ၸၢႆးႁၢၼ်လႅင်း

ႁူပ့်ထူပ်းတွင်ႈထၢမ် ၸၢႆးႁၢၼ်လႅင်း

ငိၼ်းၶၢဝ်ႇဝႃႈ ၽူႈႁွင့်ၵႂၢမ်းၸိုဝ်ႈသဵင်လိုဝ်းလင်ႊ ၸၢႆးႁၢၼ်လႅင်း ၽႅဝ်ထုင့်မၢဝ်းဝႆ့ၼႆလႄႈ မိူဝ်ႈဝၼ်းတီႈ 20 လိူၼ် ဢွၵ်ႇထူဝ်ႇပႂ်ႇ 2011 ၼၼ့် ၸၢႆးမႅတ်ႈဢွင်ႇ လႄႈ ၸၢႆးၶိူဝ်းမၢဝ်း ပဵၼ်တူဝ်တႅၼ်းၽိုၼ်ၶၢဝ်ႇမွၵ်ႇမႂ်ႇ(မူႇၸေႊ)သေ ၸင်ႇလႆႈၵႂႃႇႁူပ့်ထူပ်းတွင်ႈထၢမ် လိူၺ်ႈလွင်ႈၵၢၼ်ပၢႆးမွၼ်း ၸၢႆးႁၢၼ်လႅင်း ယူႇယဝ့်။

ၸၢႆးႁၢၼ်လႅင်းၼႆ့ ၸိုဝ်ႈမိူဝ်ႈလဵၵ့်ႁႃ့၊ ၸိုဝ်ႈပၢႆၵမ်? ၸၢႆးႁၢၼ်လႅင်း ၶဝ် မီးပီႈ ၼွင့်ႁူမ်ႈၵၼ်လၢႆၵေႃႈၶႃႈ?

ၸိုဝ်ႈၸၢႆးႁၢၼ်လႅင်း ဢၼ်ဢွၵ်ႇမႃးၼႂ်းပၢႆးမွၼ်းၼႆ့ ပဵၼ်ၸိုဝ်ႈပၢႆၵမ်ၵွၺ်းၶႃႈ။ မိူဝ်ႈလဵၵ့် ၸိုဝ်ႈၸၢႆးၵျေႃႇ။ မီးသၢမ်ၵေႃ့ပီႈၼွင့်၊ ႁဝ်းပဵၼ် ၵေႃ့လိုၼ်းသုတ်း။

တႄႇသူၼ်ၸႂ် လွင်ႈပၢႆးမွၼ်းမႃး မိူဝ်ႈလႂ်ၶႃႈ?

ၸဵမ်မိူဝ်ႈ တိုၵ့်ႁႃလႆႈၵဝ်ႈပီႊသိပ်းပီႊ ၼၼ့်ဢေႃႈ၊ ယဝ့်ၵေႃႈ ၶႃႈၽိုၵ်းတွၺ်ႇတိင်ႇမႃး ၸဵမ်မိူဝ်ႈတိုၵ့်ႁႃလႆႈ သိပ်းပီႊၼၼ့်ၵွၺ်း ၼင်ႇၵဝ်ႇယဝ့်။

ဢွၼ်တၢင်းပႆႇဢွၵ်ႇၶႅပ်းၵႂၢမ်းၼၼ့် ယၢမ်ႈတႄႇၶိုၼ်ႈၼိူဝ်ၶဵင်ႇႁွင့်ၵႂၢမ်းမႃး မိူဝ်ႈလႂ်ၶႃႈ?

