ၵႃလူၼ်ႇ လႄႈ ၼၵ်ႈၵႃး

 

ပိုၼ်းလွင်ႈပဵၼ်မႃးသိုၵ်း သွင် ပီႈၼွင်ႉ ၵႃလူၼ်ႇ လႄႈ ၼၵ်ႈၵႃး

ၸွမ်ႈၼင်ႇၵူၼ်းထဝ်ႈၶဝ်ၶႆႈလဝ်ႈလၢတ်ႈၼေၽွင်ႈ ၸွမ်းၼင်ႇလႆလူဢၢၼ်ႇႁၼ်ၼႂ်လိၵ်ႈလၢႆးၽွင်ႈသေ ၶႃႈႁဝ်း  တေမႃးတႃႉတႆႇၶႆႈၼေပိုၼ်းပဵၼ်မႃး ၼုၵ်ႉၵႃလူၼ်ႇ လႄႈ ၼၵ်ႈၵႃး ႁႂ်ႈဢူၺ်းၵေႃႉဢူၺ်းသေႈႁဝ်းၶဝ်ပေႃးလႆႈ ႁူႉၸွမ်းၵၼ်ၵႂႃႇၶႃႈ ။

ၸွမ်းၼင်ႇပိုၼ်းပဵၼ်မႃးဢၼ်ၸၢဝ်းၶိူဝ်းၵူၼ်းၸိူဝ်းယုမ်ႇယမ်ၼပ်ႉထိုဝ် သႃႇသၼႃႇ ႁိၼ်းတူႇ( ပုင်ႇၼႃး ) ၶဝ်လဝ်ႈလၢတ်ႈၶႆႈၼေဝႆႉတႄႉမီးဝႃႈ >>>

မိူဝ်ႈပၢၼ်သႃႇသၼႃႇပႆႇပေႃႇၼၼ်ႉ မီးၸဝ်ႈရသေးပႃးၼိုင်ႈ မီးၸိုဝ်ႈဝႃႈ ၷသႃယပေႃမုၼိ ပဵၼ်ၸဝ်ႈရသေးဢၼ်မီး တၢင်းၵျႃႉၶႅၼ်ႇတွၼ်းလိူဝ်ပိူၼ်ႈၼႂ်းမိူင်းၵူၼ်းမိူင်းၽီဝႃႈၼႆယဝ်ႉ ၊ မၼ်းၸဝ်ႈၽၢၼ်ႇသၢင်ႈပၼ် လၢၵ်ႈၼၢၵ်ႈၶိူင်ႈယိပ်းၶုၼ်ၽီ ၶုၼ်သၢင် လႄႈ ၽၢၼ်ႇသၢင်ႈၶုၼ်ၽီၶုၼ်သၢင်လၢႆလၢႆၸဝ်ႈဝႃႈၼင်ႇၼႆ။

ၸဝ်ႈရသေး ၷသႃယပေႃမုၼိ ၼႆႉမီးမေးၼၢင်းတၢင်းၼမ်တၢင်းလၢႆလႄႈ ၼႂ်းၵႃႈမေးၼၢင်းမၼ်းၸဝ်ႈတၢင်းမူတ်းၼၼ်ႉ မီး ႒ ၵေႃႉ ပဵၼ်ပီႈၼွင်ႉၵၼ် မီးၸိုဝ်ႈဝႃႈ ဝိၼ်းတႃး လႄႈ ၵၼ်ႇထရု ၊ ၶႃ ႒ ၵေႃႉပီႈၼွင်ႉၼႆႉပဵၼ်ၵေႃႉဢၼ်ၸဝ်ႈရသေး ႁၵ်ႉလိူဝ်သေမေးၼၢင်းမၼ်းတၢင်းမူတ်းလႄႈ ၸဝ်ႈရသေး ၷသႃယပေႃမုၼိ ၸင်ႇပၼ်ၽွၼ်းတီႈမေးၼၢင်းမၼ်း ႒ ၵေႃႉပီႈၼွင်ႉၼၼ်ႉ ၼိုင်ႉၵေႃႉ ၼိုင်ႈၶေႃႈ ၶႂ်ႈလႆႈသင်ၵေႃႈ ယွၼ်းသူးဢဝ်တီႈမၼ်းၸဝ်ႈဝႃႈၼႆယဝ်ႉ။

