ပိုၼ်းၸၢႆးသႅင်ၸွမ်ၾႃႉ

 ႁူပ့်ထူပ်းတွင်ႈထၢမ် သိူၵ်ႈၶိူဝ်းပၢႆးမွၼ်း ၸၢႆးသႅင်ၸွမ်ၾႃ့

 ၵဵဝ်ႇလိူၺ်ႈလွင်ႈပၢႆးမွၼ်းၽဵင်းၵႂၢမ်းပၢၼ်မိူင်းမႂ်ႇမႃးၼႆ ၽူႈဢၼ်ၸိုဝ်ႈလိုဝ်းလင်ႊယူႇဝၼ်းမိူဝ်ႈလဵဝ် ၸဵမ်ၾၢႆႇတႅမ်ႈ ၾၢႆႇႁွင့် ၸိူဝ်းၼႆ့ၸိုင် ၶဝ်ႈပႃး ၸၢႆးသႅင်ၸွမ်ၾႃ့ ၵေႃ့ၼိူင်ႈယဝ့်။ ပၢႆးမွၼ်းၽဵင်းၵႂၢမ်း ၸၢႆးသႅင်ၸွမ်ၾႃ့ၼႆ့ ၾၢႆႇပၢၼ်မႂ်ႇ ႁိုဝ် ၾၢႆႇၵူၼ်းၼုမ်ႇဢမ်ႇဝႃႈ မီးသဵၼ်ႈတၢင်းမၼ်းၶေႃၶေႃသေဢမ်ႇၵႃး ၼႂ်းၽဵင်းၵႂၢမ်းဢၼ်သႂ်ႇပႃး သႅဝ်ဢၢႆႊၽိင်ႈၶိူဝ်း ၸိူဝ်းၼၼ့်ၵေႃႈ ပဵၼ်ဢၼ်လၢၵ်ႇလၢႆးပႅၵ်ႇပိူင်ႈ လီထွမ်ႇၶႅမ့်လႅပ်ႈ ဝၢၼ်ႁူတေ့တေ့။ 

ၸၢႆးသႅင်ၸွမ်ၾႃ့ႁဝ်း မီးပီႈၼွင့်လၢႆၵေႃ့။ ၸွင်ႇမီးပီႈၼွင့်ႁူမ်ႈတွင့် ဢၼ်ယူႇၼႂ်းပၢႆးမွၼ်း?

 မီးပီႈၼွင့်ႁႃႈၵေႃ့ဢိူဝ်ႈ။ ပီႈဢၢႆႈၵေႃ့ယႂ်ႇသုတ်းတႄ့ သဵင်ႈၵႂႃႇယဝ့်။ မီးပီႈၼၢင်းၵေႃ့ၼိူင်ႈ။ ႁဝ်းတႄ့ ပဵၼ်ၵေႃ့ၵၢင်။ ၼွင့်ၸၢႆးႁဝ်းသမ့် ပဵၼ် ၸၢႆးသႅင်ၸွမ်မၢဝ်း ၼႂ်းပၢႆးမွၼ်းႁွင့်ၽဵင်းၵႂၢမ်း ၼင်ႇၵဝ်ႇ။ ၾၢႆႇတႅမ်ႈၸိူဝ်းၼႆ့ၵေႃႈ ၶႅမ့်ယူႇ။ ၼွင့်ယိင်းၵေႃ့လဵၵ့်သုတ်း တႄ့ ပဵၼ်ထွမ်ႇၽဵင်းယူႇ။

တႄႇၶဝ်ႈၸႂ်ပၢႆးမွၼ်းမႃးမိူဝ်ႈလႂ်?

 တေလႆႈဝႃႈ ၸဵမ်မိူဝ်ႈလဵၵ့်ယဝ့်။

ပဵၼ်ၽႂ်ၵေႃ့သူၼ်းတုမ်ႊ ႁႂ်ႈၶဝ်ႈၼႂ်းပၢႆးမွၼ်းမႃး?

 တေဝႃႈ ပဵၼ်ၸႂ်ဢွၼ်တၢင်းယဝ့်ယူဝ့်။ ယွၼ့်သူၼ်ၸႂ်လႄႈ ယၢမ်ႈလႆႈထွမ်ႇငိၼ်း ၽဵင်းၵႂၢမ်းၸၢႆးထီးသႅင်ၶဝ် ၸၢႆးသၢႆမၢဝ်းၶဝ် ၸိူဝ်းၼႆ့သေ မီးယိူင်းဢၢၼ်းၶႂ်ႈသႂၢင်းၶႅပ်းမႃးဝႆ့ယဝ့်။  ၶႂ်ႈဝႃႈ ၼႂ်းၸႂ်ႁဝ်း ပေႃးမီးဝႆ့ ဢၼ်ႁႅင်းၶႂ်ႈပဵၼ်ၼႆ့ယဝ့်။

ပဵၼ်ၵႂၢမ်းႁူဝ်လႂ်ပူၵ်းတိုၼ်ႇႁႂ်ႈၶဝ်ႈၼႂ်းပၢႆးမွၼ်းမႃး?

 ၵႂၢမ်းၸၢႆးသၢႆမၢဝ်းၶဝ် မိူၼ်ၼင်ႇ “ၼႂ်းလူၵ်ႈၼႆ့ႁၵ့်မႂ်းၵေႃ့လဵဝ်” ၸိူဝ်းၼႆ့ ၸပ်းသူပ်းငၢႆႈ။ “ပီႈၾၢၵ်ႇႁူဝ်ၸႂ်” ၸိူဝ်းၼၼ့် ၵေႃႈယၢမ်ႈႁွင့်လဵၼ်ႈမႃး ၸဵမ်မိူဝ်ႈဢွၼ်ႇယဝ့်။ 

တႄႇယၢမ်ႈၶိုၼ်ႈၼိူဝ်ၶဵင်ႇႁွင့်ၵႂၢမ်းမႃးမိူဝ်ႈလႂ်။

ဢၼ်ႁဝ်းတွင်းၼႆ့ ပဵၼ်မိူဝ်ႈပွၺ်းလိုဝ်ႈပၢင်သွၼ်လိၵ်ႈတႆး ၼႂ်းပွၵ့်ႁဝ်း ၼၼ့်ဢိူဝ်ႈ။ ပဵၼ်ၵႂၢမ်း “ၶၢဝ်းၵတ်းမိူင်းတႆး” ႁႃးၵေႃ့ႁႆႇတိင်ႇသေ ႁွင့်ဢိူဝ်ႈ။ ၽွင်းၼၼ့် တေမီးမွၵ်ႈႁူၵ်းၶူပ်ႇၸဵတ်းၶူပ်ႇၵွၺ်း။

ႁဵတ်းၸိူင့်ႁိုဝ် ထူပ်းၵၼ်တင်း တွၵ်ႇတိူဝ်ႇၸၢႆးၶမ်းလဵၵ်း?

