈၽွၼ်းမၼ်းၼၢင်း သေလၵ်ႉမိၼ်သၢၼ်ႇလူင်းမႃးမိူင်းၵူၼ်းမႃးႁႃၸၢႆးၼုမ်ႇလဵင်ႉၵႂၢႆးၼၼ်ႉယူႇ ၊ ဝၢႆးမႃးၵေႃႈၼၢင်းၽီထဵပ်ႉထီႇတႃႇ ၼၼ်ႉၵေႃႈၵႆႉၵႆႉလူင်းမႃးႁႃၸၢႆးၼုမ်ႇလဵင်ႉၵႂၢႆးၼၼ်ႉၸွႆႈလိူဝ်ၸၢႆးၼုမ်ႇၼၼ်ႉၵူႈလွင်ႈသေႁိုင်မႃးၵေႃႈ ဢဝ်ယဵၼ်းပဵၼ်လွင်ႈႁၵ်ႉၵႂႃႇသေ သိႃပ်ႇမႃးၵေႃႈၼၢင်းၽီထဵပ်ႉထီႇတႃႇၼၼ်ႉၵေႃႈပွႆႇပႅတ်ႈၼႃႈၵၢၼ်ပုၼ်ႈၽွၼ်း  မၼ်း ၼၢင်းတီႈၼိူဝ်မိူင်းၽီၼၼ်ႉသေမႃး ယူႇ ၸွမ်းၸၢႆးၼုမ်ႇလဵင်ႉၵႂၢႆးၼၼ်ႉယဝ်ႉ။

ၸၢႆးၼုမ်ႇလဵင်ႉၵႂၢႆးၼၼ်ႉၵွပ်ႈဢမ်ႇႁူႉဝႃႈၼၢင်းပဵၼ်ၼၢင်းၽီထေႉဝတႃႇလႄႈပဵၼ်ဢၼ် ငိၼ်းၸူမ်း သိူဝ်း ၵွပ်ႈပိူဝ်ႈ ၼၢင်းၽီထဵပ်ႉထီႇတႃႇၼၼ်ႉၽၢၼ်ႇ သၢင်း လႆႈၵူႈလွင်ႈ ၼင်ႇၵႃႈၶႂ်ႈလႆႈၶႂ်ႈပဵၼ်ဝႃႈၼႆယူႇ ။

ႁဵတ်းၼၼ်ယဝ်ႉတွင်ႉၾႃႉ ဢၼ်မီးၼၢင်းၽီထဵပ်ႉထီႇတႃႇ ၵုမ်းထိင်းလုမ်းလႃးၼၼ်ႉ ပေႃးဝႃႈဢမ်ႇမီးၽႂ်လုမ်းလႃး တူၺ်းထိုင်ယဝ်ႉၼႆၵေႃႈ ႁဵတ်းႁႂ်ႈတွင်ႈၾႃႉၼၼ်ႉပဵၼ်လူင်ၵႂႃႇၵူႈလွင်ႈၵူႈလၢႆး ဢမ်ႇပဵၼ်ၸွမ်းၼင်ႇပိူင် ရႃႇသီႇဢုတု ၸွမ်းၶိင်ႇၸွမ်းၶၢဝ်းသေ ႁဵတ်းႁႂ်ႈပဵၼ်ၾႃႉၵၢမ်ႈၾႃႉငိုပ်း ၾႃႉၽႃႇၾႃႉလင် မေႃးပၼ်းႁဵတ်းႁႂ်ႈလွင်ႈၼႆႉ ထိုင်ၵႂႃႇ တီႈၸဝ်ႈၶုၼ်ၽီလူင်ၶုၼ်ဢိၼ်းၼၼ်ႉယူႇ။