မိူဝ်ႈၶႃႈတႄႇၶဝ်ႈၼႂ်းပၢႆးမွၼ်း ၸၼ့်ဢွၼ်ႇ၊ ၸၼ့်လဵၵ့် ၶႃႈၼေႃႈ၊ မိူဝ်ႈပႆႇဢွၵ်ႇၶႅပ်းၵႂၢမ်းၼၼ့် ၵွပ်ႈႁဝ်းၶႃႈ မီးၸုမ်းႁႆႇတိုင်ႈႁဝ်းၶႃႈႁေလႄႈ တင်ႈၸိုဝ်ႈ ၸုမ်း “မၢၵ်ႇႁွၺ်ႇၶမ်း” တီႈမိူင်းလဵၼ်း၊ ႁႆႇတိုင်ႈ တီႈမီးပွၺ်းပၢင်ၶႅၵ်ႇ၊ ၼႂ်းဝၢၼ်ႈၼႂ်းၶူင်ႇ၊ ၼႂ်းဝတ့်ၼႂ်းၵျွင်းတီႈလႂ်ဢမ်ႇဝႃႈၶႃႈၼေႃႈ ႁႆႇတိုင်ႈမႃး ၸဵမ်မိူဝ်ႈ တိုၵ့်လႆႈ 20 ၶူပ်ႇၼၼ့်ယဝ့်။

ၶႅပ်း(1)ၼၼ့် မီးတိုဝ့်တၢင်းၸိူင့်ႁိုဝ်သေႁဵတ်းမႃးၶႃႈ?

ဢွၼ်တၢင်းသုတ်း ဢွၵ်ႇၶႅပ်းၵႂၢမ်း သေလၢႆမိူဝ်ႈဝၼ်း သိုၼ်း ၼၼ့်ၼႆ ၵႂၢမ်းၸိူဝ်းၼၼ့် လႆႈတႅမ်ႈဝႆ့ ၸဵမ် မိူဝ်ႈၵေႃ့လဵၵ့်ၶႃႈဢေႃႈ၊ လႆႈၶတ်းၸႂ်တႅမ်ႈမႃး ၵူၺ်းၵႃႊပၢႆးမၢၵ်ႈမီးဢမ်ႇတဵမ်ထူၼ်ႈသေတႃ့ၵေႃႈ ဢၼ်ၸႂ်မုင်ႈမွင်းၼၼ့် တိုၼ်းမီးမႃးၸဵမ်မိူဝ်ႈလႂ်လူးၼေႃႈ၊ လႆႈတႅမ်ႈၵႂၢမ်းဝႆ့ မီးယူႇတႃႇသိပ်းပၢႆ၊ ဝၢႆးသေၼၼ့် မီးၶၢဝ်းယၢမ်းႁေ၊ ႁၼ်သဵၼ်ႈတၢင်းမၼ်းဢိတ်းဢွၼ်ႇဢိတ်းဢီႈသေလႄႈ ပႆၶဝ်ႈမႃး၊ လႆႈဢတ်းမႃးဢေႃႈ။

ႁွင့်ၼႂ်း Studio လႄႈ ႁွင့်ၼိူဝ်ၶဵင်ႇၼႆ့ ပႅၵ်ႇၸိူင့်ႁိုဝ်?

မၼ်းပိူင်ႈၵၼ်ၶႃႈဢေႃႈ၊ ဢၼ်ႁဝ်းႁွင့်တၢင်းၼွၵ်ႈ ၸွမ်းပၢင်ပွၺ်းဢမ်ႇဝႃႈ ၼိူဝ်ၶဵင်ႇမူၼ်ႊသိူဝ်းဢမ်ႇဝႃႈ မၼ်း ႁွင့်ၵေႃႈ ႁွင့်ၵႂႃႇလၢႆလၢႆ လွင်ႈၽိတ်းလွင်ႈထုၵ်ႇ တၢင်းဢဝ်ၶေႃႈ၊ လမ်ႇသဵင်၊ ၼဵၼ်မၼ်းၸိူဝ်းၼၼ့်ၼႆၸိုင် ဢမ်ႇမီးၽႂ်ၸွမ်းႁူ့၊ ဢမ်ႇမီးၽႂ်ထတ်းၸွမ်းၶႃႈၼႃႇၼေႃႈ၊ ဢမ်ႇမိူၼ်ႁဝ်း ႁွင့်ၼႂ်း Studio၊ ႁဝ်းႁွင့်ၼႂ်းStudio ၼႆ့ သင်ဝႃႈ မၼ်းၽိတ်းၼႆ ႁူ့လီၼႃႇလႄႈ လႆႈၾၢင့်သတိ တေ့တေ့ဝႃႈဝႃႈဢေႃႈ။

