ၵႂၢမ်းမင်ႇၵထၸဝ်ႈၵၢင်းသိူဝ်

 1.တမ်းပွင်ႇၸဝ်ႈၵၢင်းသိူဝ်။

ပီႊ 2501 = သွင်ႁဵင်ႁႃႈပၢၵ်ႇပၢႆၼိုင်ႈ သႃႉသၼႃႇတူၵ်းၶိုင်ႈၵၢင်

ၼိုင်ႈတေႇၸ ၵႃလူၼ်ႇ လႄႈ ပႅၵ်ႉၶ ႁူမ်ႇတေႇၸႁဵတ်းႁူၺ်း ၊ သွင်ထိုင်ႁႃႈ သၢင်ႇသီႈဢႃႈသူပ်းႁွင်ႉသဵင်ၵျၢမ်း ၊ မိူင်းၵူၼ်းမုၵ်ႉၾႆးလၢမ်းၸွတ်ႇၸိုင်ႈ ၊ ၵၢပ်ႈဢၼ်ပတေႇသရဵတ်ႈလု ၶုၼ်ႁၢႆ ။

ၶုၼ်ၵဝ် ၶုၼ်မႂ်း တၢပ်ႇၵၼ်တၢႆ ၵႂႃႇသဵင်ႈ ၊ ၵၢပ်ႈဢၼ်ပေႃႈသိူဝ်လၢႆးၶဝ်ႈထိူၼ်ႇ ၊ ၼူဢမ်ႇမိူၼ်ႇၸပ်းၸွမ်း ၊ ယူႇထမ်ႈၽင်ႇၼွင်လႃး ၸူႉၵၼ်မႃးၵႃႈၼၼ်ႈ ၊ ပေႃးထိုင်ႁူၵ်း ၸဵတ်း ပႅတ်ႇ ဢတ်ႉထ ၊ ပႅၵ်ႉၶလုၵ်ႉယၢႆးဝၢၼ် ၊ ၵႃလူၼ်ႇပႂ်ႉၸွမ်းသၵ်း ၊ တူဝ်ၼူလၵ်ႉလွမ်ပႂ်ႉထိင်းဢုၵ်ႉၸႃႇယူႇ ။

ဝၼ်းဢွၵ်ႇမႃလိၼ်ႁဝ်ႇ ၊ ဝၼ်းတူၵ်းမုၵ်ႉၾႆးသဝ်ႇ ႁူင်းႁူင်း ၊ ၽၢႆႇႁွင်ႇငိူၵ်ႈၵၢင်းလၢႆး လုၵ်ႉၵျွၵ်းလၢႆးၶုၼ်ႇၽၢင်ႈ ၊ ၼႂ်းၵျႃးၶိုင်ႈၵၢင်လႄႇ ၊ ပေႃႈသိူဝ်ၵေႇမီးၽုင်း ၊ ၵၢပ်ႈဢၼ်ၽီလူးမၵႃလူၼ်ႇ ၊ လၢႆးၶူၼ်မူၼ်ႇၵိၼ်မိူင်း ၊ မုၵ်ႉမူႇၶွၼ်ႈပဵၼ်ဝႅင်း ၊ ၶိူဝ်းတႆးလႅင်းၸွတ်ႇသဵင်ႈ ၊ ၽႂ် တြႃးသိုဝ်ႈမၢၼ်ႇ မဝ်ႇလၢၼ်ႇၶိုၼ်ႈပဵၼ်ၶုၼ် ၊ ရေႃးၵႃႇၵေႃႈတေသၢၼ်း ၵဝ်ႈၵၼၢၼ်းၼၢမ်ႇၵိၵ်ႈ ။