ၸဝ်ႈၶုၼ်ဢိၼ်းၸင်ႇသင်ႇၵႂၢမ်းတီႈၶုၼ်ၽီဢွၼ်ႇၶဝ်ႁႂ်ႈၵႂႃႇတူၺ်းလွင်ႈတၢင်းဢၼ်ၵိုတ်ႇပဵၼ်မႃးၼၼ်ႉသေလႆႈႁူႉဝႃႈ ၼၢင်းၽီထဵပ်ႉထီႇတႃႇၽူႈဢဝ်ပုၼ်ႈၽွၼ်းလုမ်းလႃးတူၺ်းထိုင်တွင်ႉၾႃႉၼၼ်ႉပၢႆႈလူင်းၵႂႃႇယူႇၸွမ်းမၼုသ်ႉ တီႈမိူင်းၵူၼ်းယဝ်ႉၼႆယဝ်ႉ။

မိူဝ်ႈၸဝ်ႈၶုၼ်ဢိၼ်းႁူႉလွင်ႈတၢင်းမၼ်ယဝ်ႉ ၸဝ်ႈၶုၼ်ဢိၼ်းၸင်ႇၸႂ်ႉႁႂ်ႈၶုၼ်ၽီဢွၼ်ႇၶဝ်လူင်းမိူဝ်းမိူင်းၵူၼ်းသေ ႁႂ်ႈဢဝ်ၼၢင်းထဵပ်ႉထီႇတႃႇၼၼ်ႉၶိုၼ်ႈမိူဝ်းမိူင်းၽီၶိုၼ်း သေဢမ်ႇပၼ်ႁႂ်ႈၼၢင်းထဵပ်ႉထီႇတႃႇ ၼၼ်ႉၵႂႃႇတၢင်းလႂ် သေႁႂ်ႈၶိုၼ်းႁပ်ႉၼႃႈတီႈပုၼ်ႈၽွၼ်းၵဝ်ႇၶိုၼ်းဝႃႈၼင်ႇၼၼ်ယဝ်ႉ။

ၸၢႆးၼုမ်ႇၼၼ်ႉပေႃးမေးၼၢင်းမၼ်းၽၢတ်ႇယၢၼ်မၼ်းၸၢႆးမိူဝ်းၵႂႃႉယဝ်ႉ မၼ်းၸၢႆးပဵၼ်ဢၼ်ၸႂ်ထိုင်မေးမၼ်း ဢမ်ႇပဵၼ်ယူႇပဵၼ်ၵိၼ် သေၵုမ်ႇႁွင်ႉႁႆႈႁႃမေးၼၢင်းမၼ်းယူႇၶိုၼ်းၶိုၼ်းဝၼ်းဝၼ်းယဝ်ႉ ၊ ၽွင်ႈမိူဝ်ႈမၼ်းၸၢႆးဢဝ် ၵႂၢႆးငၢၼ်ထဝ်ႈလူင်မၼ်းၵႂႃႇပွႆႇလႅမ်းယိူဝ်ႈတီႈၵဝ်ႇႁိမ်းတႂ်ႈတူၼ်ႈမႆႉၼၼ်ႉ မၼ်းၸၢႆးယိုင်ႈၶႅၼ်ၸႂ်ထိုင်မေးမၼ်းသေ ႁွင်ႉႁႃမေးမၼ်းၵေႃႉပဵၼ်ၼၢင်းၽီထဵပ်ႉထီႇတႃႇၼၼ်ႉယူႇ။

ၽွင်းၼၼ်ႉၵႂၢႆးထဝ်ႈလူင်မၼ်းၼၼ်ႉၸင်ႇလၢတ်ႈတီႈမၼ်းၸၢႆးၼုမ်ႇၼၼ်ႉဝႃႈ ၸဝ်ႈႁဝ်းယႃႇပေၵုမ်ႇႁွင်ႉႁႆႈယူယဝ်ႉ ၶႃႈ ၵဝ်ၶႃႈၸွႆႈၸဝ်ႈႁဝ်းႁႂ်လႆႈမိူဝ်းထူပ်းမေးၼၢင်းၸဝ်ႈႁဝ်းတီႈၼိူဝ်မိူင်းၽီပုၼ်ႉလႃႈဢေႃႈ ဝႃႈၼႆယဝ်ႉ။