မေးၼၢင်းမၼ်းၸဝ်ႈတၢင်း ႒ ၵေႃႈယွၼ်းသူးႁႂ်ႈမီးလုၵ်ႈၸွမ်းမၼ်းၸဝ်ႈမိူၼ်ၵၼ် ၊ ၵေႃႉပဵၼ်ၼၢင်းၵၼ်ႇထရု ၵေႃႉၼွင်ႉၼၼ်ႉ ယွၼ်းသူးႁႂ်မီးလုၵ်ႈၼမ်ၼမ်သေႁႂ်ႈမီးလွင်ႈၵျႃႉၶႅၼ်ၵူႈလွင်ႈၼႆသေ ဝၢႆးလိုၼ်းမႃးၵေႃႈမၼ်းၼၢင်းမီးလုၵ်ႈပဵၼ်ၶႆႇ1000 ၼိုင်ႈႁဵင်လုၵ်ႈသေဝၢႆးမႃး 500 ပီႊၶႆႇၼၼ်ႇတႅၵ်ႇဢွၵ်ႇပဵၼ်ၼၵ်ႈၵႃး 1000 ၼိုင်ႈႁဵင်တူဝ်ၼႆသေယူႇသဝ်းတႂ်ႈၼမ်ႉသမ်ႇမုၵ်ႉတြႃႇယူႇယဝ်ႉ။

ၼၢင်းဝိၼ်းတႃးၵေႃႉပဵၼ်ပီႈၼၼ်ႉတႄႉယွၼ်းႁႂ်ႈမီးလုၵ်ႈသွင်ၵေႃႉယွၼ်းႁႂ်ႈလုၵ်ႈမၼ်းၼၢင်းမီးဢႃႇၼႃႇ မီးဢဵၼ်ႁႅင်း မီးတၢင်းၵျႃႉၶႅၼ်လိူဝ်သေလုၵ်ႈၼၢင်းၵၼ်ႇထရု ၼႆသေ ဝၢႆးမႃးၵေႃႈမၼ်းၼၢင်းၵိူတ်ႇလုၵ်ႈပဵၼ်ၶႆႇဢွၵ်ႇမႃးသွင်လုၵ်ႈၼႆယဝ်ႉ။

ယူႇမႃးႁိုင်ထိုင် 500 ႁႃႈပၢၵ်ႇပီႊ ၵေႃႉလုၵ်ႈမၼ်းဢမ်ႇပႆႇတႅၵ်ႇဢွၵ်ႇၶႆႇလႄႈ မၼ်းၼၢင်းၶႂ်ႈႁၼ်ၼႃႈလုၵ်ႈမၼ်းၼႃႇသေယိုၼ်ႉဢမ်ႇလႆႈလႄႈမၼ်းၼၢင်းၸင်ႇထုပ်ႉတွႆႇၶႆႇလုၵ်ႈမၼ်းၼၢင်းလုၵ်ႈၼိုင်ႈၵွႆသေ လႆႈႁၼ်လုၵ်ႈမၼ်းမီးၽၢင်ႁၢင်ႈဢမ်ႇတဵမ်ထူၼ်ႈၶိုင်ႈတူဝ်သေလႆႈၸိုဝ်ႈႁွင်ႉဝႃႈ ဢရုၼ်း ၼႆယဝ်ႉ။

ၸဝ်ႈဢရုၼ်းၼႆႉၵွပ်ႈဢမ်ႇပႆႇထိုင်ၶၢဝ်းယၢမ်းတႅၵ်ႇဢွၵ်ႇၶႆႇလႄႈ မႄႈမၼ်းၸဝ်ႈလႆႈတွႆႇၶႆႇၵွႆႁႂ်ႈမၼ်းၸဝ်ႈဢွၵ်ႇမႃးဢွၼ်တၢင်း ႁဵတ်းႁႂ်ဢဵၼ်ႁႅင်းမၼ်းဢမ်ႇပႆတဵမ်တူဝ် တၢင်းၵျႃႉၶႅၼ်ႇမၼ်းၵေႃႈပႆႇတဵမ်ထူၼ်ႈလႄႈႁဵတ်းႁႂ်မၼ်းၸႂ်လမ်တေႃႇၵေႃႉပဵၼ်မေႈမၼ်းတေႉတေႉသေ မၼ်းၸင်ႇၵိၼ်ႇႁႂ်ႈၵေႃႉပဵၼ်မႄႈမၼ်း လႆႈပဵၼ်ၶီႈၶႃႈ ၼွင်ႉယိင်းမၼ်း ၵၼ်ႇထရု လႄႈ လၢၼ်မၼ်းၸိူဝ်းပဵၼ်ၼၵ်ႈၵႃးၼၼ်ႉတၢင်းသဵင်ႈၼႆသေ ႁႂ်ႈၵေႃႉပဵၼ်လုၵ်ႈၵေႃႉထီႉသွင်ဢၼ်တိုၵ်ႉပဵၼ်ၶႆႇယူႇၼၼ်ႉပဵၼ်ၵူၼ်းၵေႃႉမႃးၸွႆႈႁႂ်ႈပူၼ်ႉလွတ်ႈပဵၼ်ၶႃႈၸႂ်ႉ ၼႆသေမိၼ်ၶိုၼ်ႈမိူဝ်းယူႇၸွမ်းၶုၼ်ဝၼ်းၸဝ်ႈသူႇရိယ ၼၼ်ႉယူႇယဝ်ႉ။

