ပိုၼ်းၽူႈႁွင်ႉၵႂၢမ်းသဵင်ဝၢၼ် ၼၢင်းၶမ်းၼွင်ႉ

 ႁူပ့်ထူပ်းတွင်ႈထၢမ်မၢၵ်ႇႁူဝ်ၸႂ်လႅၵ်ႈငိုၼ်း ဢမ်ႇၼၼ် သၢႆပိုၼ်းပၢႆးမွၼ်းၼၢင်းၶမ်းၼွင့် ၽူႈႁွင့်ၵႂၢမ်းတႆးၵိၼ်ထူဝ်ႇၼဝ်ႈတႆးယႂ်ႇ

ၸိုဝ်ႈၼၢင်းၶမ်းၼွင့်ၼႆ့ ပဵၼ်ၸိုဝ်ႈမိူဝ်ႈဢွၼ်ႇႁႃႉ?

ဢမ်ႇၸႂ်ႈ။ ၸိုဝ်ႈမိူဝ်ႈဢွၼ်ႇႁွင့် ၼၢင်းဢေၶမ်းဢိူဝ်ႈ။

တႄႇသူၼ်ၸႂ်ၼိူဝ်ပၢႆးမွၼ်းမႃးမိူဝ်ႈလႂ်?

တႄႇသူၼ်ၸႂ်ၼိူဝ်ပၢႆးမွၼ်းမႃး ၸဵမ်မိူဝ်ႈဢွၼ်ႇယဝ့်။ ဢၼ်တႄႇသႂၢင်းၶႅပ်းမႃးၼႆ့တႄ့ မိူဝ်ႈ 1998 ၼၼ့် လႆႈသႂၢင်းၸွမ်း တင်း ၸၢႆးၶႅၼ်ႈတွင့်(လုၵ်ႈပီႈလုၵ်ႈၼွင့်)ႁဝ်း ဢၼ်ပဵၼ်ၸၢႆးယီႊသႃႇ ၶႅပ်းဢၼ် 'မွၵ်ႇ ၵီႊၼိူဝ်သုင်' သေ ဝၢႆးၼႆ့မႃး သမ့်ၶိုၼ်းတႄႇသႂၢင်းမႃးႁင်းၶေႃတႄ့ မိူဝ်ႈ 1999 ၼၼ့် ပဵၼ် 'ႁူဝ်ၸႂ်လႅၵ်ႈငိုၼ်း' ၼႆ့ၶႃႈ။

လွင်ႈသူၼ်ၸႂ် ၼိူဝ်ပၢႆးမွၼ်းႁွင့်ၵႂၢမ်းမႃးၼႆ့ ၽွင်းၼၼ့် တေမီးဢႃႇယူႉၵႃႊႁိုဝ်?

ၽွင်းၼၼ့် တေမီးမွၵ်ႈ 16/17(ပၢၼ်သိၵ့်ႁိၵ့်)ၼၼ့်ယဝ့်ယူဝ့်၊ သူင်ၸႂ်ထွမ်ႇၵႂၢမ်းႁေ ႁွင့်ၵႂၢမ်းႁေ လႆႈသူၼ်ၸႂ်မႃး တေ့တေ့ၼေႃႈ။

ၽွင်းၼၼ့် သူင်ၸႂ်ထွမ်ႇၵႂၢမ်းၽႂ်လၢႆလၢႆ၊ ၽၢႆႇၼွၵ်ႈမိူင်းၼႆ့လူး?

ထွမ်ႇၽဵင်းၵႂၢမ်းၼႆ့တႄ့ ပဵၼ်ၽဵင်း ၸၢႆးသၢႆမၢဝ်း၊ ၸၢႆးထီးသႅင် ၶဝ်ၵမ်ႈၼမ်၊ ၽၢႆႇၼွၵ်ႈမိူင်းၼႆ့တႄ့ ထွမ်ႇၵႂၢမ်းၶႄႇၵမ်ႈၼမ်။

ၽွင်းမိူဝ်ႈပၢၼ်16/17 (ပၢၼ်သိၵ့်ႁိၵ့်)ၼၼ့် ၼႂ်းၸႂ်ၸွင်ႇမီးယိူင်း ဢၢၼ်းဝႆ့ တႃႇပဵၼ်ၽူႈႁွင့်ၵႂၢမ်း?

မီးတႄ့မီးဝႆ့ယူႇ။ မၼ်းတေပဵၼ်ဢမ်ႇပဵၼ်ၼၼ့်တႄ့ ဢမ်ႇႁတ်းဝူၼ့်ၼင်ႇၵဝ်ႇ။ လွင်ႈၶတ်းၸႂ်ၼႆ့တႄ့ ၶတ်းၸႂ်ဝႆ့ၼင်ႇၵဝ်ႇ။ ၶၢဝ်းၼၼ့် ဢဵၼ်းဢၢၼ်းတႃႇသႂၢင်းၶႅပ်းၼႆၵေႃႈ ဢဵၼ်ႁႅင်းႁဝ်း ယင်းပႆႇမီးၼေႃႈ၊ ဝၢႆးၼၼ့် Producer(ၵူၼ်းလူင်းတိုၼ်း)ၵေႃႈ တိတ်းတေႃႇမႃးႁေ လႆႈဢုပ်ႇၺႃးၵၼ်သေ ၸင်ႇပဵၼ်ႁဵတ်းၵႂႃႇ။

ဢၼ်တႄႇၶိုၼ်ႈႁွင့်ၵႂၢမ်းၼိူဝ်ၶဵင်ႇမႃးဢွၼ်တၢင်းၼၼ့် ပဵၼ်ပွၺ်းတီႈလႂ်၊ သမ့်ႁွင့်ၵႂၢမ်းၽႂ်၊ ၽွင်းၼၼ့် ၼႂ်းၸႂ်ပဵၼ်ႁိုဝ်ဝႆ့?