ပီႈၼွင့်ၽူႈထွမ်ႇငိၼ်းႁဝ်းၶဝ် လႆႈႁူ့ၸၵ်း ၸၢႆးႁၢၼ်လႅင်းၵႂႃႇၼၼ့် တေၸၢင်ႊပဵၼ်ၶႅပ်းလႂ်၊ ၽဵင်းႁူဝ်လႂ်ၶႃႈ?

ၶႅပ်း "သေလၢႆမိူဝ်ႈဝၼ်းသိုၼ်း"ၼၼ့်တႄ့ ၵူၼ်းသူင်မၵ့် ၵူၼ်းသူင်ႁွင့်မၼ်း တေဢမ်ႇပေႃးၵႃႊႁိုဝ်ၶႃႈ၊ ၼႂ်းဝူင်ႈဝၢင်ႈၼၼ့် လႆႈႁွင့်ၸွမ်းဢူၺ်းၵေႃ့ၶဝ်ၸိူဝ်းၼႆ့ မီးလၢႆၶႅပ်းယူႇ ၵူၺ်းၵႃႊ ဢမ်ႇလၢတ်ႈထိုင်ယဝ့်ၶႃႈၼေႃႈ၊ ပူၼ့်မႃးၽႅဝ် ၶႅပ်း"ၸႂ်ႁၵ့်တီႈၵႆ" ၼၼ့် ၽူႈႁၵ့်ၵႂၢမ်းၽူႈသူင်ၵႂၢမ်းၼႆ့ၵေႃႈ တေလႆႈဝႃႈ ႁူ့ၸၵ်းၸၢႆးႁၢၼ်လႅင်းမႃး ၼႂ်းၶႅပ်းၼၼ့်ယဝ့်ၶႃႈ။

ယၢမ်ႈဢွၵ်ႇၶႅပ်းၵႂၢမ်းမႃး လၢႆၶႅပ်းယဝ့်ၶႃႈ?

ၶႅပ်းဢွၼ်တၢင်းသုတ်း ပဵၼ် သေလၢႆမိူဝ်ႈဝၼ်းသိုၼ်း၊ ၶႅပ်းတီႈသွင် မွင်းဝၼ်းႁူ့ထိုင် ႁွင့်ၸွမ်းၼၢင်းၵဵင်ႁွမ်(တႃႈၶီႈလဵၵ်း)၊ ၶႅပ်းတီႈသၢမ် ႁွင့်ၸွမ်းၵၼ်သီႇၵေႃ့ၶႃႈ ၸၢႆးၼွၺ့်ငိုၼ်း၊ ၸၢႆးသၢမ်တိပ့်၊ ၼၢင်းၼွင့်ၸၢမ် မီးၸိုဝ်ႈဝႃႈ လုၵ်ႈၵေႃ့ပေႃႈမႄႈမႄႈ၊ OKလႆႈယူႇ ႁွင့်ၸွမ်းၵၼ်သီႇၵေႃ့၊ ပႂ့်ထႃႈၼၢင်းယူႇ ႁွင့်ၸွမ်းၼၢင်းသႅင်ဢွၼ်ႇ၊ သေလၢႆဝၼ်းပူၼ့်၊ ၵမ်းလိုၼ်း ဢွၵ်ႇမႃး မွၵ်ႇဢၼ်ၼၢင်းတွၼ်ႈ ယဝ့်ၶႃႈ။

ဢွၵ်ႇမႃးၼႂ်းၵူႊၶႅပ်းၼၼ့် ဢၼ်လႆႈဢဝ်ႁူဝ်ၸႂ်ယိၼ်းႁေတႅမ်ႈမႃးၼၼ့် တေၸၢင်ႊပဵၼ်ႁူဝ်လႂ်ၶႃႈ?