ၼၢင်းဝိၼ်းတႃးၵေႃႈဢမ်ႇႁတ်းထုပ်ႉၵွႆၶႆႇလုၵ်ႈမၼ်းဢၼ်တိုၵ်ႉၵိုတ်းဝႆႉၼၼ်ႉသေပႂ်ႉႁႂ်ႈၶႆႇၼၼ်ႉတႅၵ်ႇႁင်းၵူၺ်းမၼ်းမိူဝ်ႈထိုင်ၶၢဝ်းယၢမ်းမၼ်းၼႆႉယဝ်ႉ၊ မိူဝ်ႈၽွင်းၼၼ်ႉၵေႃႉပဵၼ်ၼၢင်းဝဵၼ်းတႃးလႄႈၼၢင်းၵၼ်ႇထရု လႆႈတႃႉၵၼ်လွင်ႈသီမႃႉၶွင်ၸဝ်ႈၶုၼ်ဢိၼ်းၼၼ်ႉဝႃႈ သီမႃႉၶွင်ၸဝ်ႈၶုၼ်ဢိၼ်းၼၼ်ႉပဵၼ်သီၶၢဝ် ႁိုဝ် သီလမ်ၼႆသေၽႂ်တၵ်ႉၽိတ်းၵေႃႈၵေႃႉၼၼ်ႉတေလႆႈပဵၼ်ၶႃႈၸႂ်ႉၵၼ်တႃႇႁႃႈပၢၵ်ႇပီႊၼႆသေ ၼၢင်းဝိၼ်းတႃးတၵ်ႉဝႃႈပဵၼ်သီၶၢဝ် ၼၢင်းၵၼ်ႇထရု တၵ်ႉဝႃႈပဵၼ်သီလမ်ၼႆသေ ၵေႃႉပဵၼ်ၼၢင်းဝိၼ်းတႃးၼၼ်ႉတၵ်ႉမၢၼ်ႇမႅၼ်ႈယူႇသေတႃႉ ၼၢင်းၵၼ်ႇထရုၵေႃႉပဵၼ်ၼွင်ႉၼၼ်ႉၸႂ်ႉလၢႆးလိင်ႇလႅၼ်သေၸႂ်ႉႁႂ်ႈလုၵ်ႈမၼ်း ဢၼ်ပဵၼ်ၼၵ်ႈၵႃးၼၼ်ႉၽၢၼ်ႇသၢင်းပဵၼ်ၶုၼ်သီလမ်သေၸိမ်သႅမ်းၸွမ်းတူဝ်မႃႉၼၼ်ႉႁႂ်ႈပဵၼ်သီလမ်သေ ၵေႃႉပဵၼ်ၼၢင်းဝိၼ်းတႃး ၼၼ်ႉဢမ်ႇႁူႉလၢႆးလိင်ႇလႅၼ်ၼွင်ႉယိင်းမၼ်းလႄႈလႆႈယွမ်းသုမ်းသေယွမ်းပဵၼ်ၶႃႈၸႂ်ႉၼၢင်းၵၼ်ႇထရုႉၵေႃႉပဵၼ်ၼွင်ႉၼၼ်ႉႁႃႈပၢၵ်ႇပီႊယူႇယဝ်ႉ။

မိူဝ်ႈထိုင်ၶၢဝ်းယၢမ်း ၼိုင်ႈႁဵင်ပီႊတဵမ်ၼၼ်ႉၶႆႇလုၵ်ႈထီႉသွင် ၼၼ်ႉၵေႃႈတႅၵ်ႇဢွၵ်ႇမႃးသေပဵၼ်ၼူၵ်ႉၵႃလူၼ်ႇၶိုင်ႈၵူၼ်းၶိုင်ႈၼူၵ်ႉသေယိုတ်ႈယႂ်ႇပေႃးပဵင်းၾႃႉပဵင်းမွၵ်ႇၼႆယဝ်ႉ ၊ ၸဝ်ႈၵႃလူၼ်ႇၼၼ်ႉလႆႈၸိုဝ်ႈဝႃႈ ဝိၼ်းတၺ်း ၼႆယဝ်ႉ ၊ မိူဝ်ႈၸဝ်ႈဝိၼ်ႈတၺ်း လႆႈႁူႉဝႃႈ ၵေႃႉပဵၼ်မေႈမၼ်းလႆႈၵႂႃႇပဵၼ်ၶႃႈၸႂ်ႉၼွင်ႉယိင်းမၼ်းဢၼ်ပဵၼ်ပီႈၼွင်ႉၵၼ်ၼၼ်ႉသေမၼ်းၸင်ႇႁႃတၢင်းၸွႆႈလိူဝ်ၵေႃႉပဵၼ်မေႈမၼ်းယူႇ။