ပဵၼ်ပွၺ်းသၢဝ်းသၢမ် ဝဵင်းၼမ့်ၶမ်းၼၼ့်ၼေႃႈ။ ၶၢဝ်းၼၼ့်ၵေႃႈ ႁဝ်းပေႃးဢွၵ်ႇၶႅပ်းၼိူင်ႈယဝ့်။ မိူဝ်ႈတႄႇႁွင့်ၼၼ့် ၸႂ်သၼ်ႇဝႆ့ၼင်ႇၵဝ်ႇၼေႃႈ၊ ႁဝ်းၵေႃႈဢမ်ႇယၢမ်ႈႁွင့်မႃးသေပွၵ်ႈ ႁွင့်ဢဝ်တိၼ်သိၼ်ႈသၼ်ႇ၊ ႁွင့်ပေႃးလိုမ်းၵႂၢမ်း ႁူဝ်ႁူဝ်ႁၢင်ႁၢင် ၼင်ႇၵဝ်ႇ။

ပဵၼ်ၽႂ် ၸုင်ၸၼ်ၶဝ်ႈမႃးၼႂ်းၶႂၢင်ႇပၢႆးမွၼ်း?

လႆႈဝႃႈ ၸၢႆးၶႅၼ်ႈတွင့်(လုၵ်ႈပီႈလုၵ်ႈၼွင့်)ႁဝ်း ၸၢႆးယီႊသႃႇ ၼႆ့ယဝ့်ၼေႃႈ။ မၼ်းဢွၼ်ႁဝ်းသႂၢင်းၶႅပ်းၵႂၢမ်းမႃးဢွၼ်တၢင်းသေ ၶႅပ်းၼႆ့ၵေႃႈ ၽႅဝ်ၵႂႃႇတီႈၵႆၵႆႁေ ၸိူဝ်းပိူၼ်ႈထွမ်ႇမႅၼ်ႈယဝ့်ၵေႃႈ ၸိူဝ်း Producer ၸင်ႇ ၶိုၼ်းမႃးႁွင့်ႁဝ်းၼေႃႈ။

လွင်ႈၾၢႆႇႁွင့်ၵႂၢမ်းၼႆ့ ပဵၼ်ၽႂ်ၵေႃႉသွၼ်ပၼ်မႃး?

လွင်ႈၼႆ့တႄ့ ႁဝ်းၶတ်းၸႂ်မႃး ႁင်းၵွၺ်းၵူၺ်းၼင်ႇၵဝ်ႇ၊ တေလႆႈဝႃႈ ႁဝ်းၵေႃႈပႃးဝႃႇသၼႃႇသူင်ၸႂ်​သေ ထွမ်ႇၵႂၢမ်းပိူၼ်ႈၼမ်ၼမ်ႁေ... မိူဝ်ႈၶၢဝ်းၼၼ့် ႁဝ်းၵေႃႈၵွၺ်းႁွင့် Cover song ၵွၺ်းၼင်ႇၵဝ်ႇ၊ ယၢမ်းၼၼ့်ၵေႃႈ ၵွၺ်းသူင် Cover song ၵွၺ်းၼႃႇၼေႃႈ။ ပိူၼ်ႈႁဵတ်းႁိုဝ်ႁွင့်ၵေႃႈ ယိူင်ႈပိူၼ်ႈႁွင့်ၼၼ့်ၼႃႇ၊ ဢၼ်ႁႂ်ႈပေႃးမီး မေႃသွၼ်မၼ်းတေ့တေ့ဝႃႈဝႃႈၵေႃႈ ယင်ႊမီးၼင်ႇၵဝ်ႇ။

ၸဵမ်ၾၢႆႇထွမ်ႇၾၢႆႇႁွင့် သမ့်လႆႈၸႂ် Style(ယၢင်ႇ) ဢၼ်လႂ်?

Style တႄ့ တေလႆႈဝႃႈ Free Style ၵွၺ်းယဝ့်။ သဵင်ႁဝ်းၵေႃႈ လႅပ်ႈၼၼ့်ၼႃႇၼေႃႈ။

မိူဝ်ႈၽႅဝ်ၼိူဝ်သဵၼ်ႈတၢင်းပၢႆးမွၼ်းမႃးၼၼ့် တေဢဝ် Style ဢၼ်လႂ် တေၾင်ဝႆ့တႃႇၸဝ်ႈၵဝ်ႇၼႆ ၸွင်ႇမီးယိူင်းဢၢၼ်းႁိုဝ်?

တႄႇမိူဝ်ႈႁဝ်းၶိုၼ်းမႄးႁဵတ်း Own Tune (သဵင်ႁင်းပၢင်ႈ) သေ ယဝ့် ႁဝ်းၵေႃႈလႆႈလိူၵ်ႈၵႂႃႇ Free Style ၵွၺ်းယဝ့်။ မိူဝ်ႈပူၼ့်မႃးတႄ့ဢမ်ႇႁူႉ ၵွၺ်းႁွင့်မႃးတိၵ်းတိၵ်းယဝ့်။ ဢၼ် Producer လိူၵ်ႈပၼ်ၼၼ့်ၵေႃႈ ႁဝ်းဢမ်ႇႁူႉမဵဝ်းမၼ်းၼႃႇၼေႃႈ... ပိူၼ်ႈလိူၵ်ႈမႃး ႁဝ်းၵျိူၵ်ႈဢမ်ႇၵျိူၵ်ႈၵေႃႈ တိုၼ်းလူဝ်ႇလႆႈႁွင့်တိၵ်းတိၵ်းၼႃႇ၊ ၶၢဝ်းၼၼ့်တႄ့ ပဵၼ် Style သင်ၵေႃႈ ဢမ်ႇႁူႉယဝ့်။

ၶႅပ်းမၢႆၼိူင်ႈၼၼ့် ပဵၼ်ၽႂ်တႅမ်ႈ၊ ၸိုဝ်ႈၶႅပ်း လႄႈ Studio လူး?

