ပိုၼ်းၼၢင်းမွၵ်ႇၸၢမ်ၶမ်း

 ႁူပ့်ထူပ်းတွင်ႈထၢမ် မွၵ်ႇၸၢမ်ၼမ့်ၶမ်း မွၵ်ႇၵီႊပၢႆလမ်း “မွၵ်ႇၸၢမ်ၶမ်း”

(31.12.2012)

ၼၢင်းမွၵ်ႇၸၢမ်ၶမ်း ၼႆ့ ပဵၼ်ၸိုဝ်ႈ ၸဵမ်မိူဝ်ႈဢွၼ်ႇႁႃႉ? ဢဝ်တီႈပွင်ႇၸိူင့်ႁိုဝ်သေ တၢင်ႇဝႆ့ၶႃႈ။

 ဢမ်ႇၸႂ်ႈ၊ ၸိုဝ်ႈမိူဝ်ႈဢွၼ်ႇ ႁွင့်ဝႃႈ ၼၢင်းဢေၸၢမ်ၶမ်း။ ၼၢင်းမွၵ်ႇၸၢမ်ၶမ်းၼႆ့ ပဵၼ် ၸၢႆးသၢႆမၢဝ်း ၵေႃ့တၢင်ႇဝႆ့ပၼ် တွၼ်ႊတႃႇၸႂ့်ၼႂ်းပၢႆးမွၼ်းဢိူဝ်ႈ။ ထၢင်ႇတႄ့ ႁႂ်ႈလႆႈမီးဢၢႆႊႁွမ် ၼင်ႇမွၵ်ႇၸၢမ်ၶမ်းတႃႇသေႇၼႆယူဝ်း။ 

သူင်ၸႂ်ၼိူဝ်ပၢႆးမွၼ်းမႃး ၸဵမ်မိူဝ်ႈလႂ်?

 တိုၼ်းသူင်ၸႂ်ၸဵမ်မိူဝ်ႈဢွၼ်ႇ။ မိူဝ်ႈဢွၼ်ႇ ပီႈမွၵ်ႇၸၢမ်ၶမ်း ယၢမ်ႈၵႃႈၸိူင်းမႃးဢိူဝ်ႈ။ ဢိုမ်း… တေမီးမွၵ်ႈ 14 ဢိူဝ်ႈ။ တိုၵ့်ၶိုၼ်ႈႁူင်းႁဵၼ်းၵၢင်ၼႃးယူႇ။ မိူဝ်ႈၸိူၼ့်(ၼၼ့်) ပေႃးဝႃႈ ပိူၼ်ႈဢၢၼ်ႇလိၵ်ႈ ပီႈႁဝ်းသမ့် ၵုမ်ႇလၵ့်ဢၢၼ်ႇၵႂၢမ်းၸိူင်းၵွၺ်း။ 

တႄႇမိူဝ်ႈလႂ်သေ ယၢမ်ႈလႆႈၶိုၼ်ႈၶူင်ႇ(ၶဵင်ႇ Stage show) ဢွၼ်တၢင်းသုတ်း?

 ပဵၼ်မိူဝ်ႈ 1985 တီႈပွၺ်းသၢဝ်းသၢမ် ၼမ့်ၶမ်းဢိူဝ်ႈ။ မိူဝ်ႈၼၼ့် တေမီးမွၵ်ႈ 17 ၶူပ်ႇပၢႆ။ တီႈပွၺ်းၼၼ့် ၼၢင်းၶမ်းၸိင်ႇ၊ ၼၢင်းဢေႁွမ်(ၼွင်ၸၢင့်)ၶဝ်ၸိူၺ်း(ၸိူဝ်းၼႆ့)ၵေႃႈ ပႃးယူႇ။ မိူဝ်ႈၸိူၼ့် ၵွပ်ႈပိူဝ်ႈ ပီႈမွၵ်ႇၸၢမ်ၶမ်း ပႆႇမေႃႁွင့်ၵႂၢမ်းလီလႄႈ တေႃ့တႄ့ႁွင့်လႆႈ ၵႂၢမ်း “မၢဝ်ႇၼုမ်ႇၼုမ်ႇလူမ်းလူင်” ၼၼ့် ႁူဝ်လဵဝ်ၵွၺ်း။

တႄႇလႆႈဢတ်းၼႂ်း Studio မိူဝ်ႈလႂ် ၸိုဝ်ႈၶႅပ်းမၼ်းလူး?