မိူဝ်ႈၸဝ်ႈၵႃလူၼ်ႇဝိၼ်းတၺ်းၵႂႃႇတုၵ်းယွၼ်းၼႃႉမၼ်းႁႂ်ႈပွႆႇပၼ်မေႈမၼ်းၼၼ်ႉ ၵေႃႉပဵၼ်ၼႃႉမၼ်းလႄႈလၢၼ်မၼ်းဢၼ်ပဵၼ်ၼၵ်ႈၵႃး လုၵ်ႈပီႈလုၵ်ႈၼွင်ႉၵၼ်တၢင်းမၼ်းၼၼ်ႉတွပ်ႇလၢတ်ႈဝႃႈ ပေႃးၶႂ်ႈႁႂ်ႈပွႆႇပၼ်ၵေႃႈႁႂ်ႈမိူဝ်းဢဝ် ၼမ်ႉဢမႃရိတ်း တီႈမိူင်းသၢင်ၼၼ်ႉမေႃးပၼ်ၶဝ် ၶဝ်ၸင်ႇတေပွႆႇပၼ်ၼႆသေ ၸဝ်ႈၵႃလူၼ်ႇ ဝိၼ်းတၺ်း ၼၼ်ႉၵေႃႈႁပ်ႉထွမ်ႇဢဝ်သေတေမိူဝ်းဢဝ်ၼမ်ႉဢမႃရိတ်းၼီႈမိူင်းသၢင်ၼၼ်ႉမႃးပၼ်ၼႆယဝ်ႉ။

တႃႇတေမိူဝ်းဢဝ်လႆႈၼမ်ႉဢမႃရိတ်းတီႈၼိူဝ်မိူင်းသၢင်ၼၼ်ႉတေလႆႈၸႂ်ႉဢဵၼ်ႁႅင်းတၢင်းၼမ်လႄႈ မၼ်းၸင်ႇႁႃၵိၼ်ယိူဝ်ႇႁႂ်ႈဢိမ်ႇတွင်ႉဢိမ်ႇသႆႈသေၸင်ႇၵွႆႈၵႂႃႇၼႆယဝ်ႉ၊ မိူဝ်ႈၸဝ်ႈဝိၼ်းတၺ်း တေမိူဝ်းဢဝ်ၼမ်ႉ ဢမႃရိတ်း တီႈၼိူဝ်မိူင်းသၢင်ၼၼ်ႉ မၼ်းလႆႈမိူဝ်းယွၼ်းသူးတီႈမေႈမၼ်းသေၵေႃႉပဵၼ်မေႈမၼ်းၸင်ႇသင်ႇလၢတ်ႈဝႃႈမိူဝ်ႈတိုၵ်ႉတူၵ်းပွတ်းတၢင်းၼၼ်ႉသင်ဝႃႈတွင်ႉမႆႈၼႆႁႂ်ႈၵိၼ်လႆႈ ၵူၼ်းပႃႇ ၵူၼ်းꩪိူၼ်ႇၵူၺ်း တေဢမ်ႇလႆႈႁဵတ်းႁၢႆႉတေႃႇပုင်ႇၼႃး ဝႃႈၼႆ ၸဝ်ႈၵႃလူၼ်ႇဝိၼ်းတၺ်း ၵေႃႉတွင်ႉဝႆႉႁဵတ်းၸွမ်းၼႆယဝ်ႉ။