ၵေႃႉတႅမ်ႈပၼ်ၵႂၢမ်းၼႆ့ ပဵၼ်ၸၢႆးလၢဝ်သႂ်၊ ၸိုဝ်ႈၶႅပ်းတႄ့ဝႃႈ 'မၢၵ်ႇႁူဝ်ၸႂ်လႅၵ်ႈငိုၼ်း' လႆႈဢတ်းမႃးတီႈ Nor Studio ဝဵင်းၼမ့်ၶမ်း။

တူဝ်ထူပ်း ၼႂ်း Studio လႄႈ ၼိူဝ်ၶဵင်ႇႁွင့်ၵႂၢမ်းၼၼ့် ပိူင်ႈၵၼ်သင် ၼႆ ၶႆႊၼေဢိတ်းၼိူင်ႈ?

ဢၼ်ႁဝ်းႁွင့်ၼႂ်း Studio ၼႆ့ ႁဝ်းၶႂ်ႈႁွင့်ႁဵတ်းႁိုဝ်ၵေႃႈလႆႈ မၼ်းၵေႃႈလွတ်ႈလွတ်ႈလႅဝ်းလႅဝ်း ႁဝ်းၶႂ်ႈမႄးၶိုၼ်းၵေႃႈ မႄလႆႈ၊ မၼ်းဢမ်ႇလူဝ်ႇလႆႈၵူဝ်လႆႈဢၢႆသင်၊ သဵင်ႁဝ်းပဵၼ်ႁိုဝ်၊ ႁဝ်းဢမ်ႇလႆႈၸႂ်ၵေႃႈ မႄးလႆႈ။ ပေႃးဝႃႈ ႁဝ်းၶိုၼ်ႈႁွင့်ၼိူဝ်ႁၢၼ့်ၶဵင်ႇၼႆ့ ၵူဝ်ၵေႃႈ ႁမ်ႈၵူဝ်ပိူၼ်ႈဢိတ်းၼိူင်ႈၼေႃႈ ပေႃးႁဝ်းပႆႇယၢမ်ႈတေ့၊ ယဝ့်ၵေႃႈ သမ့်ၵူဝ်ၽိတ်း၊ ဝၢႆးၼႆ့ၵေႃႈ ပေႃးႁဝ်းႁွင့် မီးတၢင်းယၢမ်ႈၼမ်မႃးၼႆၵေႃႈ ဢမ်ႇလူဝ်ႇၵူဝ်ၼင်ႇၵဝ်ႇ။

လွင်ႈဢတ်းသဵင် ၶႅပ်းၼိူင်ႈလႄႈတင်းၶႅပ်းၼိူင်ႈ ပႅၵ်ႇပိူင်ႈသင်ၵၼ်?

ႁဝ်းဝႃႈ မိူဝ်ႈၶႅပ်းမၢႆၼိူင်ႈလႄႈမၢႆသွင်ၼၼ့်တႄ့ တၢင်းႁူႉလႄႈၾၢႆႇလဵပ်ႈႁဵၼ်းႁဝ်းၵေႃႈ ယင်းပႆႇၼမ်ၼေႃႈ မၼ်းတေပိူင်ႈၵၼ်ႁႅင်းႁႃႉ ဢမ်ႇပိူင်ႈၵၼ်ႁႅင်းႁႃႉၼႆ ႁဝ်းၵေႃႈ လွမ်လႅမ်ထတ်းသၢင်တူၺ်းယူႇ။ ပေႃးဝႃႈ ၽွင်းမိူဝ်ႈၼၼ့်လႄႈမိူဝ်ႈၼႆ့ မႃးၼိူင်းၵၼ်တႄ့ တၢင်းႁူႉတၢင်းႁၼ်ႁဝ်းၵေႃႈတိူဝ်းၼမ်လိူဝ် ၶႅပ်းၼိူင်ႈၶႅပ်းသွင်မႃး ၼင်ႇၵဝ်ႇၼေႃႈ။ ၵူၺ်းၼႃႇ လၢႆးလွင်ႈဝႆ့သဵင်ၸိူဝ်းၼႆ့ လွင်ႈလၢႆးထူၺ်ႈလူမ်း၊ ႁဝ်းတေဢဝ်သဵင်ၶူႈလင်ႊဢွၵ်ႇႁႃႉ ႁဝ်းတေဢဝ်သဵင်ၵူင်ၶေႃးဢွၵ်ႇႁႃႉ၊ ယၢမ်းၼႆ့တႄ့ ႁဝ်းၵေႃႈ မေႃၸႅၵ်ႇၽႄမႃးလီယဝ့်ၼေႃႈ။ မိူဝ်ႈၼၼ့်တႄ့ ၵူၺ်းႁွင့် Cover Song ၼႃႇ မၼ်းသမ့်ႁွင့်ငၢႆႈ မၼ်းၵွၺ်းယိူင်ႈသဵင်ပိူၼ်ႈႁေ ႁွင့်ၵႂႃႇတိၵ်းတိၵ်း။ ယၢမ်းၼၼ့်ၵေႃႈ ႁဝ်းဢမ်ႇပႆႇမေႃဝူၼ့်ၸွမ်းသင်ၼေႃႈ။

ၵႂၢမ်းဢၼ်ဢတ်းဢွၵ်ႇမႃးၼႆ့ ၵမ်ႈၼမ်ပဵၼ် Cover Song ၼေႃႈ ႁၼ်ထိုင်ၼိူဝ် Cover Song ၼႆ့ ပဵၼ်ႁိုဝ်?