ၵမ်ႈၼမ်တႄ့ ၶႂ်ႈမႅၼ်ႈဢဝ်ၵူႊႁူဝ်ယဝ့်ၶႃႈ။

ၽဵင်းၸိူဝ်းလႂ် ႁၢၼ့်ၸႂ်လိူဝ်သေပိူၼ်ႈ?

ၸႂ်ႁၵ့်တီႈၵႆ၊ သေလၢႆဝၼ်းပူၼ့်၊ မွၵ်ႇဢၼ်ၼၢင်းတွၼ်ႈ၊ သၢႆၾူၼ် ၸိူဝ်းၼႆ့ဢေႃႈ။

ၽဵင်းၵႂၢမ်း ဢၼ်ၸၢႆးႁၢၼ်လႅင်းႁဝ်း ႁွင့်မႃးၼႆ့ ပဵၼ်တၢမ်တူဝ်တႅမ်ႈႁႃ့၊ ဢမ်ႇၼၼ် ပဵၼ်ၽႂ်တႅမ်ႈပၼ်ၶႃႈ?

ၵမ်ႈၼမ်တႄ့ တႅမ်ႈႁင်းၵူၺ်းၶႃႈ၊ မိူဝ်ႈၶႅပ်း "ၸႂ်ႁၵ့်တီႈၵႆ" ၼၼ့် မီးတႆးၵေႃ့ၶဝ် မိူၼ်ၼင်ႇ သိူဝ်ၶမ်းႁၢၼ် ၶဝ်ၸိူဝ်းၼႆ့တႅမ်ႈပၼ်ၽွင်ႈ၊ ထိုင်မႃး "မွၵ်ႇဢၼ်ၼၢင်း တွၼ်ႈ" ၼႆ့ၵေႃႈ ပႃးၽဵင်း ၸၢႆးသႅင်ၸွမ်ၾႃ့ လႄႈ ၸၢႆးဢွင်ႇထီးၶမ်း ၶဝ်ၵွၼ်ႇဢေႃႈ။

လႆႈဢတ်းသဵင်မႃးတီႈ Studio လႂ်လၢႆလၢႆၶႃႈ?

တီႈမႄႈသၢႆ မိူင်းထႆး၊ ႁိမ်လႅၼ်ႊလိၼ်တႃႈၶီႈလဵၵ်းၶႃႈ။

ၸိုဝ်ႈ Studio လူး ဝႃႈၸိူင့်ႁိုဝ်ၶႃႈ?

တႆး Studio ၼႆၶႃႈဢေႃႈ။

ၶႂ်ႈၾၢၵ်ႇထိုင် ပီႊၼွင့်ၽူႈထွမ်ႇငိၼ်းႁဝ်းၶဝ် ဢၼ်ပၼ်ဢဵၼ်ပၼ်ႁႅင်းၸၢႆးႁၢၼ်လႅင်းၼၼ့် မီးၸိူင့်ႁိုဝ်ၶႃႈ?