မိူဝ်ႈၵႂႃႇဢမ်ႇႁိုင် ၸဝ်ႈၵႃလူၼ်ႇၼၼ်ႉၵေႃႈတွင်ႉမႆႈသႆႈလိူတ်ႈလႄႈ မၼ်းၸင်ႇၵႂႃႇတီႉၺွပ်းၵိၼ်တဝ်ႇလႄႈၸၢင်ႉၼႆယဝ်ႉ ၊ ၸၢင်ႉလႄႈတဝ်ႇသွင်တူဝ်ၼႆႉၵေႃႈဢမ်ႇၸႂ်ႈတဝ်ႇလႄႈၸၢင်ႉꩪမ်ႇမတႃႇ ၶဝ်ပဵၼ်ၶုၼ်သူင် ပဵၼ်ပီႈၼွင်ႉၵၼ် ယွၼ်ႉႁိမ်ၸိင်းၶူဝ်းၶွင်ၵၼ် ၽႂ်ဢမ်ႉယွမ်းၽႂ်သေၶဝ်ၸင်ႇၵိၼ်ႇၵၼ်ႁႂ်ႈပဵၼ်တဝ်ႇပဵၼ်ၸၢင်ႉၼႆယဝ်ႉ။

ၸဝ်ႈၵႃလူၼ်ႇၼၼ်ႉၵေႃႈၺွပ်းဢဝ်ၶႃတၢင်းသွင်သေမိၼ်ၶိုၼ်ႈမိူဝ်းၵိၼ်ၼိူဝ်ၵိင်ႇတူၼ်ႈမႆႉႁႆးလူင်ဢၼ်မီးၵိင်ႇယႂ်ႇယၢဝ်းꩪိုင်ၼိုင်ႈပၢၵ်ႇ ယူဝ်ႇၸၼႃႇ ၵိင်ႇမႆႉႁႆးလူင်ၼၼ်ႉၵေႃႈဢမ်ႇႁပ်ႉၼမ်ႉၼၵ်းလႆႈသေၵၢၼ်ႉတူၵ်းလိၼ်ယဝ်ႉ ၽွင်းၼၼ်ႉ ၸဝ်ႈၵႃလူၼ်ႇ ဝိၼ်းတၺ်းၼၼ်ႉသမ်ႉႁၼ်မႅၼ်ႈၸဝ်ႈရသေးၶႅၼ်ႉ(ၽၢလ်းၶျီယ) ၸွမ်းမႆႉႁႆးၼၼ်ႉလႄႈမၼ်းၸင်ႇဢဝ်တိၼ်မၼ်းၺိပ်ႈသေဢဝ်မိူဝ်းပွႆႇဝႆႉတီႈလွႆႁီႇမၵုတ်ႇၼၼ်ႉယဝ်ႉ။

ၸဝ်ႈရသေးၶႅၼ်ႉၸိူဝ်းၼၼ်ႉၵေႃႈႁူႉဝႃႈၸဝ်ႈၼူၵ်ႉဝိၼ်းတၺ်းၼႆႉပဵၼ်ၼူၵ်ႉဢၼ်မီးၼမ်ႉၸႂ်လီ ၼႆသေၸင်ႇပၼ်ၸိုဝ်ႈဝႃႈ ၶရုထ်း ၼႆယဝ်ႉ၊ ပွင်ႇဝႃႈၽူႈႁၢပ်ႇဢဝ်ပုၼ်ႈပၢင်ႈ ၽူႈၶၢမ်ႇယၢပ်ႇ ၼႆသေ ပၼ်ၽွၼ်းတီႈၸဝ်ႈၼူၵ်ႉဝိၼ်းတၺ်း ၵႃလူၼ်ႇ ၶရုထ်း ၼၼ်ႉႁႂ်မီးဢဵၼ်ႁႅင်းၶိူင်ႇၶမ်ႉဢမ်ႇမီးၽႂ်တေႃႇသူႈလႆႈ ႁႂ်ႈမီးဢူၽုင်းတိူဝ်းတွၼ်းလိူဝ်ၽီသၢင်တၢင်းလၢႆၼႆယဝ်ႉ။