မိူဝ်ႈၼၼ့် ၵေႃႉၵေႃႈ ၵေႃႉလဵၵ့်ႁေ ဢမ်ႇပႆႇပေႃးမေႃထတ်းသၢင် လွင်ႈလီလွင်ႈၸႃႉၼႆ၊ ၵွပ်ႈဝႃႈ Producer ႁႂ်ႈႁဵတ်းၼႆၵေႃႈ လႆႈဝႃႈ ႁဵတ်းပဵၼ်ၵႂႃႇၵွၺ်းၼေႃႈ။ ပေႃးထိုင်ၶၢဝ်းၼႆ့ ႁဝ်းမႃးဝူၼ့်တူၺ်းၼႆ ပေႃးဝႃႈတေ့တေ့ၼႆ ႁဝ်းႁွင့် Own Tune ၼႆ့ တိူဝ်းၶႅမ့်လိူဝ်သေ Copy တေ့တေ့။ Own Tune ၼႆ့ ႁဝ်းႁွင့်မိူဝ်ႈလႂ်ၵေႃႈ ဢမ်ႇဢိမ်ႇလႆႈ။ မၼ်းပဵၼ် ဢၼ်မႂ်ႇဝႆ့ယူႇတႃႇသေႇ၊ ၵူၺ်းၼႃႇ ပေႃးႁွင့် သဵင်ပိူၼ်ႈၼႆ ပိူၼ်ႈပေႃးဢွၵ်ႇၵႂႃႇယဝ့်ဢွၼ်တၢင်းယဝ့်ၼႆ မိူၼ်ၼင်ႇဝႃႈ ႁဝ်းသႂၢင်းယဝ့်ဢမ်ႇပႆႇဢွၵ်ႇၼႆ၊ ႁိူဝ်ႇ! ပိူၼ်ႈပေႃးဢွၵ်ႇယဝ့် ... သမ့်ပေႃး(ယူဝ်း)ဢိမ်ႇၵႂႃႇ၊ မၼ်းသမ့်ပဵၼ်မဵဝ်းၼႆၵႂႃႈ။

ၵႂၢမ်းၼွၵ်ႈမိူင်းၸိူဝ်းၼႆ့ သမ့်ၵႆ့ထွမ်ႇၽဵင်းၽႂ်လႂ်။ ဢၼ်လႆႈၸႂ်သေ ပိူၼ်ႈၼၼ့် သမ့်ပဵၼ်ၽႂ်?

ၾၢႆႇဢိင်းၵလဵတ်ႈ ၵူၼ်းၸၢႆးၼႆ့တႄ့ ၵႆ့ထွမ်ႇ Bon Jovi (ပုၼ်ႇၸူဝ်ႇဝီႇ) ၶဝ်ၸိူဝ်းၼႆ့ၵႂႃႈ။ ၾၢႆႇၶႄႇၼႆ့သမ့် တဵင်ႇၼီႇၵျိၼ်ႊ ၶဝ်ၸိူဝ်းၼႆ့သေ ဝၢႆးလၢင်တႄ့ၵေႃႈ ဢမ်ႇပေႃးပဵၼ်ထွမ်ႇယဝ့်။ ထွမ်ႇၵႂၢမ်းႁဝ်းႁေ လဵပ်ႈႁဵၼ်းၵႂၢမ်းႁဝ်းၵေႃႈ ယင်းဢမ်ႇမီးၶၢဝ်းၵႃႊႁိုဝ်၊ ဢိူဝ်း... တၢင်းယူပ်ႈယွမ်းႁဝ်းၼႃႇဢိူဝ်ႈၼေႃႈ။ ပေႃးပဵၼ်လႆႈတႄ့ ႁဝ်းတင်းလူဝ်ႇပၼ်ၶၢဝ်းယၢမ်းမၼ်းႁႂ်ႈၼမ်ၼမ်ဢိူဝ်ႈ။

ဢၼ်ဢတ်းဢွၵ်ႇမႃး တင်းမႅၼ့်(မူတ်း) မီးလၢႆၶႅပ်း၊ သမ့် ထုၵ်ႇၸႂ်ၶႅပ်းလႂ်သေပိူၼ်ႈ၊ ၶႆႊၼေဢိတ်းၼိူင်ႈ? ( # တေႃႇ ပီႊၶရိတ့် 2013 )

ပႃးတင်းၶႅပ်းမၢၼ်ႊၼႆ တေမီး 12 ၶႅပ်း။ ႁႂ်ႈပေႃးဝႃႈ ထုၵ်ႇၸႂ်ႁႅင်း တႄ့ၵေႃႈ ယင်ႊပႆႇၸႂ်ႈၼင်ႇၵဝ်ႇ။ တၢင်းၶတ်းၸႂ်ႁဝ်းၼႆ့ၵေႃႈ ယင်းတေလူဝ်ႇထႅင်ႈတင်းၼမ်ယူႇ၊ ႁႂ်ႈပေႃးဝႃႈၶႅမ့်တေ့တေ့ယဝ့်ၵေႃႈ ဢမ်ႇပႆႇပဵၼ်ၼင်ႇၵဝ်ႇ။ ပေႃးႁူမ်ႈမႃးတင်းမူတ်းၼႆတႄ့ တေလႆႈဝႃႈ 'ၽဵင်းၵႂၢမ်းယႃၸႂ်'၊ ၵွပ်ႈဝႃႈ ႁဝ်းၵေႃႈတိူဝ်းၶတ်းၸႂ်မႃး လိူဝ်ၵဝ်ႇသေ မၼ်းၵေႃႈၶႅမ့်တိူဝ်းလိူဝ်ၵဝ်ႇမႃးတိၵ်းတိၵ်းၼေႃႈ။

တႃႇႁႂ်ႈပိူၼ်ႈပေႃးႁူႉၸၵ်းမၵ်းၸိုဝ်ႈသဵင်ဝႃႈ ၼၢင်းၶမ်းၼွင့်ၵႂႃႇၼၼ့် ထၢင်ႇပဵၼ်ၵႂၢမ်းႁူဝ်လႂ်?

ပဵၼ်ၵႂၢမ်း 'သၢႆၼမ့်သၢမ်သိပ်းသွင်ၶေး' ၼႆ့ၶႃႈဢေႃႈ။

ဢၼ်ဢတ်းဢွၵ်ႇမႃးတင်းမူတ်းၼၼ့် Own Tune လႄႈ Cover Song ပဵၼ်ဢၼ်လႂ်ၼႆ ၶႆႊၼေပၼ်ဢိတ်းၼိူင်ႈ?

တႄႇၶႅပ်းမၢႆ(1) တေႃႇၶႅပ်းမၢႆ(8)ၼႆ့ ပဵၼ် Cover Song ၊ ဢၼ် Own Tune ၼႆ့တႄ့ တႄႇၶႅပ်းမၢႆ(9) ဢၼ်တၢင်ႇၸိုဝ်ႈဝႆ့ဝႃႈ 'သလေႇၼၢင်းယိင်း' မႃးဢေႃႈ။

လွင်ႈႁွင့်ၵႂၢမ်းၼႆ့ လႆႈၾင်ၸႂ်ၸိူင့်ႁိုဝ်သေ ႁွင့်ဢတ်းမႃး၊ ၼႂ်းၸႂ် သမ့်ပဵၼ်ၸိူင့်ႁိုဝ်ဝႆ့ ၶႆႊၼေဢိတ်းၼိူင်ႈ?