 ႁဝ်းၶိုၼ်ႈၸၼ့်ၸွမ်လႃႈသဵဝ်ႈသွင်ပီႊ။ ၶဝ်ႈ Hones သေ ၶၢႆ့ၵႂႃႇ ၶိုၼ်ႈၸၼ့်ၸွမ်ဝဵင်းလိူဝ်ႇ။ ၶၢဝ်းၼၼ့် မေႃသွၼ်သမ့်ပဵၼ် ႁူဝ်ပဝ်ႈၼႂ်းၵေႃလိၵ်ႈလၢႆးတီႈၸၼ့်ၸွမ်ဝဵင်းလိူဝ်ႇ။ ႁဝ်းၵူၼ်းၼုမ်ႇ ၵႂႃႇတူင့်ၼိုင်ၼႂ်းၵေႃၼႆၵေႃႈ မိုတ်ႈမေႃသွၼ်ႁဝ်းမႃး။ မိုတ်ႈယဝ့်ၵေႃႈ ၶၢဝ်းၼၼ့်တႄ့ ဢမ်ႇပႆႇယိူင်းဢၢၼ်း တႃႇတေဢတ်းၵႂၢမ်းၵွၼ်ႇၵႂႃႈ။

ႁဵတ်းၸိူင့်ႁိုဝ် ပဵၼ်ဢတ်းမႃးဢွၼ်တၢင်း?

 မိူဝ်ႈၼၼ့် ၸၢႆးၵႅမ်ႁေ ၶမ်းၼွၺ့်လဵၵ်းႁေ ႁဝ်းႁေ ဢၢင်ႈႁဵတ်းၸွမ်းၵၼ်ၶႅပ်းၼိူင်ႈ။ ၵူၺ်းၵႃႊ ယဝ့်ၸၼ့်ၸွမ်သေ ၽၢတ်ႇၵႂႃႇတီႈၽႂ်တီႈမၼ်း။ ဝၢႆးလိုၼ်းမႃး ၸၢႆးၵႅမ်ၵေႃႈ တႃႇတေမႃးႁွင့်ၼၼ့် မၼ်းယၢပ်ႇလႄႈ လႆႈပဵၼ်ၵႂႃႇသွင်ၵေႃ့ၵွၺ်း။

ဢၼ်ဢွၵ်ႇမႃးဢွၼ်တၢင်းသုတ်းၼၼ့် ပဵၼ်မိူဝ်ႈလႂ် ပဵၼ်ၶႅပ်းလႂ်?

 ပဵၼ်မိူဝ်ႈပီႊ 1995။ ၶႅပ်း “တႂ်ႈငဝ်းတၢင်းႁၵ့်” ဢိူဝ်ႈ။

ၶႅပ်းဢၼ်ယၢမ်ႈဢွၵ်ႇမႃး ( # တေႃႇပီႊ 2012) တင်းမူတ်းတေမီးမွၵ်ႈလၢႆၶႅပ်း?

 ဢတ်းၸွမ်းၼၢင်းၶမ်းၼွၺ့်လဵၵ်းတႄ့ မီးႁႃႈၶႅပ်း။ ဢၼ်ႁဝ်းႁွင့်မႃးတင်းမူတ်းတႄ့ တေမီးမွၵ်ႈသိပ်းသၢမ်ၶႅပ်းၼႆ့ယူဝ့်။

သူင်ၸႂ်ၾၢႆႇပၢႆးၽဵင်းၵႂၢမ်းၸိူင့်ႁိုဝ်သေပိူၼ်ႈ?

 Slow rock , Soft rock ၸိူဝ်းၼႆ့ဢိူဝ်ႈ။ ႁဝ်းဝူၼ့်ဝႃႈ သဵၼ်ႈတၢင်းႁဝ်းဢၼ်ၼိူင်ႈၼႆ့ ထုၵ်ႇလီမီးယူႇ။ ၵမ်းၼႆ့ ႁဝ်းၶႂ်ႈႁဵတ်းမဵဝ်းလႂ် သမ့်လူဝ်ႇပဵၼ်တူဝ်ႁဝ်း ၸိုၼ်ႇႁဵတ်းဢဝ်။ မိူဝ်ႈၼႂ်းၶႅပ်းၵႂၢမ်း “သၢဝ်လူင်” ၼၼ့် ႁဝ်းတႄႇၽိုၵ်းတႅမ်ႈ မိူၼ်ၼင်ႇ “ထိုင်လွၺ်ၽူၺ်းႁုင်း” ၸိူဝ်းၼႆ့ ဢွၼ်တၢင်းယဝ့်။ တႅမ်ႈ Note မၼ်းသ ၶိုၼ်းၵႂႃႇၼႄမေႃသွၼ်ႁဝ်း။ တႃႇႁဝ်းတေမေႃတႅမ်ႈ Note ၼႆ့ၵေႃႈ ယွၼ့်ပိူဝ်ႈႁဝ်းလႆႈၵႂႃႇသွၼ် Keyboard ၼၼ့်ၼႃႇ။ ႁဝ်းတွၺ်ႇ Keyboard ဢမ်ႇလႅၼ်ႇသေတႃ့ ဢၼ်လႆႈႁဵၼ်း Note မႃးၼႆ့ ပဵၼ်လွင်ႈလီမၼ်း ဢၼ်ၼိူင်ႈၵႂႃႈ။

ႁဵတ်းၸိူင့်ႁိုဝ်သေ လႆႈၵႂႃႇဢတ်းတီႈ Metal Zone?

 မိူဝ်ႈႁဝ်းၶိုၼ်ႈႁဵၼ်းၸၼ့်ၸွမ်တီႈဝဵင်းလိူဝ်ႇသေ ယူႇသဝ်းတီႈႁူင်းသဝ်းၼမ့်မၢဝ်းၼၼ့် လႆႈမိုတ်ႈၵၼ်တင်းၽူဝ်းသေႃႇ ဢၼ်မိူဝ်ႈလဵဝ် တွၺ်ႇ Bass ယူႇ ၼႂ်းၸုမ်း Metal zone ၼၼ့်ဢိူဝ်ႈ။ မိူဝ်ႈၼၼ့် မၼ်းတင်းႁႃးယူႇႁူင်းသဝ်းဢၼ်လဵဝ်ၵၼ်။ မၼ်းလုၵ့်တီႈမိူင်းၵုတ်ႈသေ မႃးႁဵတ်းၵၢၼ်၊ မႃးယူႇၼႂ်းၸုမ်းႁႆႇတိုင်ႈ Shell တီႈ ဝဵင်းလိူဝ်ႇ။ ပေႃးၶၢဝ်းၵၢင်ၶမ်ႈ ၵႂႃႇႁွင့်ၵႂၢမ်းပၢၼ်းသၢဝ်ၸိူဝ်းၼႆ့ၵေႃႈ ယၢမ်ႈၸွမ်းၵၼ်မႃးလႄႈ ၸမ်ၸႂ်ၵၼ်ယူႇတၢၼ်ႇတၢၼ်ႇ။ လႆႈသေ သွင်သၢမ်ပီႊ မၼ်းၸင်ႇၽႅဝ်ၵႂႃႇတီႈၸုမ်း Metal Zone။ မိူၼ်ၶႂ်ႈဝႃႈတင်းမၼ်းၼႆ့ သွၼ်ႇလႆႈဝႃႈၸမ်ၸႂ်ၵၼ် ၶႂ်ႈဢုပ်ႇသင်ၵၼ်ၵေႃႈလႆႈ။ ႁဝ်းသမ့်ၶိုၼ်းထုၵ်ႇၸႂ် Idea မၼ်းလႄႈ ၸင်ႇပဵၼ် ဢတ်းတီႈ Metal Zone ယဝ့်။ 