ၵမ်းၼၼ်ႉၸဝ်ႈ ၶရထ်း ၵေႃႈၼႅတ်ႈမိၼ်ၶိုၼ်ႈမိူဝ်းမိူင်းသၢင်မိူဝ်းဢဝ်ၼမ်ႉ ဢမေႃရိတ်း ၼၼ်ႉယူႇ မိူဝ်ႈမိူဝ်းထိုင်မိူင်းသၢင်တေဢဝ်ၼမ်ႉဢမႃရိတ်းၼၼ်ႉ သမ်ႉမိူဝ်းၺႃးသႂ်ႇၸဝ်ႈၶုၼ်ဢိၼ်းလႄႈ ၸဝ်ႈၶုၼ်ဢိၼ်း ၼၼ်ႉဢမ်ႇယွမ်းပၼ်လႃးလႃး ၶဝ်တၢင်းသွင်ၸင်ႇမီးလွွင်ႈတေႃႇသူႈၵၼ် သူႈၵၼ်ၵႂႃႇ သူႈၵၼ်မႃး ၸဝ်ႈၶုၼ်ဢိၼ်ဢဝ်လၢပ်ႇသၢႆၾႃႉၽၼ်းလၢႆၵမ်းၵေႃႈ ၸဝ်ႈၶရုထ်း ဢမ်ႇပဵၼ်သင် ယၢမ်းၼၼ်ႉၸဝ်ႈၶုၼ် ဢိၼ်းၵေႃႈႁူႉဝႃႈသူႈၸဝ်ႈၶရုထ်းဢမ်ႇလႆႈယဝ်ႉၼႆလႄႈ ၸဝ်ႈၶရုတ်းၼၼ်ႉၵွပ်ႈပဵၼ်ၽူႈမီးၼမ်ႉၸႂ်လႄႈ ၼင်ႇႁိုဝ်ၶုၼ်ဢိၼ်းတေဢမ်ႇလႆႈၼႃႈလဵၵ်ႉယွၼ်ႉတေႃႇသူႈဢမ်ႇပေႉလႆႈၼႆလႄႈ ၸင်ႇသၼ်ႇႁႂ်ႈၶူၼ်မၼ်းႁူင်ႈ ၼိုင်ႈသဵၼ်ႈၼႆယဝ်ႉ။

တႃႇတေဢဝ်ၼမ်ႉဢမႃရိတ်းၼၼ်ႉၵေႃႈဢမ်ႇၸႂ်ႈလွင်ႈငၢႆႈ ၵွပ်ႈလွင်ႈတၢင်းမၼ်းႁွတ်ႈထိုင်ၵႂႃႇတီႈၸဝ်ႈၾႃႉၼရၢႆး ၸဝ်ႈၾႃႉၼရၢႆးၵေႃႈလႆႈမႃးဢုပ်ႇဢူဝ်းၸွမ်းၸဝ်ႈၶရုထ်း ၸဝ်ႈၾႃႉၼရၢႆးၵေႃႈႁူႉယူႇယဝ်ႉဝႃႈ ၸဝ်ႈၶရုထ်းဢမ်ႇလႆႈဢဝ်ၼမ်ႉဢမရိတ်းၼႆႉမိူဝ်းၵိၼ်ႁင်းၵူၺ်း မၼ်းၵူၺ်းၶႂ်ႈဢဝ်ၼမ်ႉဢမႃရိတ်းၼႆႉမိူဝ်းၸွႆႈလိူဝ်ၵေႃႉပဵၼ်မႄႈမၼ်းၼႆလႄႈ ၸဝ်ႈၾႃႉၼရၢႆးၸင်ႇပၼ်ၶႂၢင်ႉႁႂ်ႈၸဝ်ႈၶရုထ်း ဢဝ်ၼမ်ႉဢမႃရိတ်းၼၼ်ႉမိူဝ်းၸွႆႈလိူဝ်ၵေႃႉပဵၼ်မႄႈမၼ်းလႆႈသေဢမ်ႇၵႃး ၸဝ်ႈၾႃႉၼရၢႆးယင်းပၼ်ၽွၼ်းၸဝ်ႈၶရုထ်းဝႃႈ သမ်ႉဝႃႈၸဝ်ႈၶရုထ်းဢမ်ႇလႆႈၵိၼ်ၼမ်ႉဢမႃရိတ်းၼႆႉၵေႃႈႁႂ်ႈလႆႈႁပ်ႉလွင်ႈၵျႃႉၶႅၼ်ႇမိူၼ်လႆႈၵိၼ်ၼမ်ႉဢမႃရိတ်းၼႆႉဝႃႈၼႆယဝ်ႉ။

လႄႈၸဝ်ႈၶရုတ်းၵေႃႈတွပ်ႇတႅၼ်းၸဝ်ႈၾႃႉၼရၢႆးလူၺ်ႈယွမ်းပဵၼ်တီႈၼင်ႈႁႂ်ႈၸဝ်ႈႁႂ်ႈၸဝ်ႈၾႃႉၼရၢႆးၶီႇၼိူဝ်ႇလင်ၵႂႃႇလႃႈၵူႈတီႈ လႄႈၸဝ်ႈၶရုတ်းၸင်ႇမီးထႅင်ႈၸိုဝ်ႈၼိုင်ႈဝႃႈ သူႈပလ် ၼႆယဝ်ႉ။