ႁဝ်းႁွင့်ၵႂၢမ်းၼိူင်ႈႁူဝ်ၼႆ့တႄ့ၵေႃႈ ႁဝ်းႁဵတ်းႁႂ်ႈမၼ်း မိူၼ်ၼင်ႇ ႁဝ်းလႆႈထုၵ်ႇၺႃးမႅၼ်ႈတေ့တေ့၊ ႁဝ်းပဵၼ်တေ့တေ့ၼၼ့်၊ ပေႃးႁဝ်းဝႆ့ၸႂ်ၾင်ၸႂ်ႁွင့်တေ့တေ့ မၼ်းၸင်ႇမႃးတိူဝ့်ၸႂ်တိူဝ့်ၶေႃးႁဝ်း တေ့တေ့ၼၼ့်ၼေႃႈ... ႁႃးႁႃး...(ၶူဝ်သေ) ဢိင်ၼိူဝ်ႁူဝ်ၶေႃႈမၼ်းၼၼ့်ၼႃႇၼေႃႈ၊ ပေႃးႁူဝ်ၶေႃႈပဵၼ်လွင်ႈတိူဝ့်ၸႂ်ၼႆ့ၵေႃႈ လူဝ်ႇလႆႈဝႆ့ၸႂ်ႁႂ်ႈမၼ်းမိူၼ်တိူဝ့်ၸႂ်၊ ပေႃးဝႃႈႁူဝ်ၶေႃႈမၼ်းသိူဝ်းၸႂ်ၼႆၵေႃႈ ႁဝ်းလူဝ်ႇဝႆ့ႁႂ်ႈမၼ်းမိူၼ်ႁၢင်ႊသိူဝ်းၸႂ်ဝႆ့ၼင်ႇၵဝ်ႇၼႃႇၼေႃႈ။

ၵမ်ႈၼမ် ယၢမ်ႈဢတ်း Studio တီႈလႂ်?

ဢွၼ်တၢင်းၸိူဝ်းၼၼ့် ၵမ်ႈၼမ်မၼ်းတႄ့ ပဵၼ် Studio D  တီႈ တႃႈၵုင်ႈ။ ဝၢႆးလင်ၼႆ့တႄ့ တႄႇၶႅပ်း 'သလေႇၼၢင်းယိင်း' မႃးၼႆ့သေ လႆႈပဵၼ်ဢတ်းတီႈ Top Studio မူႇၸေႊ။ ဢွၼ်တၢင်းတၢင်း 2 ၶႅပ်းတႄ့ ပဵၼ် Nor Studio ၼမ့်ၶမ်း။

လွင်ႈၾၢႆႇဢတ်းၶႅပ်းၼႆ့ တီႈႁဝ်း လႄႈ တီႈတႃႈၵုင်ႈၼၼ့် ပိူင်ႈၵၼ်သင် ၶႆႊၼေဢိတ်းၼိူင်ႈ?

လွင်ႈၾၢႆႇၸၢၵ်ႈၼႆ့ၵေႃႈ ႁဝ်းဢမ်ႇပွင်ႇၸႂ်ၵႃႊႁိုဝ်၊ ၶႅမ့်တႄ့ ၶႅမ့်ၽႂ်ၶႅမ့်မၼ်းယူႇ။ ဢိင်ၼိူဝ် Engineer(ၸၢင်ႊ) မၼ်းၼၼ့်ၼႃႇၼေႃႈ။ ၵၢၼ်ၼိူင်ႈဢၼ်ၼႆ့ ပေႃးၽူႈၶပ်းၶိုင်မၼ်းၶႅမ့်ၼႆၵေႃႈ တေၶႅမ့်ၵႂႃႈ၊ ႁဝ်းၵေႃႈဢမ်ႇပေႃးပွင်ႇၸႂ်ၼင်ႇၵဝ်ႇ ၾၢႆႇလွင်ႈၸၢၵ်ႈၼႆ့။

လွင်ႈလႆႈၵႂႃႇ ႁွင့်မေႃသေႃၵႂၢမ်း တီႈၼွၵ်ႈမိူင်းလႄႈၼႂ်းမိူင်းၼႆ့ မီးလွင်ႈပႅၵ်ႇပိူင်ႈၵၼ်ၸိူင့်ႁိုဝ်?