လႆႈ Idea ၸိူင့်ႁိုဝ်သေ ႁဵတ်းဢွၵ်ႇ Unplugged မႃး?

 မိူဝ်ႈႁဝ်းၵႂႃႇႁဵတ်းၶႅပ်းတီႈတႃႈၵုင်ႈၼၼ့်ဢိူဝ်ႈ။ ၽွင်းၼၼ့် ၸၢဝ်းမၢၼ်ႊၶဝ်ၵေႃႈ ႁဵတ်း Unplugged ၸိူဝ်းၼႆ့ယူႇယဝ့်။ ၵႂၢမ်းတႆးႁဝ်းၼႆ့ၵေႃႈ ဢဝ် Unplugged တွၺ်ႇၼႆ မၼ်းၵေႃႈ တေလီထွမ်ႇႁူပီႈၼွင့်ႁဝ်းၶဝ်ယူႇယူဝ့်ၼႆၼေႃႈ။ ဝူၼ့်ၸိူင့်ၼႆသေ ပဵၼ်ႁဵတ်းမႃး။

ၶႆႊၼေ လွင်ႈလႆႈတႅမ်ႈၽဵင်း “ၼီႈပိုၼ်း” ၼၼ့် ဢိတ်းၼိူင်ႈ?

 ပဵၼ်ၵႂၢမ်းသင်ႇသြႃႇႁဝ်း မိူဝ်ႈႁႃးၸမ်ယဝ့်ႁဵၼ်းၼၼ့်ဢိူဝ်ႈ။ မၼ်းဝႃႈ ယူႇတီႈလႂ်ၽႅဝ်တီႈလႂ်ၵေႃႈ ယႃႇပေႁႂ်ႈလိုမ်း ၵၢၼ်ၸိူဝ့်ၶိူဝ်းႁဝ်း ၵၢၼ်လိၵ်ႈလၢႆးႁဝ်း ဢၼ်ႁဝ်းမီးတၢင်းႁူ့တၢင်းမေႃၸိူဝ်းၼၼ့်ၵေႃႈ ထိုင်ဝႃႈႁဝ်းဢမ်ႇႁဵတ်း ႁဝ်းဢမ်ႇၶတ်းၸႂ်ၼႆ့တႄ့ ၼႂ်းပိုၼ်းမၼ်း တေမီးၼီႈၵႂႃႇၼႆ ႁဝ်းလႆႈၶေႃႈၵႂၢမ်း ဢၢႆႇတီႇယိူဝ်ႇတီႈသြႃႇမႃးဢိူဝ်ႈ။ 

ၵွပ်ႈသင်လႄႈ တၢမ်တူဝ်ဢမ်ႇႁွင့် ၽဵင်းၵႂၢမ်း “ၼီႈပိုၼ်း”?

 ထိုင်ဝႃႈမၼ်းသၢင်ႇတေႃႇမႃးၼႆတႄ့ တေၶိုၼ်းႁွင့်ယူႇ။ မိူဝ်ႈႁဝ်း တင်း ၸၢႆးသႅင်ၸိုၼ်ႈ မႃးထူပ်းၵၼ်ၼၼ့်ဢိူဝ်ႈ။ မၼ်းဝႃႈ ၸၢမ်းႁွင့်တူၺ်းလူး ၽဵင်းမႂ်ႇမီးသင်။ ၸဝ်ႈပၢႆးမွၼ်းဢၼ်လဵဝ်မႃးႁၼ်ၵၼ်ၼႆ့ ႁဝ်းဝႃႈၸူမ်းၵၼ်ဢိူဝ်ႈၼေႃႈ။ ၶိုၼ်းမီးထႅင်ႈဢၼ်ၼိူင်ႈ “တၢင်းမုင်ႈမွင်းလႄႈယိူင်းမၢႆ” ၼၼ့်ၵေႃႈ ၸၢႆးသႅင်ၸိုၼ်ႈ ႁဵတ်း Unplugged သေဢွၵ်ႇမႃး။ ႁဝ်းၵေႃႈဝူၼ့်ယူႇ သင်သၢင်ႇတေႃႇမႃး တေၶိုၼ်းႁွင့်ၵႂႃႈ။ မၼ်းတေပိူင်ႈၵၼ် ဢိတ်းဢွတ်းယူႇၵွၺ်း။

ယၢမ်ႈလႆႈငိၼ်းဝႃႈ “ၸိူင်းၶေႃးၶူမ်” ၼႆ့ ပဵၼ်ၽဵင်းဢၼ် မီးသိူၵ်ႈၶိူဝ်း ဢၼ်ၵဵဝ်ႇၵပ်းလွင်ႈတၢင်းမၼ်းဝႆ့ၼႆ ၶႆႊၼေဢိတ်းၼိူင်ႈ?