မိူၼ်ၼင်ႇမဵတ့်ၾူၼ် ဢၼ်တူၵ်းလူင်းမႃးၼၼ့်ၶႃႈၼႃႇ၊ ပေႃးၾူၼ်ဢမ်ႇမႃးၵေႃႈ ဢမ်ႇမီးၼမ့်ၼေႃႈ၊ ဢမ်ႇၸႂ်ႈဝႃႈ ၸၢႆးႁၢၼ်လႅင်းၵေႃ့လဵဝ် ၸဝ်ႈပၢႆးမွၼ်းၵူႊၵေႃ့ၵေႃ့ ယုမ်ႇယမ်ဝႃႈ ဝၼ်းၼိူင်ႈမႃး ပီႈၼွင့်ႁဝ်းၶဝ် တေသိုဝ့်ပၼ် ၶႅပ်းတေ့ Master မၼ်းယူႇၼႆ ဝူၼ့်ဝႆ့တႃႇသေႇၶႃႈ၊ ၵူၺ်းၵႃႊ ပၢင်ပွၺ်းပၢင်လႂ်ၵေႃႈ ႁဝ်းၶႃႈ ယၢမ်ႈတုၵ်းယွၼ်းယူႇသေႇသေႇ ၸိူဝ်းဢၼ်ပီႈၼွင့်ႁဝ်း ၸိူဝ်းဢၼ်ပၼ်ႁႅင်းၶႅပ်းပွမ်၊ ၶႅပ်းၵႅၵ်းၵေႃႈမီးယူႇတႃႇသေႇ၊ ႁဝ်းၶႃႈတုၵ်းယွၼ်းမႃးႁိုင်ၵႃႊႁိုဝ်ၵေႃႈ ၽူႈထွမ်ႇၵႂၢမ်းၸိူဝ်းဢၼ်ဢမ်ႇပွင်ႇၸႂ်ၼၼ့် တိုၼ်းဝႃႈဢမ်ႇပွင်ႇၸႂ်သေလႄႈ ဢၼ်ပွင်ႇၸႂ်ၼၼ့်တႄ့ Percent မၼ်း မီးယူႇမွၵ်ႈသၢမ်သီႇသိပ်း၊ တႃႇတေလႆႈၵဝ်ႈသိပ်းၼၼ့် ၸဝ်ႈပၢႆးမွၼ်းၵူႊၵေႃ့ မုင်ႈမွင်းႁႂ်ႈပီႈၼွင့်ၽူႈသူင်ၵႂၢမ်းၶဝ် ပွင်ႇၸႂ်ယူႇၶႃႈဢေႃႈ။ မိူၼ်ၼင်ႇ ႁဝ်းၶႃႈၸဝ်ႈပၢႆးမွၼ်းၸိူဝ်းၼႆ့ ပေႃးဝႃႈဢမ်ႇမီးၵူၼ်းပၼ်ႁႅင်းၼႆ ႁဝ်းၶႃႈၵေႃႈ ဢမ်ႇၸၢင်ႊႁွင့်ဢွၵ်ႇမႃးၼႆ့ထႅင်ႈၶႃႈ။ သင်ၸိူဝ့်ဝႃႈ ၽူႈသူင်ထွမ်ႇၵႂၢမ်းၶဝ် ပၼ်ႁႅင်းၶႅပ်းပွမ်ယူႇတိၵ်းတိၵ်းၼႆၸိုင် ဢဵၼ်ႁႅင်းတႃႇမႃးထႅမ်ၶိုၼ်း ႁႂ်ႈၸဝ်ႈပၢႆးမွၼ်းၶဝ် မီးႁႅင်းၸႂ်ႁဵတ်းၶႅပ်းဢွၵ်ႇမႃးထႅင်ႈၼၼ့် တေယၢပ်ႇယူႇၶႃႈ၊ လွင်ႈၼႆ့ ၶႃႈၶႂ်ႈတုၵ်းယွၼ်းထိုင်ၽူႈသူင်ထွမ်ႇၵႂၢမ်းႁဝ်းၶဝ်တေ့တေ့ဝႃႈဝႃႈယူႇၶႃႈ။

တွၼ်ႊတႃႇ ၸိူဝ်းသႅၼ်းမႂ်ႇ ၵူၼ်းၼုမ်ႇၸိူဝ်းသူင်ၸႂ်ပၢႆးမွၼ်း တေၶိုၼ်ႈမႃးၼၼ့် ၶႂ်ႈပၼ်တၢင်းႁၼ်ထိုင် ၸိူင့်ႁိုဝ်ၶႃႈ၊ ၼင်ႇႁိုဝ် ၶဝ်တေဢမ်ႇထူပ်းလွင်ႈယၢပ်ႇၼၼ့် ၶႂ်ႈၸီ့ၼေၸိူင့်ႁိုဝ်?