မိူင်းၵူၼ်းၾႃႉဢမ်ႇပၢင်ႇ ဢမ်ႇလႆႈမြၢင်ႇသၢႆဝၼ်း ၊ မုၵ်ႉၽုင်မူႇၸၢႆးယိင်း ၼွမ်းယမ်ပေႃႈသိူဝ်လၢႆးၵၢႆႇႁူတ်ႈ ၊ ၼၵ်ႈၵႃးတိုၵ်းသိူဝ်ႁွင်ႉ သၢင်ႇသီႈသွင်ႉၶၢမ်ႈၵဵဝ် ၊ ၵူၼ်းမိူင်းလႆႈပၼ်းႁဵဝ်ၸွတ်ႇၸိုင်ႈ ၊ ပေႃးထိုင်သိပ်းတသမႃႇ ထမ်ႇမရဵတ်ႈရႃႇၸႃႇ ႁွတ်ႈထိုင်ၶႃႇ ဝၼ်းတၼ်းမႃး ၊ လီတေႃႈဝၢင်းၵၢၼ် ဢၼ်ဢမ်ႇတြႃး ၵျၢင်ႉသိုဝ်ႈၵၼ်တ ။

တႃႇတွင်းမၢႆ ။

1.ၵႃလူၼ်ႇ         - ထႆး

2.သိူဝ်              - တႆး

3.သၢင်ႇသီႈ        - မၢၼ်ႈ

4.ၽီလူး            - ဢမေႇရိၵၼ်ႇ

5.မႃလိၼ်          - ၵျႃႇပၢၼ်ႇ

6.ငိူၵ်ႈၵၢင်းလၢႆး   - ၶေႇ

2.မင်ႇၵထၸဝ်ႈၵၢင်းသိူဝ် ။

သႃသၼႃႇတူၵ်းၶိုင်ႈၵၢင်            ၵူၼ်းဢမ်ႇႁူဝ်ဢမ်ႇႁၢင်ၸၢင်ႈလႆႈမေးလဝ်း

ၵူၼ်းၶီႈမဝ်းပဵၼ်ၶုၼ်                ၵူၼ်းမီးမုၼ်တုၵ်ႉၶ

ၵူၼ်းႁဵတ်းၵျႃႉသမ်ႉၽၢၼ်          ၵူၼ်းဢမ်ႇႁဵတ်းၵၢၼ်သမ်ႉမီး

ၵူၼ်းမေႃလၢတ်ႈၵႂၢမ်းၸီးႁူပိူၼ်ႈ  ဢၢႆႈငိူၼ်ႈသိူၼ်ႈပဵၼ်လီ

ၵူၼ်းဢမ်ႇၵူဝ်ၾႃႉ ၵူဝ်ၽီလူိင်ႇ    ၽူႈဢုပ်ႉပိူင်ႇလႅၼ်ငိုၼ်း

ၵၢင်ဝၼ်းဢဝ်ႁဵတ်းၵၢင်ၶိုၼ်း       မၢပ်ႇလႅၼ်ငိုၼ်းဢဝ်ၶွင်လၢႆပိူၼ်ႈ

ဢၢႆႈငိူဝ်ႈသိူၼ်ႈႁဵတ်းၸဝ်ႈ           ၵၢပ်ႈၵူၼ်းထဝ်ႈဢဝ်မေးၼမ်

ၵၢပ်ႈၵူၼ်းၸႂ်လမ်ငၢႆႈ                 ၵၢပ်ႈၵူၼ်းလႆႈပၢႆၼီ

ၵၢပ်ႈၵူၼ်းလႆႈၶီငဝ်ၵူႈၽၢႆႇ           ၵၢပ်ႈၵူၼ်းၸၢႆႇၶႅပ်းၸေႊ

ၵၢပ်ႈတူဝ်မေႈႁႃလဵင်ႉတူဝ်ပေႃႈ    ၵၢပ်ႈၵူၼ်းတူၵ်းတႅမ်ႇယေႃႈပဵင်းလိၼ်

ၵၢပ်ႈၵူၼ်းဢမ်ႇမီးသိၼ်ၵိၼ်မိူင်း   ၵၢပ်ႈၵူၼ်းလိူင်းသွၵ်ႈတႂ်ႈသွၵ်ႈၼိူဝ်

ၵၢပ်ႈသိူဝ်ယဵၼ်းႁၢႆႉပဵၼ်ၵူၼ်း       တေတႆႇတူၼ်ႈႁႃဝၢၼ်ႈၶိုၼ်းယဝ်ႉ။