မိူဝ်ႈႁဝ်းၵႂႃႇႁွင့်တီႈမိူင်းထႆး၊ သိင်ႇၵပူဝ်ႇ ၸိူဝ်းၼႆ့ၵေႃႈ ၽူႈထွမ်ႇပၼ်ႁႅင်းႁဝ်းၵေႃႈ တေႃႈပဵၼ်ၵူၼ်းတၢင်းႁဝ်းၼင်ႇၵဝ်ႇ။ ပီႈၼွင့်တႆး ၵႂႃႇႁဵတ်းၵၢၼ်ၼွၵ်ႈမိူင်းၼၼ့်ၼႃႇၼေႃႈ၊ ၵူၺ်းၼႃႇ ၶဝ်သမ့် ႁဵတ်းၵၢၼ်တင်းဝၼ်းတင်းဝၼ်း၊ ၶၢဝ်းမီးပွၺ်းလၢမ်းတႄ့ၵေႃႈ ပဵၼ်မၢင်ႊပွၵ်ႈမၢင်ႊလႂ်ၵူၺ်းၼႃႇ လွင်ႈသူၼ်ၸႂ်ၶဝ်တႄ့ တိူဝ်းၼမ်သေတၢင်းႁဝ်း၊ လွင်ႈပၼ်ႁႅင်းၼႆၵေႃႈ တိူဝ်းသေတၢင်းႁဝ်း၊ မိူၼ်ၼင်ႇ တၢင်းႁဝ်းမူႇၸေႊၼႆ့ ယူႇဝႆ့သူႇသူႇၵွၺ်း။ ႁႄးႁႄး... (ၶူဝ်သေ)။ ပေႃးယူဝ့်ယူဝ့်ယႃႉယႃႉၼႆ ႁဝ်းၵႂႃႇႁွင့်တၢင်းၼၼ့် မၼ်းၵေႃႈလီသိူဝ်းၸႂ်ၼႃႇၼေႃႈ။ တၢင်းႁဝ်းၵေႃႈမၼ်းဢမ်ႇမီးၼေႃႈ ႁဝ်းၵေႃႈပဵၼ်ၵူၼ်းတီႈၼႆ့(မူႇၸေႊ) မၼ်းၵေႃႈတေႃႈ ဢမ်ႇမီးလွင်ႈလၢၵ်ႇလၢႆးဢီႈသင်ၵႂႃႈ(တႃႇၵူၼ်းမူႇၸေႊ)။ မိူၼ်ၼင်ႇတၢင်းၼၼ့်သမ့် ပိူၼ်ႈၵေႃႈဢမ်ႇယၢမ်ႈႁၼ်ႁဝ်းႁေ ႁဝ်းၵႂႃႇႁွင့်ၵေႃႈ လီသိူဝ်းၸႂ် ပိူၼ်ႈၵေႃႈၶႂ်ႈႁၼ်ႁဝ်း ႁဝ်းၵေႃႈၶႂ်ႈႁၼ်ပိူၼ်ႈ။ မိူၼ်တၢင်းႁဝ်းသမ့် ႁဝ်းၶႂ်ႈႁၼ်ပိူၼ်ႈ ပိူၼ်ႈသမ့်ဢမ်ႇၶႂ်ႈႁၼ်ႁဝ်း ႁႃး... ႁႃး... (ၶူဝ်သေ) တၢင်းႁဝ်းသမ့်ၵႆ့ႁၼ်ၵၼ်တႃႇသေႇ။

ၶႆႊၼေ လွင်ႈတူဝ်ထူပ်း မိူဝ်ႈၵႂႃႇႁွင့်ၵႂၢမ်းၼွၵ်ႈမိူင်းဢိတ်းၼိူင်ႈ?

ႁဝ်းၵႂႃႇႁွင့်မိူင်းပိူၼ်ႈၼႆ့ သင်ဝႃႈႁဝ်းႁွင့်ၵႂၢမ်း Cover Song (သဵင်ႁင်းပိူၼ်ႈ)ၼႆ၊ မိူၼ်ၸိူင့်ၼႆယဝ့် ႁဝ်းၵႂႃႇႁွင့်တၢင်းၼွၵ်ႈသေ ၸင်ႇလႆႈႁူႉမႃး။ မိူၼ်မိူဝ်ႈဢွၼ်တၢင်း ႁဝ်းၵႂႃႇႁွင့်ၵႂၢမ်းမိူင်းထႆး ႁဝ်းသမ့် Cover Song ထႆးဝႆ့၊ ပေႃးႁဝ်းၵႂႃႇႁွင့်ၼႂ်းမိူင်းထႆးတေ့တေ့ၼႆ ႁဝ်းဢဝ် Cover Song ထႆးသေ သမ့်ဢဝ်ၶေႃႈတႆးႁဝ်းသႂ်ႇႁေႁွင့် ႁဝ်းၵေႃႈမိူၼ်ၸႂ်လဵၵ့်ဝႆ့ မၼ်းၵေႃႈဢမ်ႇၸႂ်ႈၶွင်ႁဝ်းႁေ ၸင်ႇဝႃႈ ဝၢႆးၼႆ့မႃး ဢမ်ႇပဵၼ်ယဝ့်။ တေႃႈႁဝ်းၵႂႃႇႁွင့်မိူင်းၶႄႇၵေႃႈ တေႃႈၼင်ႇၼၼ်ယဝ့် ၸႂ်ႁဝ်းၵေႃႈ ပဵၼ်ဝႆ့မဵဝ်းၼိူင်ႈ၊ ပေႃးပဵၼ်လႆႈတေ့ၼေႃႈ ႁွင့် Own Tune ၼႆ့ ၶႅမ့်သေပိူၼ်ႈယဝ့်။

ဢၼ်ၸဝ်ႈၵဝ်ႇလႆႈပႆလတ်းမႃး ၼႂ်းၶၢဝ်းတၢင်းပၢႆးမွၼ်းႁွင့်ၵႂၢမ်းၼႆ့ ဢၼ်ယၢပ်ႇၽိုတ်ႇ လႄႈ ဢၼ်ပဵၼ်ဢၼ်မၵ်းမၢႆ တႃႇတူဝ်ၸဝ်ႈ ၵဝ်ႇၼၼ့် တေပဵၼ်ဢၼ်လႂ်၊ လႆႈႁဵတ်းႁိုဝ်ၶတ်းၸႂ် ၾိုတ့်ၸိုၼ်ႇပူၼ့်လႆႈမႃးၼႆ ၶႆႊၼေပၼ်ဢိတ်းၼိူင်ႈ?