 “ၸိူင်းၶေႃးၶူမ်” ၼႆ့ ပဵၼ်လွင်ႈတၢင်းတိူဝ့်ၸႂ်ၼၢင်းယိင်းဢွၼ်ႇၵေႃ့ၼိူင်ႈၼႆၵေႃႈ ဝႃႈလႆႈ။ ၽဵင်းၵႂၢမ်းၼႆ့ ႁဝ်းယိူင်းတႃႇၵေႃ့လဵဝ်သေတႅမ်ႈ သမ့်ၵႂႃႇယွၼ်ႈသႂ်ႇၵူၼ်းတင်းၼမ်ၼႆ ၶႅၼ်းထိုင်တီႈၵႂႃႈ။ မိူဝ်ႈႁဝ်းၵႂႃႇတီႈမိူင်းထႆးၼၼ့် မီးၼၢင်းယိင်းၵေႃ့ၼိူင်ႈ မႃးၶႆႊလွင်ႈမၼ်း ၼေႁဝ်းဢိူဝ်ႈ။ ၽွင်းၼၼ့် ႁဝ်းၵေႃႈသႂ်ႇၸႂ်ဝႆ့ၵွၺ်း ဢမ်ႇလႆႈတႅမ်ႈမၢႆဝႆ့။ ၽိူဝ်ႇႁဝ်းပွၵ်ႈၽႅဝ်မႃးမိူင်းႁဝ်း ႁဝ်းၸင်ႇမႃးတႅမ်ႈမၢႆတမ်းဝႆ့ဢိတ်းဢွၼ်ႇ။ ၵမ်းၼႆ့ ပေႃးမီးၵႂႃႇသီႇႁႃႈလိူၼ်ယဝ့် ႁဝ်းသမ့်တေၵႂႃႇဢတ်းၽဵင်းၵႂၢမ်းတီႈတႃႈၵုင်ႈ။ ႁဝ်းသမ့်လႆႈၸႂ် ၶီႇလူတ့်ၾႆးၵႂႃႇ။ မိူဝ်ႈၼၼ့် ႁဝ်းဢၢင်ႈတႅမ်ႈမိူၼ်ၼင်ႇၶႆႊၼေၼၼ့်ၵွၺ်း။ ၵူၺ်းၵႃႊ ႁဝ်းၶိုၼ်းမႃးဝူၼ့်လႆႈဝႃႈ ပေႃးယူႇတီႈ ၼၢင်းယိင်းၵေႃ့ၼၼ့်သေၶႆႊၼေၼႆ မၼ်းတိူဝ်းထိုင်တီႈ။ ႁဝ်းၸင်ႇမႃးတႅမ်ႈ ၶေႃႈမၼ်းတူၺ်း။ လမ်ႇမၼ်းၵေႃႈ ႁွင့်တူၺ်းၼႂ်းၸႂ်။ ပေႃးႁဝ်းတေတႅမ်ႈၽဵင်းၼႆ လမ်ႇႁူဝ်ၼႃႈမၼ်းၵွၺ်းၵေႃႈ လူဝ်ႇႁႂ်ႈမၼ်းလီထွမ်ႇ ဝႆ့ၵမ်းလဵဝ်ယဝ့်။ ပေႃးဝႃႈဢမ်ႇလီထွမ်ႇၼႆ ယႃႇပေသိုပ်ႇယဝ့်။ ပေႃးဢၼ်တႄႇမၼ်းၶႅမ့်မၼ်းဝၢၼ်ၵေႃႈ မၼ်းတေပဵၼ်ၶိူဝ်းၵႂႃႇယူႇ။ ၽႅဝ်တႃႈၵုင်ႈၵေႃႈ ႁဝ်းတမ်းဝႆ့ၵွၺ်း။ ပွၵ်ႈမႃးႁေ ၸင်ႇမႄးတႅမ်ႈ မႄးႁွင့်မႄးထတ်းၶေႃႈမၼ်းသေ တႅမ်ႈပဵၼ်မႃးၵွၺ်းၼင်ႇၵဝ်ႇ။

ၶႆႊၼေလွင်ႈယၢပ်ႇၽိုတ်ႇ ဢၼ်လႆႈလတ်းၽၢၼ်ႇၼႂ်းသဵၼ်ႈတၢင်း ပၢႆးမွၼ်းမႃးၼၼ့် ဢိတ်းၼိူင်ႈ?

 ၵမ်ႈၼမ် ဢၼ်ႁဝ်းၵႂႃႇတီႈတႃႈၵုင်ႈၼႆ ပေႃးႁဝ်းတေဢတ်းၵၢင်ဝၼ်း ၵွပ်ႈဝႃႈ ပိူၼ်ႈမၢင့်လႄႈ ၼိူင်ႈပွၵ်ႈၼႆ့ ၸၢင်ႊလႆႈလိုဝ်ႈပဵၼ် သွင်သၢမ်ဝၼ်း။ ပေႃးဢဝ်ၵၢင်ၶိုၼ်းတႄ့ လႆႈၶပ့်တၢမ်းၵၼ်ယူႇ။ ႁဝ်းၵႂႃႇတီႈၼၼ့် ၶၢဝ်းယၢမ်းၵေႃႈဢမ်ႇပၼ်လႆႈၼမ်။ ၵႃႊၸႂ့်ၸၢႆႇၵေႃႈ တေယဝ့်ၼမ်။ လႆႈဢဝ်ၵၢင်ၶမ်ႈ 10 မူင်း တေႃႇ ၵၢင်ၼႂ် 5 မူင်း ၸိူဝ်းၼႆ့ဢိူဝ်ႈ။ မိူဝ်ႈႁဝ်းတႄႇၵႂႃႇဢတ်းၼၼ့် ႁိုင်ပဵၼ်ၽၢၵ်ႇလိူၼ် သၢဝ်းဝၼ်းလႄႈ ဝူၼ့်ၵႂႃႇဝူၼ့်ၶိုၼ်း ၵဝ်ၼႆ့ဢမ်ႇၸႂ်ႈသင်ယဝ့်ယူဝ့် ၵဝ်ဝႆ့ပႅတ်ႈၵၢၼ်တီႈႁိူၼ်းမႃးယူဝ့်ၼႆ့ ၼႆဢိူဝ်ႈ။ ပေႃးၶိုၼ်းသွၼ်ႇမႃးၼႆ ဢၼ်ႁဝ်းဢတ်းၵႂၢမ်းၼႆ့ၵေႃႈ မၼ်းပဵၼ်ၵၢၼ်ၵွၺ်းၼင်ႇၵဝ်ႇ။ ဝၢႆးၼႆ့မႃး ၶိုၼ်းႁၼ်ပီႈၼွင့်ႁူ့ၸၵ်းႁဝ်းမႃးၼႆ ၸင်ႇႁူ့ပွင်ႇ လွင်ႈတၢင်းၶတ်းၸႂ်ႁဝ်းၼၼ့်မႃးဢိူဝ်ႈ။ ၼွင့်ယိင်းၼွင့်ၸၢႆးၸိူဝ်းၼႆ့ၵေႃႈ ၶတ်းၸႂ်လႄႈ တေပဵၼ်မႃးယူႇဝၼ်းၼိူင်ႈ။ ၶတ်းၸႂ်ၼႆၵေႃႈ မၼ်းတေလႆႈၸွမ်းလွၵ်းမၼ်းၼင်ႇၵဝ်ႇ။

ၶႆႊၼေလွင်ႈယၢပ်ႇၽိုတ်ႇ ၽွင်းမိူဝ်ႈၸင်ႇႁႃတႄႇဢတ်းၽဵင်းၵႂၢမ်းၼၼ့် ဢိတ်းၼိူင်ႈ?