ၸဝ်ႈၾႃႉၼရၢႆးၵေႃႈၵမ်ၵိတ်းႁႂ်ႈၸဝ်ႈၶရုတ်းႁိပ်ႈၼႅတ်ႈဢဝ်ၼမ်ႉဢမႃရိတ်းမိူဝ်းပၼ် ၼၵ်ႈၵႃးၸိူဝ်းၼၼ်ႉသေယႃႈႁႂ်ႈၼၵ်ႈၵႃးၶဝ်တၼ်းလႆႈၵိၼ်ၼမ်ႉဢမႃရိတ်း ပေႃးဝႃႈၸဝ်ႈၶရုတ်းဢဝ်ၼမ်ႉဢမႃရိတ်းမိူဝ်းဢၢပ်ႈပၼ်တီႈ ၼၵ်ႈၵႃးၶဝ်ယဝ်ႉ ၸုမ်းၼၵ်ႈၵႃးၶဝ်ပွႃႇပၼ်မႄႈမၼ်းယဝ်ႉႁႂ်ႈၶိုၼ်းႁိမ်ဢဝ်ၼမ်ႉဢမႃရိတ်းၶိုၼ်းဝႆႈဝႆးသေဢဝ်ၼမ်ႉဢမႃရိတ်းၼၼ်ႉသူင်ႇၶိုၼ်းဝႃႈၼႆယဝ်ႉ။

ၵူၺ်းၵႃႈၸဝ်ႈၶရုတ်းၼၼ်ႉဢမ်ႇႁပ်ႉပၢၵ်ႇႁဵတ်းၸွမ်း ၵွပ်ႈၸဝ်ႈၶရုတ်းၼၼ်ႉပဵၼ်ၵူၼ်းမီးၵတိသတ်ႇၸႃႇလႄႈတေဢဝ်ဢုမ်ၼမ်ႉဢမႃရိတ်းၼၼ်ႉမိူဝ်းတမ်းဢၢပ်ႈပၼ်တေႃႇၼႃႈတေႃႇတႃၸုမ်းၼၵ်ႈၵႃးၶဝ်ႁႂ်ႈလႆႈႁူႉႁၼ်ၸွမ်းတၢင်းမူတ်း ပေႃးဝႃႈၸဝ်ႈၶရုတ်းလႆႈဢဝ်ၼမ်ႉဢမႃရိတ်းမိူဝ်းတမ်းဢၢပ်ႈပၼ်ၼႂ်းမိုဝ်းၽူႈပဵၼ်ၼႃႉမၼ်းလႄႈၼၵ်ႈၵႃးၶဝ်ႁူႉႁၼ်မူတ်းယဝ်ႉၵေႃႈ မႄႈမၼ်းပူၼ်ႉလွတ်ႈၶေႃႈၵႂၢမ်းဢၼ်လႆႈၶၢမ်ႇၵိၼ်ႇဝႆႉၼၼ်ႉယဝ်ႉၼႆလႄႈ ၸဝ်ႈၶုၼ်ဢိၼ်းၸင်ႇသင်ႇႁႂ်ႈၶုၼ်ၽီၶဝ်ၸွမ်းၸဝ်ႈၶရုတ်းမိူဝ်းပႂ်ႉၸၢၵ်ႈဢဝ်ဢုမ်ၼမ်ႉဢမရိတ်းၼၼ်ႉၶိုၼ်းယူႇယဝ်ႉ။

ပေႃးဝႃႈၸဝ်ႈၶရုတ်းဢဝ်ၼမ်ႉဢမႃရိတ်းမိူဝ်းတမ်းဢၢပ်ႈပၼ်မူႇၼၢၵ်ႈတၢင်းလၢႆလႆႈႁူႉၵၼ်မူတ်းယဝ်ႉ တီႈဢၼ်တေဢမ်ဢုမ်ၼမ်ႉဢမႃရိတ်းတမ်းဝၢင်းဝႆႉၼၼ်ႉ ၸဝ်ႈၼၢၵ်ႈၵႃးၶဝ်လႆႈႁၢင်ႈႁႅၼ်းဝႆႉသေဢဝ်ယႃႈၶႃးသိူဝ်ႇဝႆႉၵွၼ်ႇၼႃႈၼၼ်ႉဝႆႉယဝ်ႉ လႄႈၸဝ်ႈၶရုတ်းၵေႃႈလႆႈဢဝ်ဢုမ်ၼမ်ႉဢမႃရိတ်းၼၼ်ႉတမ်းဝၢင်းဝႆႉပၼ်ၸုမ်းၼၢၵ်ႈၶဝ်ၼိူဝ်ယႃႈၶႃးၼၼ်ႉယဝ်ႉ။