ၸၢႆးၼုမ်ႇၼၼ်ႉတူၵ်းၸႂ်သေ ထၢမ်းၵႂၢႆးထဝ်ႈမၼ်းၶိုၼ်းဝႃႈ မႂ်းႁဵတ်းႁိုဝ်မေႃလၢတ်ႈၵႂၢမ်းၵူၼ်း မႂ်းတေႁဵတ်းႁိုဝ်ၸွႆႈ ႁႂ်ႈၵဝ်မိူဝ်းႁႃမေးၵဝ်တီႈၼိူဝ်မိူင်းၽီလႆႈၼႆယူႇ။

ၵႂၢႆးထဝ်ႈၼၼ်ႉၸင်ႇၶိုၼ်းတွပ်ႇၸဝ်ႈမၼ်းၶိုၼ်းဝႃႈ ၵဝ်ၶႃႈၼႆႉယၢမ်ႈပဵၼ်ၶုၼ်ၽီဢၼ်ယူႇတီႈၼိူဝ်မိူင်းၽီၼၼ်ႉ ဢေႃႈ ၵွပ်ႈပိူဝ်ႈၵဝ်ၶႃႈလႆႈႁဵတ်းၽိတ်းပၵ်းပိူင်ၼိူဝ်မိူင်းၽီႁဝ်းလႄႈ ၵဝ်ၶႃႈၸင်ႇလႆႈမႃးၶၢမ်ႇတၢမ်ႇၵိူတ်ႇပဵၼ်ၵႂၢႆး ၸဝ်ႈႁဝ်းၼႆႉယဝ်ႉ ၊ မိူဝ်ႈလဵဝ်ၼႆႉၵဝ်ၶႃႈလႃႈပေႇဝူတ်ႈပေႇတၢမ်ႇၵဝ်ၶႃႈယဝ်ႉ ၵဝ်ၶႃႈတေလႆႈမိူဝ်းယူႇတီႈၼိူဝ်မိူင်းၽီ ႁဝ်းၶိုၼ်းယဝ်ႉ ၊ ပေႃးဝႃႈၸဝ်ႈႁဝ်းၶႂ်ႈမိူဝ်းႁႃးမေးၼၢင်းၸဝ်ႈႁဝ်းတီႈၼိူဝ်မိူင်းၽီၼႆ ႁႂ်ႈၸဝ်ႈႁဝ်းတႅပ်းၶေႃးၵဝ်ၶႃႈႁႂ်ႈ ၶၢတ်ႈသေ ၸဝ်ႈႁဝ်းၶီႇၼိူဝ်ႁူဝ်ၵဝ်ၶႃႈၼႆႉ ႁူဝ်ၵဝ်ၶႃႈၼႆႉတေဢွၼ်ဢဝ်ၸဝ်ႈႁဝ်းမိူဝ်းထိုင်တီႈမေးၼၢင်းၸဝ်ႈႁဝ်း ယူႇၼၼ်ႇလႆႈယူႇၼႆယဝ်ႉ။

ပေႃးဝႃႈမၼ်းၸၢႆးလႆႈႁူႉၼင်ႇၼၼ်ယဝ်ႉမၼ်းၸင်ႇတႅပ်းၶေႃးၵႂၢႆးမၼ်းသေ ၶိုၼ်ႈၶီႇၼိူဝ်ၵွၵ်းႁူဝ်းၵႂၢႆးမၼ်းၼၼ်ႉ ယူႇ ႁူဝ်းၵႂၢႆးထဝ်ႈလူငမၼ်းၼၼ်ႉၼၼ်ႉၸင်ႇပႃးဢဝ်ၸဝ်ႈၶွင်မၼ်းသေသၢၼ်ႇမိၼ်ၶိုၼ်ႈမိူဝ်းတီႈၼိူဝ်မိူင်းၽီးယူႇ မိူဝ်ႈမိူဝ်းထိုင်တီႈၼိူဝ်မိူင်းၽီၼၼ်ႉတႃႇတေၶဝ်ႈၵႂႃႇၸူးမေးၼၢင်းမၼ်း ၼၢင်းထဵပ်ႉထီႇတႃႇၼၼ်ႉ သမ်ႉမီးမႄႈၼမ်ႉ လူင်ၶႅၼ်ႈဝႆႉလႄႈ ႁူဝ်ၵႂၢႆးမၼ်းၼၼ်ႉဢမ်ႇမီးႁႅင်းတႃႇတေပႃးဢဝ်မၼ်းၸၢႆးၶၢမ်ႈၼမ်ႉၵႂႃႇၸူႈမေးၼၢင်းမၼ်းလႆႈ လႄႈ မၼ်းၸၢႆးလႆႈယူႇတီႈၽင်ႇၼမ်ႉၼၼ်ႉသေ ႁွင်ႉႁႃမေးၼၢင်းမၼ်းယူႇ။