 မိူဝ်ႈၼၼ့် လွင်ႈႁႆႇၸိူဝ်းၼႆ့ၵေႃႈ ႁႃးဢမ်ႇပေႃးႁူ့လီ။ ဢၼ်ႁဝ်းၶႂ်ႈ ပဵၼ်ၼၼ့်ၵေႃႈ ဢမ်ႇၸၢင်ႊလၢတ်ႈၼႄပိူၼ်ႈ။ မိူဝ်ႈၶၢဝ်းၼၼ့် ႁဝ်းၵွၺ်းၵူဝ် ၶေႃႈမၼ်းၽိတ်း။ ၵုမ်ႇတူၺ်းၸေႈမၼ်းသေႁွင့်။ ဢၼ်လူဝ်ႇလႆႈပဵၼ်ၼႆ့ ဢမ်ႇတၢပ်ႈလူဝ်ႇတူၺ်းၸေႈမၼ်းသေ ႁွင့်ဢိူဝ်ႈ။ လူဝ်ႇလႆႈသႂ်ႇၸႂ်မိူၼ်ၼင်ႇ ႁဝ်းႁွင့်ၼႄသၢဝ်ၵေႃ့ၼိူင်ႈသေ ႁွင့်ၼၼ့်ယဝ့်။ ၵူၺ်းၵႃႊၽွင်းၼၼ့် ႁဝ်းၵုမ်ႇၵူဝ်လမ်ႇမၼ်း ၶေႃႈမၼ်း ၽိတ်းၵွၺ်း။ ဝၢႆးၼႆ့ႁဝ်းၸင်ႇႁူ့ဢိူဝ်ႈ။

ပၼ်တၢင်းၶႆႈၸႂ် လွင်ႈလၢႆးႁွင့်ၽဵင်းၵႂၢမ်းဢိတ်းၼိူင်ႈ?

 မိူဝ်ႈဢွၼ်တၢင်းၼၼ့် လၢႆးတၢင်းႁွင့်ၵႂၢမ်းၼႆ့ ႁႃးဢမ်ႇႁူ့သင်ၼင်ႇၵဝ်ႇ။ ဢဝ်တၢင်းသူင်လႄႈတၢင်းၶႂ်ႈပဵၼ်သေ ႁွင့်မႃးၵွၺ်း။ ၵူၺ်းၼႃႇ ဝၢႆးလိုၼ်း ႁႃးၶိုၼ်းလႆႈၵႂႃႇႁဵၼ်းဢဝ်ဢိူဝ်ႈ။ ႁွင့်ၵႂၢမ်းဢၼ်ဝႃႈၼႆ့ ႁဝ်းလႆႈၸႂ့်လူမ်း။ ပေႃးလၢႆးႁုတ်း(သုတ်ႇ)လူမ်း ဢမ်ႇမႅၼ်ႈၵေႃႈ ဢမ်ႇလႆႈ။ သဵင်ႁွင့်ၽဵင်းၵႂၢမ်းႁဝ်းၼႆၵေႃႈ မၼ်းတေလႆႈမိူၼ်ဢၼ် ႁဝ်းတၢၼ်ႈၵႂၢမ်းလၢတ်ႈၵႂၢမ်းၼၼ့်ၵွၺ်း။ တေလႆႈမီးတီႈပၢႆသူပ်းႁဝ်းၼႆ့။ မိူဝ်ႈႁဝ်းသုတ်ႇလူမ်းၶဝ်ႈၵႂႃႇၼၼ့်ၵေႃႈ တေလႆႈၸိုၼ်ႇဝႆ့ မိူၼ်ၼင်ႇႁဝ်းယူင်ႈၶူဝ်းၼၵ်း ၸိုၼ်ႇထိုင်တီႈတွင့်ပေႃးဝႅပ်ႈၶႅင်ၵႂႃႇၼၼ့်ဢိူဝ်ႈ။ ႁႂ်ႈႁႅင်းၼႆ့ မႃးမီးတီႈပုမ်ႁဝ်း။ ဢၼ်ႁွင့်ၵေႃႈ မီးတီႈပုမ်ႁဝ်း။ ဢွၼ်တၢင်း ႁဝ်းဢမ်ႇၸွမ်းလွၵ်းၸွမ်းပိူင်။ လိုၼ်းလင် ႁဝ်းၶိုၼ်းလႆႈ လဵပ်ႈႁဵၼ်းသေ ႁူ့မႃး။ ႁဝ်းတေလႆႈၽိုၵ်းၸွမ်းၼမ်ၼမ်။ ႁႅင်းမၼ်း ၸင်ႇၶိုၼ်ႈမႃး။

လွင်ႈဝႆ့ဝၢင်းၸႂ် ၽွင်းတိုၵ့်ဢတ်းၽဵင်းၼၼ့်လူး?

 တေလႆႈဝႆ့ၸႂ်ၼိမ်ၼိမ်။ ဢမ်ႇလူဝ်ႇဝူၼ့်တၢင်ႇလွင်ႈ။ ၸႂ်ႁဝ်း  ႁႅင်းႁဝ်းၸင်ႇၶိုၼ်ႈမႃး။ တေလႆႈဝႃႈ ဝႆ့ၸႂ်ၼိမ်ၼိမ်ဢိူဝ်ႈၼေႃႈ။

လႆႈငိၼ်းဝႃႈ ၶပ်းၶိုင်ဝႆ့ၽဵင်းၵႂၢမ်းမၢၼ်ႊၼႆ ၽႅဝ်တွၼ်ႊလႂ်ယဝ့်?

 ၽဵင်းၾၢႆႇမၢၼ်ႊၼႆ့ မၼ်းသဵင်ႈၼမ် ႁႅင်းငိုၼ်းႁဝ်းၵေႃႈဢမ်ႇပေ့လႆႈ။ ထၢမ်ၸဝ်ႈၶွင်(Producer) ၵေႃႈ ၽႂ်ၵေႃႈႁၢမ့်ၵူဝ်ယဝ့်။ ၵွပ်ႈဝႃႈ ၶႅပ်းပွမ်မိူင်းမၢၼ်ႊၼမ်ၽႅဝ် တႃႇတေလႆႈတိုၼ်းလၢင်းၶိုၼ်း ၼၼ့်မၼ်းယၢပ်ႇ ၽႂ်ၵေႃႈသွၼ်ႇၸိူင့်ၼႆ။ ၼႂ်းၽဵင်းမၢၼ်ႊဢၼ်ႁဝ်း တေဢတ်းၼၼ့် ပႃးၽဵင်းမေႃသွၼ်ႁဝ်းဝႆ့ သီႇႁႃႈႁူဝ်ၼင်ႇၵဝ်ႇ။ ၽဵင်းဢၼ်ပဵၼ်လမ်ႇႁဝ်းသေ ဢၢႆႈၸၢႆး(Black Hole) လႄႈ KAT ၶဝ် သႂ်ႇၶေႃႈပၼ်ဝႆ့ၵေႃႈ ပႃးဢိူဝ်ႈ။ ၸၢႆးလ ၵေႃႈ ထႅမ်တႅမ်ႈဝႆ့ပၼ် သွင်ႁူဝ်။ တေဢွၵ်ႇမႃး CD ဢွၼ်တၢင်းၵႂႃႈ။

( * မၢႆတွင်း - ပီႊ 2012 ၼၼ့် ၶႅပ်းၽဵင်းၵႂၢမ်းမၢၼ်ႊ ၶွင်ၸၢႆးသႅင်ၸွမ်ၾႃႉ ပႆႇပိုၼ်ၽႄႈ)

လွင်ႈတႅမ်ႈၽဵင်းၵႂၢမ်းၼႆ့ ပဵၼ်တူဝ်ထူပ်းႁႃ့ ပဵၼ်တၢင်းဝူၼ့်ႁႃ့?