 မိူဝ်ႈ 1991 ၼၼ့်ဢိူဝ်ႈ။ ပဵၼ်ၽဵင်းၵႂၢမ်း “တူၼ်ႈမွၵ်ႇၵွၼ်တႆးမွင်းပႂ့်ၸၢႆးယူႇ၊ မွင်ၸႂ်မိူဝ်ႈဝၼ်းၾူၼ်၊ ၶဵမ်ပႆၵေႃႈမႆၸွမ်း” ၸိူဝ်းၼႆ့။ ၸိုဝ်ႈၶႅပ်းၵႂၢမ်းတႄ့ “ႁၵ့်ၽၢတ်ႇယၢပ်ႇ” ဢတ်းၸွမ်း ၸၢႆးသၢႆမၢဝ်း။

လွင်ႈႁွင့်ၵႂၢမ်းၼႆ့ ၸွင်ႇလႆႈလဵပ်ႈႁဵၼ်း ဢမ်ႇၼၼ် သွၼ်မႃး?

 ဢမ်ႇလႆႈသွၼ်မႃး ၵူၺ်းၵႃႊ ပူၼ့်မႃးမွၵ်ႈႁႃႈႁူၵ်းၸဵတ်းပီႊၼႆ့ ၸင်ႇၵွၺ်ႈ လဵပ်ႈႁဵၼ်းၶိုၼ်းထႅင်ႈ။

ၸူဝ်ႊပၢၼ်ဢၼ်လႆႈ ၶၢမ်ႈပူၼ့်မႃး ဢွၼ်ၼႃႈ ပႆႇပဵၼ်ၽူႈႁွင့်ၵႂၢမ်းၼၼ့် ၸွင်ႇၸၢင်ႊၶႆႊၼႄလႆႈၽွင်ႈၶႃႈႁိုဝ်?

 ဢိုမ်း… ပေႃးတေလၢတ်ႈတေ့ၵေႃႈ ပီႈမွၵ်ႇၸၢမ်ၶမ်းႁဝ်း ၶိုၼ်ႈတီႈ ူင်းႁဵၼ်းၵၢင်ၼႃး၊ ၵွပ်ႈပိူဝ်ႈ ၼႃႈႁိူၼ်းဢမ်ႇၶႅၼ်းၸႂ်လႄႈ မၢင်ႊဝၼ်း လႆႈပႆတိၼ် မၢင်ႊဝၼ်းလႆႈၶီႇလႅင်သေၵႂႃႇ။ မီးသိၼ်ႈတူင်ႇလဵဝ် မိူဝ်ႈဝၼ်းၽူႈႁတ်းငၢၼ်(အာဇာနည်နေ့)ၼၼ့် ၼုင်ႈသိၼ်ႈ ၽၢၵ်ႇၼိူင်ႈယမ်း ၽၢၵ်ႇၼိူင်ႈႁႅင်ႈသေ ၵႂႃႇႁူင်းႁဵၼ်း လီဢၢႆပိူၼ်ႈၼႃႇလႄႈ ၸင်ႇယွၼ်းဢွၵ်ႇႁူင်းႁဵၼ်း။ မိူဝ်ႈၸိူၼ့်(ၼၼ့်) သြႃႇလူင်ၶဝ်တႄ့ ဢမ်ႇၶႂ်ႈႁႂ်ႈဢွၵ်ႇ၊ ႁႂ်ႈၶတ်းၸႂ်သေ ၶိုၼ်းၶိုၼ်ႈႁဵၼ်း။ 

မိူဝ်ႈၽွင်းဢၼ် ပီႈမွၵ်ႇၸၢမ်ၶမ်း လႆႈၽၢတ်ႇဢွၵ်ႇႁူင်းႁဵၼ်းမႃးၼၼ့် တေပဵၼ်ၽွင်းယူႇၸၼ့်လႂ်?