ၽွင်းၼၼ်ႉမီးၼူၵ်ႉၵႃဝၢဝ်ႇတူဝ်ၼိုင်ႈဢၼ်မၼ်းၸၢႆးယၢမ်ႈၸွႆႈလိူဝ်ၼၼ်ႉမိၼ်ၵႂႃႇမိၼ်မႃးတီႈမၼ်းၸၢႆးၵမ်းၼိုင်ႈသေႁၢႆၵႂႃႇ ဝၢႆးမႃးၵႅပ်ႉၼိုင်ႈ မီးၽုင်ၼူၵ်ႉ တၢင်းၼမ်တၢင်းလၢႆဢွၼ်ၵၼ်မႃးမိၼ်သေၵွပ်ႈတူဝ်ၵၼ် ႁဵတ်းပဵၼ်ၶူဝ်ၵၢႆႇ ၶၢမ်ႈမႄႈၼမ်ႉၽင်ႇၼိုင်ႈလႄႈၽင်ႇၼိုင်ႈၸူးၵၼ်သေႁႂ်ႈမၼ်းၸၢႆးတႆႇၶၢမ်ႈၵႂႃႇၸူးၵေႃႉပဵၼ်မေးၼၢင်းမၼ်းၼၼ်ႉယူႇ။

လွင်ႈတၢင်းၸိူဝ်းၼႆႉ ၶုၼ်ၽီတၢင်းလၢႆလႄႈၸဝ်ႈၶုၼ်ဢိၼ်းၵေႃႈပၵ်းတႃတူၺ်းသေႁူႉႁၼ်ၸွမ်းတၢင်းမူတ်းယူႇ  ၸဝ်ႈၶုၼ်ဢိၼ်းၼၼ်ႉၵေႃႈၵွပ်ႈပိူဝ်ႈႁၼ်တၢင်းၶတ်းၸႂ်မၼ်းၸၢႆး ႁၼ်လွင်ႈလီမၼ်းၸၢႆး လႄႈ ႁၼ်ထိုင်တၢင်းႁၵ်ႉမၼ်းၸၢႆးဢၼ်မီးတေႃႇၼၢင်းထဵပ်ႉထီႇတႃႇၼၼ်ႉသေ ၸင်ႇယွမ်းပၼ်ႁႂ်ႈၶဝ်သွင်ၵေႃႉၽူဝ်မေး ႁူပ်ႉထူပ်းၵၼ် ၼိုင်ႈ ပီႊ ၼိုင်ႈပွၵ်ႈၼႆယူႇယဝ်ႉ။

ၵွပ်ႈၼၼ်လႄႈ ပီႊမႂ်ႇၶေႇၶဝ်ၼႆႉ ၵိူတ်ႇပဵၼ်မႃး လူၺ်ႈလွင်ႈတၢင်းႁၵ်ႉၼႆသေ ပေႃးပဵၼ်ဝၼးပီႊမႂ်ႇၶေႇၶဝ်ၼႆ ၶဝ်တေ မီးၶူဝ်းတွၼ်ႈ ၶွင်ၽၢၵ်ႇ ငိၼးသူး ငိုၼ်းလၢပ်ႈ ၼႆယဝ်ႉ။