 သြႃႇၸၢႆးၶမ်းလဵၵ်းႁဝ်းၵႆ့ၵႆ့ဝႃႈ လူဝ်ႇလူလိၵ်ႈၼမ်ၼမ်။ တၢင်းႁူ့ၼႆ့ မၼ်းမီးၼႂ်းလိၵ်ႈ။ ဢမ်ႇၸႂ်ႈဝႃႈ တေလႆႈဢဝ်ၼႂ်းလိၵ်ႈၼၼ့် တင်းမူတ်း ႁဝ်းလူဝ်ႇလႆႈဢဝ် ၶေႃႈၵႂၢမ်းၶွင်တႆးႁဝ်းၸႂ့်ၶိုၼ်း။ လူဝ်ႇလႆႈဢဝ် ၶေႃႈၵႂၢမ်းဢၼ်ၵူၼ်းၽႃးၵႃႇတိုဝ်းၼၼ့်ၵမ်ႈၼမ်။ ၶေႃႈမၢင်ႊဢၼ်ၵေႃႈ ငိၼ်းပိူၼ်ႈတၢၼ်ႈပိူၼ်ႈလၢတ်ႈ ႁဝ်းၶိုၼ်းမႃးတႅမ်ႈသေ မၢႆတွင်းဝႆ့။ ပေႃးဝႃႈလႆႈသေသွင်သၢမ်လိူၼ် ႁဝ်းၶိုၼ်းမႃးတူၺ်းၼႆ ၶိုၵ့်ဝႆ့ဢိူဝ်ႈ။ ပေႃးလူဝ်ႇၶေႃႈမၼ်းမႃးၼႆ တေထုၵ်ႇမႅၼ်ႈႁိမ်းလႂ် ၸင်ႇၸႂ့်တိုဝ်းဢိူဝ်ႈ။ ၵမ်ႈၼမ်ႁဝ်းတႅမ်ႈၽဵင်းၼႆ့ ၵၢင်ၶိုၼ်း 2 မူင်း ဢမ်ႇၼၼ် ၽွင်းတိုၼ်ႇမႃး ၵၢင်ၼႂ် 5 မူင်း ၸိူဝ်း ၼႆ့ဢိူဝ်ႈ။ မၢင်ႊပွၵ်ႈ တိုၼ်ႇမႃးၸဵမ်မိူဝ်ႈ 4 မိူင်းၼၼ့် ယိပ်းၵမ်တင်းၸေႈသေ ဝူၼ့်ပဵၼ်ၼိူင်ႈၸူဝ်ႊမွင်းၵေႃႈ ဢမ်ႇဢွၵ်ႇသင်မႃးၵေႃႈ မီးဢိူဝ်ႈ။ မၢင်ႊပွၵ်ႈ ၼိူင်ႈၸူဝ်ႊမူင်းၵေႃႈယဝ့်ၵႂႃႇ။ မိူၼ်ၼင်ႇ “သလေႇၼၢင်းယိင်း” ၼႆ့ ၸဵမ်လမ်ႇၸဵမ်ၶေႃႈမၼ်း လႆႈတႅမ်ႈမွၵ်ႈ 45 မဵတ့်ၵွၺ်း။ ၶေႃႈမၼ်းတႄ့ လႆႈမႄးၸွမ်းဢိတ်းဢွတ်း။ မိူၼ် ၼင်ႇၶေႃႈၼႆ့တႄ့ မႄးလႆႈၵႃႊႁိုဝ် ၶႅမ့်ၵႃႊၼၼ့်ယဝ့်။

ၵဵဝ်ႇၵပ်းလိူၺ်ႈ ဢၼ်ဢဝ်ၵႂၢမ်းၾိင်ႈ မႄးဢတ်းၸွမ်းသဵင်ၵၢပ်ႈမိူင်း မႂ်ႇၼၼ့် လႆႈလၢႆးတၢင်းဝူၼ့်မႂ်ႇမၼ်းမႃးၸိူင့်ႁိုဝ်?

 လႆႈၵႂႃႇၺႃးၸၢႆးၶမ်းလႅင်ႊ တီႈမိူင်းၶွၼ်(မိူင်းတႆးတႂ်ႈၶူင်း) မၼ်းပဵၼ်ၵူၼ်းသုတ်းႁဵၼ်း တီႈၸၼ့်ၸွမ် ၾၢႆႇပၢႆးမွၼ်းၽဵင်းၵႂၢမ်းၸၢဝ်းၶိူဝ်းဢေႇ ၼႂ်းၸိုင်ႈပွင်ႊႁင်းၵူၼ်းမိူင်းၶႄႇမႃး။ မၼ်းၶႆႊၼေဝႃႈ မိူၼ်ၼင်ႇ ၽဵင်းၵႂၢမ်း “မိူင်းတႆးပဵၼ်မိူင်းၶွၼ်ႈ” ၼႆ့ ထွမ်ႇမိူဝ်ႈလႂ်မႂ်ႇမိူဝ်ႈၼၼ့် ၵွပ်ႈဝႃႈ မၼ်းပႃးဢၢႆႊတႆးႁဝ်း။ ႁဝ်းၵေႃႈ ၸင်ႇလႆႈလၢႆးတၢင်းဝူၼ့်မၼ်းႁေ တႅမ်ႈတူၺ်း “ၾိင်ႈမၢၵ်ႇႁူဝ်ၸႂ်ၶိူဝ်းတႆး”။ ဝၢႆးလိုၼ်းမႃး ၸိူဝ်းႁဝ်းတႅမ်ႈမႃးၼၼ့် ယၢမ်ႈဢဝ်ၵႂႃႇ​ၼႄၸၢႆးၶမ်းလႅင်ႊ ၵမ်ႈၽွင်ႈယူႇ။ ဢၢႆႇတီႇယိူဝ်ႇၽႂ်မၼ်းဢိူဝ်ႈၼေႃႈ။ ႁဝ်းသမ့် ၶႂ်ႈႁႂ်ႈမၼ်း ပႃးဢၢႆႊၼမ့်လိၼ်ႁိၼ်ၽႃထုင့်မၢဝ်း။ မိူၼ်ၼင်ႇ ပေႃးပိူၼ်ႈမႃးလႄႇထုင့်မၢဝ်းၼႆ ယၢမ်ႈလႆႈငိၼ်းသဵင်ၵႂၢမ်းထုင့်မၢဝ်း။ မိူၼ်ၼၼ် ႁႃးၵေႃႈ ၶႂ်ႈႁႂ်ႈမၼ်းလႆႈပႃးၼႂ်းၽဵင်းႁႃး။ သဵင်ၾိင်ႈပၢၼ်ၵဝ်ႇႁဝ်း ဢဝ်မႃးသႂ်ႇၼႂ်းသဵင်ပၢၼ်မႂ်ႇၼႆ့ မၼ်းယုၵ့်ႁႂ်ႈၾိင်ႈႁဝ်းၶိုၼ်ႈသုင်မႃးဢိူဝ်ႈ။ မိူၼ်ၼင်ႇလၢႆးတွၺ်ႇၵေႃႈ ႁႃးသမ့် ၶႂ်ႈႁႂ်ႈမၼ်းပဵၼ် New version သေ ၶိုတ်းၵၢပ်ႈ။ လွင်ႈႁၼ်ထိုင်ဢၼ်ၼႆ့ ၵူၼ်းၵူႊၵေႃ့တေ ဢမ်ႇမိူၼ်ၵၼ်သႄႈ။