လွင်ႈဢၼ်ၵူၼ်းမႂ်ႇမႂ်ႇ တေမီးဢဵၼ်ႁႅင်းႁဵတ်းသိုပ်ႇ ၵႂႃႇၶၢဝ်းယၢဝ်းၼၼ့် ပေႃးဝႃႈႁဝ်းဢမ်ႇႁဵတ်းဝႆ့မိူဝ်ႈၼႆ့ၼႆ ဝူၼ့်ဝႆ့ဝႃႈတေယၢပ်ႇယူႇၶႃႈ၊ ဝၼ်းၼိူင်ႈမႃး ႁဝ်းၵေႃႈတေထဝ်ႈၵႂႃႇႁင်းၽႂ်ႁင်းမၼ်းလူးၼေႃႈ၊ ၵွပ်ႈသင်လႄႈဝႃႈၼႆ ၽၼ်ၵူႊလွင်ႈလွင်ႈ ၵူႊမဵဝ်းမဵဝ်းၸိူဝ်းၼၼ့် ႁဝ်းၶႃႈႁၢင်ႈႁႅၼ်းဝႆ့လႄႈ ဝၼ်းမိူဝ်ႈၼႆ့ တေၶတ်းၸႂ်ႁဵတ်းဝႆ့ပၼ်တႃႇၵူၼ်းတၢင်းလင်ႁဝ်း ပေႃးလႆႈမီးၼမ့်တွၼ်းၽွၼ်းလီၵွပ်ႈပၢႆးမွၼ်းၼႆ့ၵေႃႈ ဝူၼ့်ဝႆ့ယူႇၶႃႈ၊ မိူၼ်ၸိူင့်ၼင်ႇဝႃႈ ႁဝ်းၶႃႈထုၵ်ႇၽိတ့်ႁွင့်ၵႂႃႇႁွင့်ပွၺ်းသုၼ်ႇႁူမ်ႈ ဢမ်ႇၸႂ်ႈ ပွၺ်းသုၼ်ႇတူဝ်ၼၼ့် ၵႃႊၶၼ်ၽူႈႁွင့်ၵႂၢမ်းၼၼ့် ႁဝ်းၶႃႈ ၵိုင်ႇလီႁဵတ်းဝႆ့ ၶၼ်မၼ်း ႁင်းၽႂ်ႁင်းမၼ်းယူႇၶႃႈ၊ သင်ၸိူဝ့်ဝႃႈ ႁဝ်းဢမ်ႇယိုၼ်ယၼ်ၶၼ်မၼ်းဝႆ့ၼႆ တႃႇလုၵ်ႈဢွၼ်ႇဢၼ်တေမႃး ဝၼ်းမိူဝ်းၼႃႈၼၼ့် တေယၢပ်ႇယူႇတေ့တေ့ၶႃႈ၊ ၵွပ်ႈၼႆ ႁဝ်းလူဝ်ႇႁဵတ်းဝႆ့ဝၼ်းမိူဝ်ႈၼႆ့ၶႃႈ၊ ဢၼ်ႁဝ်းၶႃႈ တူၵ်းသုမ်းမႃး ထိုင်ဝၼ်းမိူဝ်ႈၼႆ့ ၵွပ်ႈသင်ၼႆ ၵူၼ်းၸိူဝ်းဢၼ်ႁဵတ်းမႃးဢွၼ်တၢင်းႁဝ်းၼၼ့် ဢမ်ႇလႆႈႁဵတ်းၶၼ်မၼ်းဝႆ့ၶႃႈ ၵွပ်ႈၼႆ ၶႂ်ႈဝႃႈလူ့ယူႇၵူႊပွၵ်ႈၶႃႈ၊ ၶၼ်ၵေႃႈဢမ်ႇတဵမ်၊ ၶႂ်ႈဝႃႈ ႁဝ်းၶႃႈၸဝ်ႈပၢႆးမွၼ်းၵူႊၵေႃ့ၼႆ့ ၶႂ်ႈမီးၵႃႊတူဝ်ၽႂ်မၼ်းယူႇၵူႊၵေႃ့ၶႃႈ။ ဢၼ်ၼႆ့ယဝ့် သင်ၸိူဝ့်ဝႃႈ ႁဝ်းႁဵတ်းလႆႈဝၼ်းမိူဝ်ႈၼႆ့ၼႆ လုၵ်ႈဢွၼ်ႇဢၼ်ၶတ်းၸႂ်ႁေလႄႈ မီးၼမ့်ၸႂ်ႁဵတ်းဢွၵ်ႇၶႅပ်းၵႂၢမ်း သူင်ႁွင့်ၵႂၢမ်းၸိူဝ်းၼႆ့ ၶဝ်ၵေႃႈတေမီးႁႅင်းၸႂ် လိုပ်ႈလမ်းၸွမ်းလင်မႃးၶႃႈ။