ၸုမ်းၼၢၵ်ႈၶဝ်ၵေႃႈပေႃးဝႃႈလႆႈႁပ်ႉၼမ်ႉဢမႃရိတ်းယဝ်ႉၼႅတ််ႈဢွၼ်ၵၼ်ၵႂႃႇဢၢပ်ႇၼမ်ႇသုၵ်ႈသီတူဝ်ႁႂ်ႈၸိုၼ်ႈမူတ်းသႂ်သေၸွင်ႇဢွၼ်ၵၼ်ၵိၼ်ၼမ်ႉဢမႃရိတ်းၼႆသေၽွင်းၼၼ်ႉၶုၼ်ၽီၶဝ်ၶိုၼ်းမႃးၸၢၵ်ႈဢဝ်ဢုမ်ၼမ်ႉဢမႃရိတ်းၼၼ်ႉမိူဝ်းၶိုၼ်ႈမိူင်းသၢင်ၶိုၼ်းယူႇယဝ်ႉ။

ၽွင်ႈမိူဝ်ႈၸုမ်းၼၢၵ်ႈၶဝ်ဢၢင်ႈမႃးၵိၼ်ၼမ်ႉဢမႃရီတ်းၼၼ် ဢမ်ႇႁၼ်ဢုမ်ၼမ်ႉၼမ်ႉဢမႃရိတ်းယဝ်ႉလႄႈ တေႃႉတေႉမီးဢၼ်ၽူင်ႉႁေႈဝႆႉၸွမ်းယႃႈၶႃးၼၼ်ႉဢိတ်းဢွတ်းၵူၺ်းလႄႈ ၶဝ်ၸင်ႇဢွွၼ်ၵၼ်လေးၵိၼ်ၼမ်ႉဢမႃရိတ်းဢၼ်ႁေႈဝႆႉၼၼ်ႉသေႁဵတ်းႁႂ်ႈၶႃးမၢတ်ႇလိၼ်ႉၸုမ်းၼၢၵ်ႈၶဝ်လႄႈႁဵတ်းႁႂ်လိၼ်ႉ ငူး လိၼ်ႉၼၢၵ်ႈ လႄႈ လိၼ်ႉလႅၼ်းၶဝ်ပဵၼ်ငႅမ်ႈဝႆႉယူႇတေႃႇထိုင်ပၢၼ်မိူဝ်လဵဝ်ယဝ်ႉ။

ၵပ်ႈၼႆလႄႈငူးၶဝ်ၼႆႉပေႃးဝႃႈဢမ်ႇမီးၽႂ်ဢဝ်တၢႆၼႆ ႁႂ်ႈၶဝ်တၢႆႁင်းၵူၺ်းၶဝ်ၼႆႉဢမ်ႇမီး လႄႈၶဝ်တေလွၵ်ႈၶၢပ်ႈသေမီးသၢႆၸႂ်ၵႂႃႇတိၵ်းတိၵ်းယူႇယဝ်ႉ။

တႃႇတွင်းမၢႆ ။

1.ၸဝ်ႈရသေး ၵႃသယပေႃး

2.မေးၼၢင်း ၼၢင်းဝိၼ်းတႃး + ၼၢင်းၵၼ်ႇထရု သွင်ပီႈၼွင်ႉ

3.လုၵ်ႈၼၢင်း ၵၼ်ႇထရု ပဵၼ်ငူး ၼၵ်ႈၵႃး 1000 တူဝ် ပဵၼ်လုၵ်ႈၼွင်ႉ

4.လုၵ်ႈၼၢင်းဝိၼ်းတႃး ပဵၼ်ၼူၵ်ႉၵႃလူၼ်ႇ 2 တူဝ် ပဵၼ်လုၵ်ႈပီႈ

5.ၶုၼ်ဢိၼ်း

6.ၶုၼ်ၾႃႉ ၼရၢႆး

ၼႂ်းပီႈၼွင်ႉတႆးႁဝ်းၶဝ်ၼႆႉ ၶႃးၼႆႉပဵၼ်ယႃႈယႃလီပႃးၼိုင်ႈသေဢမ်ႇၵႃး ဢဝ်ႁေႉၽိူဝ်ႉႁေႉၽီၵေႃႈလႆႈၼႆယဝ်ႉ။

ၼႂ်းပီႈၼွင်ႉထႆးၶဝ်သမ်ႉ သင်ဝႃႈမီးမိတ်ႉငိုၼ်းဢၼ်မီးႁၢင်ႈၵႃလူၼ်ႇၼႆႉ ဝႆႉၸပ်းတူဝ် ၼႆၽိူဝ်ႉၽီဢမ်ႇႁတ်းၵၢႆၸမ်ၼႆယဝ်ႉ။