ၾၢႆႇလွင်ႈၵႂၢမ်းၼႆ့ၵေႃႈ ႁဝ်းသမ့်ပေႃးသူၼ်ၸႂ်ဝႆ့ယဝ့်ၼေႃႈ။ လွင်ႈယၢပ်ႇၽိုတ်ႇၼႆ့တႄ့ တေပဵၼ်မိူဝ်ႈဢွၼ်တၢင်းတၢင်း မိူဝ်ႈပႆႇပႃႈမေႃ ႁွင့်ၵႂၢမ်းၼၼ့် ၼင်ႇႁိုဝ်ပေႃးတေႁွင့်လႆႈၼၼ့် မၼ်းၵေႃႈလႆႈထွမ်ႇ ၵႂၢမ်းပိူၼ်ႈၼမ်ၼမ်၊ ၼင်ႇႁိုဝ်မၼ်းပေႃးတေမိူၼ်သဵင်ပိူၼ်ႈၼၼ့်ၼေႃႈ ပေႃးႁွင့်ၵႂၢမ်း Cover Song ၼႆ သမ့်ၶႅမ့်မဵဝ်းၼိူင်ႈ ယၢပ်ႇမဵဝ်းၼိူင်ႈ၊ မၼ်းသမ့်ယၢပ်ႇသင်ၼႆ ပေႃးဝႃႈႁဝ်းဢမ်ႇႁွင့်လႆႈၼင်ႇပိူၼ်ႈ၊ ပိူၼ်ႈၵေႃႈတေဝႃႈ 'ႁႃး! ပိူၼ်ႈႁွင့်မႃးၸိူင့်ၼႆဝႃႈ မၼ်းသမ့်ႁွင့်မႃးၸိူင့်ၼႆဝႃႈ' ၵူဝ်ပဵၼ်ၸိူင့်ၼၼ်ၵႂႃႈ။ ယၢမ်းၼၼ့်ၵေႃႈ လႆႈၶတ်းၸႂ်မႃးတေ့တေ့ၼင်ႇၵဝ်ႇ။ ဝၢႆးလင်ၼႆ့တႄ့ မႃးပဵၼ် Own Tune တႄ့ ႁဝ်းၵေႃႈ ႁွင့်ၵေႃႈမေႃႁွင့်မႃးႁေ မၼ်းၵေႃႈႁမ့်ငၢႆႈၵႂႃႇဢိတ်းၼိူင်ႈ၊ မိူဝ်ႈဢွၼ်တၢင်းၼၼ့်တႄ့ လွင်ႈလဵပ်ႈႁဵၼ်းၵေႃႈ မၼ်းဢမ်ႇပႆႇပေႃးမီးသင် ဝၢႆးလင်မႃးၼႆ့ၵေႃႈ ၾၢႆႇလွင်ႈလဵပ်ႈႁဵၼ်းၵေႃႈၼမ်မႃးႁေ လွင်ႈႁွင့်ၼႆ့ၵေႃႈ မၼ်းၵေႃႈငၢႆႈမႃးလွၺ်းလွၺ်းၼေႃႈ။

ၽႅဝ်ၼိူဝ်သဵၼ်ႈတၢင်းပၢႆးမွၼ်းမႃးယဝ့်သေ ႁၼ်ထိုင် ၼိူဝ်သဵၼ်ႈတၢင်းပၢႆးမွၼ်းတႆးၸိူင့်ႁိုဝ်?

လုၵ်ႈဢွၼ်ႇၸိူဝ်းတေၶိုၼ်ႈယႂ်ႇမႃးၼၼ့်ၵေႃႈ မၼ်းတေဢမ်ႇယၢပ်ႇ တႃႇလွင်ႈတွၺ်ႇမၼ်းယဝ့်ၼေႃႈ။ ၵူၺ်းၼႃႇ မၢင်ႊၸိူဝ်းၼႆ့ ၶႂ်ႈတွၺ်ႇၶႂ်ႈႁွင့်ၵေႃႈ မီးတင်းၼမ်ယူႇ ၵူၺ်းၼႃႇ ႁဵတ်းဢွၵ်ႇမႃးယဝ့်ၼႆၵေႃႈ ၶၢႆဢမ်ႇဢွၵ်ႇလႆႈ၊ ၶၢႆဢမ်ႇဢွၵ်ႇလႆႈတႄ့ၵေႃႈ ဢမ်ႇၸႂ်ႈၼင်ႇၵဝ်ႇ ယွၼ့်ပိူဝ်ႈဝႃႈ မီးၶႅပ်းပွမ်(Copies) လႄႈ တႃႇတေလႆႈၶိုၼ်းၵေးလၢင်း ဢမ်ႇမီး၊ ၵွပ်ႈဢမ်ႇလႆႈၶိုၼ်းၵေးလၢင်းမၼ်းႁေ တႃႇတေသိုပ်ႇၸုၵ်းမၼ်ႈၵႂႃႇၽၢႆႇၼႃႈၼႆ့ မၼ်းဢမ်ႇပဵၼ်လႆႈယဝ့်။ ယႃႇပေဝႃႈ လုၵ်ႈဢွၼ်ႇႁုၼ်ႈမႂ်ႇ တေႃႈယၢမ်းၼႆ့ တေႃႈႁဝ်းတေႁဵတ်းဢၼ်မႂ်ႇၼႆ့ၵေႃႈ တေႃႈယၢပ်ႇၶၢၼ်ၸႂ်ဝႆ့ယဝ့်။ ဢိူဝ်း... ၵူၺ်းၼႃႇ ပေႃးမီးတၢင်းလႅၵ်ႈလၢႆႊမႃးတႄ့ၵေႃႈ ဢမ်ႇၸၢင်ႊဝႃႈၼႃႇၼေႃႈ။ တႃႇတေဢွၵ်ႇၽူႈႁွင့်ၵႂၢမ်းမႂ်ႇမႂ်ႇမႃးၼႆ့ၵေႃႈ တေယၢပ်ႇဝႆ့ၼင်ႇၵဝ်ႇ ပေႃးယင်းတိုၵ့်မီးၶႅပ်းပွမ်ၼႆ့။

ၼႂ်းၶႅပ်းၵႂၢမ်းမၢၼ်ႊၼၼ့် ပဵၼ်ၽႂ်တႅမ်ႈ၊ ဢတ်းတီႈလႂ်၊ ႁၢၼ့်ၸႂ်ယူႇႁႃႉ ၶႆႊၼေဢိတ်းၼိူင်ႈ?