ပၢႆးမွၼ်းၽဵင်းၵႂၢမ်းၼႆ့ ႁၼ်ထိုင်ၸိူင့်ႁိုဝ်?

 ပၢႆးမွၼ်းၽဵင်းၵႂၢမ်းၼႆ့ ႁၼ်ထိုင်ဝႃႈ ပဵၼ်တၢင်းၵိၼ်မၢၵ်ႇႁူဝ်ၸႂ် တႃႇၵူၼ်းႁဝ်းဢၼ်ၼိူင်ႈဢိူဝ်ႈ။ ၸိူဝ်းမၵ့်ဢူၼ်ႈမၵ့်ၶႅင်၊ မၵ့်သူမ်ႈမၵ့်ဝၢၼ်ၵေႃႈ မီးၼႂ်းပၢႆးမွၼ်းၽဵင်းၵႂၢမ်းယူႇ။ ယဝ့်ၵေႃႈ မၼ်းၵမ့်ထႅမ်ပၼ် တူင်ႇဝူင်းၵူၼ်း ႁႂ်ႈႁၢင်ႊလီတင်းၼမ်။ 

ၼႂ်းၽူႈပၢႆးမွၼ်းတင်းၼမ်ၼၼ့် ထၢင်ႇယႂ်ႇၽႂ်သေပိူၼ်ႈ?

 ၾၢႆႇတႅမ်ႈတႄ့ တေလႆႈဝႃႈ ၸၢႆးၶမ်းလဵၵ်းဢိူဝ်ႈ။ ၾၢႆႇႁွင့်တႄ့ သၶႁ ယဝ့်။ 

ယူႇတီႈပဵၼ်ၸဝ်ႈပၢႆးမွၼ်းၵေႃ့ၼိူင်ႈသေ ၸွင်ႇမီးၽႅၼ်ပူၵ်းပွင်လုၵ်ႈ လၢင်းၵၢင်တဝ်ႈ ႁႂ်ႈမီးၸႂ်ႁၵ့်သႃပၢႆးမွၼ်းယူႇႁိုဝ်?

 ႁဝ်းဝႃႈ လုၵ်ႈဢွၼ်ႇၼႆ့ သင်လႆႈၽိုၵ်းပၼ်ၶဝ် ၸဵမ်မိူဝ်ႈလဵၵ့်ၼႆ ၶဝ်ၵေႃႈ တေတိူဝ်းႁူ့လွင်ႈပၢႆးမွၼ်းၽဵင်းၵႂၢမ်းၼေႃႈ။ မိူဝ်ႈလဵဝ်ၵေႃႈ ႁႂ်ႈၶဝ်ႁဵၼ်းသွၼ် Piano ဝႆ့ယူႇ။ မိူၼ်ၼင်ႇ ပီႇၼမ့်တဝ်ႈတႆးႁဝ်းၵေႃႈ ပဵၼ်ၶွင်တႆးႁဝ်းယႃႇယႃႇ ပေႃးႁဝ်းဢမ်ႇဢွၼ်ၵၼ်သူင် ဢမ်ႇဢွၼ်ၵၼ်ယူင်ၼႆ  ဝၢႆးမႃး တေပဵၼ်ၶွင်ၶႄႇၵႂႃႇယဝ့်။

ၶႆႊၼႄ ယိူင်းဢၢၼ်းဝၼ်းမိူဝ်းၼႃႈဢိတ်းၼိူင်ႈ?

 ယိူင်းဢၢၼ်းႁဝ်းတႄ့ ၸိူဝ်းဢၼ်သဵင်ၾိင်ႈႁဝ်းၸိူဝ်းၼၼ့် ယူႇတီႈတူဝ်ႁဝ်း ႁဝ်းတေၶတ်းၸႂ်ႁဵတ်းၵႂႃႇ ႁႂ်ႈမၼ်းပႃးၵူႊၶႅပ်း။ သဵင်တႆးတီႈလႂ်ဢမ်ႇဝႃႈ၊ မိူဝ်ႈလဵဝ်ယင်းႁဵတ်းဝႆ့ယူႇ ၸၢႆးၶမ်းလႅင်ႊသႂ်ႇလမ်ႇမၼ်းသေ ႁႃးသမ့်တႅမ်ႈၶေႃႈမၼ်း။ ဢၢႆႊတႆးထုင့်မၢဝ်းၵေႃႈတေပႃး၊ ၵႂၢမ်းမၢၵ်ႇမိူင်းၶွၼ်သမ့်တေပႃး သွင်ၽဵင်း၊ ပီႇၼမ့်တဝ်ႈၵေႃႈ ႁဝ်းပဝ်ႇဝႆ့ၼင်ႇၵဝ်ႇ။ ၵူၼ်းၼုမ်ႇၵေႃႈ ဢၼ်ၶဝ်လႆႈၸႂ်ၼၼ့်သမ့် ပဵၼ်မဵဝ်းၼိူင်ႈ၊ ဢၼ်ၶဝ်လႆႈၸႂ်ၼၼ့် ဢမ်ႇသႂ်ႇႁႂ်ႈၵေႃႈ ဢမ်ႇလႆႈ။ ထႅင်ႈၽၢႆႇၼိူင်ႈ တေႁဵတ်းသဵင်ၾိင်ႈ တၢင်တူဝ်ၼမ့်လိၼ်ႁိၼ်ၽႃႁဝ်းသေ ၶႂ်ႈႁႂ်ႈမၼ်းမၼ်ႈၵိုမ်းဝႆ့။ ပေႃးထွမ်ႇမႃးၼႆ ၶႂ်ႈႁႂ်ႈမၼ်းပႅၵ်ႇဝႆ့၊ ပိူၼ်ႈမႃးယိူင်ႈႁဝ်းၵေႃႈ မၼ်းဢမ်ႇယိူင်ႈလႆႈ။ ၵူၼ်းၼွၵ်ႈမိူင်းတေ့တေ့ၼႆ့ ၶႂ်ႈထွမ်ႇၽဵင်းဢၼ်ပႃးဢၢႆႊၾိင်ႈၸၢဝ်းၶိူဝ်းၵွၺ်း။ လွင်ႈၼႆ့ ႁဝ်းယင်းၶႂ်ႈႁႂ်ႈၼႂ်းမူႇၸေႊၼႆ့ မီးပၢင်သွၼ်သေ ႁပ့်ၸၢႆးၶမ်းလႅင်ႊ မႃးသွၼ်ပၼ်ၵွၼ်ႇ။