တွၼ်ႊတႃႇပီႈၼွင့်ၽူႈထွမ်ႇငိၼ်းႁဝ်းၶဝ် ၵႂၢမ်းၶွပ်ႈၸႂ် ၸၢႆးႁၢၼ်လႅင်းႁဝ်း မီးၸိူင့်ႁိုဝ်ၶႃႈ?

ပီႈၼွင့်ႁဝ်းၶဝ် ၸိူဝ်းၸွမ်းပၼ်ႁႅင်း၊ ၸွမ်းထၢမ်၊ ၸွမ်းသိုဝ့်၊ ၸွမ်းထွမ်ႇမႃးယူႇတႃႇသေႇၼၼ့် ၶႃႈႁဝ်းၸၢႆးႁၢၼ်လႅင်း ၶွပ်ႈၸႂ်ထိုင်ယူႇတေ့တေ့၊ ယွၼ်းသူးသင်ႇထိုင် ပီႈၼွင့်ႁဝ်းၶဝ်ၵူႊၵေႃ့ ႁႂ်ႈယူႇလီၵိၼ်ဝၢၼ် ႁဵတ်းၵၢၼ်ၶိုၼ်ႈယႂ်ႇ ႁႂ်ႈမီးလွင်ႈသိူဝ်းသႃႇယႃႇၸႂ်ၵႂႃႇ ၶၢဝ်းယၢဝ်းမိူဝ်းၼႃႈသေၵမ်း။

Facebook SDK (Plugin)

ၸၢႆးႁၢၼ်လႅင်း

jaidaikm.blogspot.com

แสดงความคิดเห็น

Twilight Over 🇲🇲 Burma Movies

ပၵ်းယဵမ်ႈဝၼ်း

ၶၼ်ငိုၼ်း

ၶၼ်လႅၵ်ႈငိုၼ်း

Social Plugin

ၶေႃႈမုလ်းဢၼ်တၢင်ႇမႂ်ႇ

မိူင်းႁူမ်ႈတုမ်းမိူင်းမၢၼ်ႈ

ၸိုင်ႈမိူင်းဢၼ်မီးၼႂ်းၵုၼ်ဢမေႇရီးၵႃးၸၢၼ်း႑႒ မိူင်း

ၽၵ်းလူမ်းပုမ်း

ၾိင်ႈထုင်းတႆး ႑႒ လိူၼ်

ႁူဝ်ၶေႃႈတၢင်းမူတ်း

Author Profile

Text Widget

မိူင်းႁူမ်ႈတုမ်းမိူင်းမၢၼ်ႈ

သွၵ်ႈႁႃပလွၵ်ႉၼႆႉ

ၶေႃႈမုလ်းတၢင်းမူတ်း

Technology

Pages

Theme Support

JSON Variables

Made with Love by

Product Services

Footer Copyright

buttons=(Accept !) days=(20)

Contact form