ၵႂၢမ်းမၢၼ်ႊၼႆ့ၵေႃႈ ပဵၼ် Producer မၼ်းၸႂ်ႉႁဵတ်းၵႂႃႈ။ Producer မၼ်းၼႆ့ ပဵၼ်ၸၢႆးၵျေႃႇဝိၼ်း(ၸဵင်းတုင်) ၵွပ်ႈဝႃႈ ၸၢမ်းႁဵတ်းတူၺ်းၼႆၵေႃႈ ၸၢမ်းႁဵတ်းဢွၵ်ႇၵႂႃႇၵွၺ်းၼင်ႇၵဝ်ႇ။ ၵႂၢမ်းၼႆ့တႄ့ ပဵၼ်ၵႂၢမ်းၸၢႆးလၢဝ်သႂ် မူတ်းမူတ်းဢိူဝ်ႈ။ ႁွင့်ၵႂၢမ်းမၢၼ်ႊၵေႃႈ မၼ်းဢမ်ႇၸႂ်ႈၵႂၢမ်းႁဝ်း(ၵႂၢမ်းတႆး)ၼႃႇ တေႃႈယၢပ်ႇဝႆ့ၼႂ်းၸႂ်ၼင်ႇၵဝ်ႇ ဢၼ်ႁဝ်းႁွင့်ၵႂႃႇၼၼ့်ၼေႃႈ။

ၸွင်ႇတေသိုပ်ႇဢွၵ်ႇၾၢႆႇမၢၼ်ႊထႅင်ႈယူႇႁိုဝ်?

ႁႃး... ဢမ်ႇမီးယဝ့်ယူဝ့်၊ တေႃႈတႃႇတေႁဵတ်းဢွၵ်ႇၵႂၢမ်းတႆးၼႆ့ ယင်းယၢပ်ႇၸႂ်ဝႆ့ တႃႇၵႂၢမ်းမၢၼ်ႊၼႆ့ ၶႅၼ်းၼႃႇဢိူဝ်ႈ။ ဢႃႇယုၵေႃႈ ယႂ်ႇမႃးယဝ့်ၼႃႇၼေႃႈ။

ယိူင်းဢၢၼ်းမိူဝ်းၼႃႈ မီးၸိူင့်ႁိုဝ်၊ ပၼ်တၢင်းၶႆႈၸႂ် ၼိူဝ်လုၵ်ႈ ဢွၼ်ႇႁုၼ်ႈမႂ်ႇဢိတ်းၼိူင်ႈ?

ၸိူဝ်းလုၵ်ႈဢွၼ်ႇႁုၼ်ႈမႂ်ႇမႃးၸိူဝ်းၼၼ့်ၵေႃႈ ၶႅမ့်ၽႂ်ၶႅမ့်မၼ်းယူႇ၊ ၵူၺ်းၼႃႇ ႁဝ်းၵေႃႈဢမ်ႇဝႃႈလႆႈ ၵေႃႉၼၼ့်ၵေႃႉၼႆ့ၶႅမ့်ၼႆၼၼ့် တေႃႈလူဝ်ႇၶတ်းၸႂ်ႁင်းၽႂ်ႁင်းမၼ်းယူႇ။ ႁဝ်းၵေႃႈတေဝႃႈ ႁဝ်းၶႅၼ်ႇၼႃႇယဝ့်ၼႆၵေႃႈ ႁဝ်းဢမ်ႇဝႃႈလႆႈ၊ ႁဝ်းၵေႃႈ လူဝ်ႇမီး(သႃႊ)တၢင်းၶတ်းၸႂ်ၼႆ့ မီးထႅင်ႈတင်းၼမ်ယူႇ။ ပေႃးဝႃႈႁဝ်း ၶတ်းၸႂ်လႆႈၼမ်ၼမ်ၵေႃႈ ႁဝ်းၵေႃႈၶႅမ့်မႃးၼႃႇၼေႃႈ။ မၼ်းၵေႃႈ ဢမ်ႇမီးတီႈတိူၵ်ႈလႆႈ တႃႇလွင်ႈလဵပ်ႈႁဵၼ်းၼႆ့။ တႃႇတေဢွၵ်ႇမႂ်ႇၼႆ့တႄ့ ပႅင်ႈၼင်ႇၸဝ်ႈၵဝ်ႇၶတ်းၸႂ်လႆႈ ပေႃးပီႈၼွင့်ၽူႈပၼ်ႁႅင်းႁဝ်းၶဝ် ႁပ့်ထွမ်ႇလႆႈ ယွမ်းႁပ့်လႆႈၼႆတႄ့ တေၶတ်းၸႂ်ႁဵတ်းမႃးထႅင်ႈယူႇ သိုပ်ႇၼႃႈၼႆ့ၵေႃႈ တေႃႈႁၢင်ႈႁႅၼ်းဝႆ့ယူႇ။

ၶၢဝ်းပွၺ်းပီႊမႂ်ႇတႆးၼႆ ယၢမ်ႈၵႂႃႇႁွင့်ၵႂၢမ်းတီႈလႂ်?

ၼွၵ်ႈမိူင်းတႄ့ လႆႈၵႂႃႇႁွင့် မိူင်းထႆး၊ မိူင်းသိင်ႇၵပူဝ်ႇ၊ မိူင်းလႅမ်း(မိူင်းတႆးတႂ်ႈၶူင်း၊ ၸိုင်ႈၶႄႇ)၊ ၵိုင်မႃႉ၊ မိူင်းတိင်(မိူင်းတႆးသိပ်းသွင်ပၼ်းၼႃး၊ ၸိုင်ႈၶႄႇ) ၸိူဝ်းၼႆ့ဢေႃႈ။

သွၼ့်မိင်ႈၵၼ်တင်းၽႂ်၊ လုၵ်ႈလၢင်းမီးလၢႆၵေႃႉ?

တင်း ၸၢႆးယီႊမူၼ်ႇ၊ လုၵ်ႈလၢင်းမီး 2 ၵေႃႉ၊ ၵေႃႉယႂ်ႇၸိုဝ်ႈ ၸၢႆးသႅၼ်ႁေႃ၊ ၵေႃႉဢွၼ်ႇၸိုဝ်ႈ ၸၢႆးသႅၼ်ယိူင်းသီ။

ပေႃးၶႂ်ႈတိတ်းတေႃႇၼႆ။

မၢႆႁိူၼ်း(ႁ-4/53) ၊ ပွၵ့်ၼိူဝ်၊ ဝဵင်းမူႇၸေႊ။

တွင်ႈထၢမ် - ၸႂ်ႁိၼ်လဵၵ်း