ၶၢဝ်းတၢင်းပွၺ်းသွၼ်းၼမ့်မိူင်းထႆးပီႊ (ပီႊ 2012)ၼႆ့ ပဵၼ်ၸိူင့်ႁိုဝ်?

 ႁဝ်းယူႇတီႈႁိူၼ်းႁေ ဢမ်ႇလၢမ်းလႆႈဝႃႈ ပရိတ်ႈသၢတ်ႈတၢင်းၵႆ တေမီးႁႃ့ဢမ်ႇမီးၼႆၼေႃႈ။ မိူဝ်ႈၸဝ့်တႄ့ လွမ်လွမ်ၸႂ်လဵၵ့်ထႃႈဝႆ့ယူႇၼင်ႇၵဝ်ႇ။ ၵူၺ်းၵႃႊ ၶိုၼ်းဝူၼ့်ဝႃႈ ၵူၼ်းယႂ်ႇဢမ်ႇသူင်ၵေႃႈ ၵူၼ်းၼုမ်ႇတေသူင်ယူႇၵႂႃႈ။ ႁဝ်းၵႂႃႇတီႈ ၸဵင်းမႂ်ႇၵေႃႈ ၵူၼ်းၼမ်။ တီႈမိူင်းၵွၵ်ႇၵေႃႈ ၶႅမ့်တေ့တေ့ယူႇ။ မိူဝ်ႈၵႂႃႇႁွင့်တီႈၼၼ့် လႆႈႁၼ်ပရိတ်ႈသၢတ်ႈ ႁွင့်ၸွမ်းၽဵင်းႁဝ်း ဢၼ်ၸိူဝ်းႁဝ်းၵႆ့ႁွင့်ၼိူဝ်ၶဵင်ႇမႃးလႄႈ ႁဵတ်းႁႂ်ႈႁဝ်းမီးႁႅင်းၸႂ်တေ့တေ့။ ႁႅင်းၸႂ်ဢီႈသင်ဢၼ်ဝႃႈၼၼ့် ၶႂ်ႈၶတ်းၸႂ်ၶူင်ႊတႅမ်ႈၶေႃႈလမ်ႇႁဝ်းၼမ်ၼမ်။ ႁဝ်းၵေႃႈ မီးတၢင်းယုမ်ႇယမ်တူဝ်ၵဝ်ႇမႃးတင်းၼမ်။ ယဝ့်ၵေႃႈ ယိၼ်းၸူမ်းထိုင်ပီႈၼွင့် ထုင့်မၢဝ်း၊ ပီႈၼွင့်ၼႂ်းမိူင်းတႆး၊ ပီႈၼွင့်ၼႂ်းမိူင်းၼွၵ်ႈမိူင်း ၸိူဝ်းပၼ် ႁႅင်းၼၼ့်တေ့တေ့ယူႇ။

တွၼ်ႊတႃႇပီႊမႂ်ႇတႆး ႒႑႐႗ ၼီႈ တေမႃးၼၼ့် မီးၽႅၼ်တေၵႂႃႇႁွင့် ၽဵင်းတၢင်ႇတီႈယူႇႁိုဝ်။

 လႆႈငိၼ်းဝႃႈ ပီႈၼွင့်မိူင်းၵွၵ်ႇၶဝ် တေႁွင့်မႃးၼႆဢိူဝ်ႈ။ ၵူၺ်းၵႃႊ ပႆႇ ႄ့ၼွၼ်းၼင်ႇၵဝ်ႇ။ ၵွပ်ႈဝႃႈ မၼ်းတိုၵ့်ၵႆယူႇ။ ပီႊပူၼ့်မႃးၼႆ့တႄ့ ႁဝ်းၵႂႃႇႁွင့်တီႈ ႁုင်းမၢၵ်ႇလၢင်း တၢင်းၸေႊတိူင်းၸေႊၵႅင်း ၼၼ့်ဢိူဝ်ႈ။ ဢၼ်လႆႈၵႂႃႇႁွင့်မႃးၼႆ့တႄ့ ႁုင်းမၢၵ်ႇလၢင်း၊ မၢၼ်ႈမူဝ်ႇ(ၸေႊမိူင်းၶၢင်)၊ မိူင်းလႃး၊ မိူင်း Singapore၊ ၵဵင်းမႂ်ႇ၊ မိူင်းၵွၵ်ႇ ၸိူဝ်းၼႆ့။

ၸွင်ႇမီးၽႅၼ် ႁႂ်ႈလုၵ်ႈၸၢႆးဢတ်းၵႂၢမ်းထႅင်ႈႁိုဝ်?

 ၼႂ်းၶႅပ်းတေမႃးၼႆ့ ႁႂ်ၶဝ်ဢတ်းဝႆ့ ၽဵင်းၵႂၢမ်း “ပေႃႈ” ဢိူဝ်ႈ။ ႁဝ်းၶႂ်ႈႁႂ်ႈၶဝ် တႄႇတီႈပေႃႈမႄႈၵႂႃႇၼၼ့်ၼႃႇ။ 

ပေႃးၶႂ်ႈၵပ်းသိုပ်ႇၸၢႆးသႅင်ၸွမ်ၾႃ့ၼႆ။

 မၢႆႁိူၼ်း (42) ႁၢဝ်းၵၢတ်ႇၵၢင်ၶမ်ႈ၊ ပွၵ့်ၵၢတ်ႇ၊ ဝဵင်းမူႇၸေႊ။ ၸိုဝ်ႈ ႁၢၼ့် “Power24” ။ မၢႆၵပ်းသိုပ်ႇ - 082-52355

Email: sengzawmfah@gmail.com