 ပူၼ့်ၸၼ့်ႁူၵ်းယဝ့်။ ဢမ်ႇၸၢင်ႊသိုပ်ႇၶိုၼ်ႈလႄႈ ၸင်ႇဢွၵ်ႇႁူင်းႁဵၼ်း။ မိူဝ်ႈၸိူၼ့်(ၼၼ့်) မေႃသွၼ်ႇသြႃႇၵြႃး တင်း မေႃသွၼ်တေႃႇၶိၼ်ႇတၢၼ်းထေး ႁၢမ်ႈသီး ဢမ်ႇပၼ်ဢွၵ်ႇ။ ပေႃးဢမ်ႇပဵၼ်လႆႈ ၶဝ်တေဢဝ်သူဝ်လူင်ပွင်ႊၸိုင်ႈသေၵမ့်ၸွၺ်ႈ။ ပေႃးသုတ်းႁူင်းႁဵၼ်းၵေႃႈ တေလႆႈၶဝ်ႈႁၢပ်ႇၵၢၼ်တီႈ ႁွင်ႈၵၢၼ်လူင်ပွင်ႊၸိုင်ႈၼႆ။ ပေႃးပဵၼ်ပၢၼ်ယၢမ်းၸင်ႇၼႆ့တႄ့ ယင်းလူဝ်ႇဢဝ်ၵုၼ်းမုၼ်ၵွၼ်ႇ။ ၵူၺ်းၵႃႊ ၽွင်းၼၼ့်လီဢၢႆပိူၼ်ႈၼႃႇလႄႈ ဢမ်ႇႁတ်းယူႇ။

ၽွင်းၼၼ့် ၸွင်ႇႁူ့ဝႃႈ တူဝ်ၸဝ်ႈၵဝ်ႇသူင်ၸႂ်လွင်ႈႁွင့်ၵႂၢမ်းႁိုဝ်?

 ႁူ့ယူႇ၊ ၵူၺ်းၵႃႊ ဢမ်ႇမုင်ႈမွင်းဝႃႈ တေပဵၼ်ၽူႈႁွင့်ၵႂၢမ်းမႃး။ ၽွင်းၼၼ့် ၵွပ်ႈပိူဝ်ႈထူပ်းလွင်ႈတုၵ့်ၼႃႇလႄႈ ဝႆ့လွင်ႈငိုၼ်းၶမ်းၼႆ့ ပဵၼ်ပိူင်ယႂ်ႇသေ ၸင်ႇၶတ်းၸႂ်ႁႃငိုၼ်း။ ၸင်ႇယွမ်းၸုၼ့်သေ ႁၢပ်ႇၶူဝ်းၵႂႃႇမၢၼ်ႈမူဝ်ႇ(မၢၼ်ႈမေႃႈ၊ ၸေႊမိူင်းၶၢင်)။ ႁၢပ်ႇဢၢင်ႇၽေမေႈၵႂႃႇ ၼမ့်ၼၵ်း တေမီးမွၵ်ႈ သိပ်းဢဵတ်းသိပ်းသွင်ၸွၺ့်။ ပေႃးတမ်း ၼိူင်ႈၵမ်းသေၶိုၼ်းႁၢပ်ႇၼၼ့် ၵႅၼ်းပေႃးတၢၼ်ႇၼၢမ်ပၵ်းသႂ်ႇယဝ့်။ လႆႈပႆၶၢဝ်းတၢင်း သွင်ဝၼ်းပၢႆၶိုင်ႈ။

မိူဝ်ႈမႃးထူပ်းတင်း ၸၢႆးသၢႆမၢဝ်းၼႆ့ ဢႃႇယူ့ပီႈမွၵ်ႇၸၢမ်ၶမ်းႁဝ်း တေမီးမွၵ်ႈၵႃႊႁိုဝ်?

 ဢိုမ်း ... 22 ၶဝ်ႈၼႂ်း 23 သၢမ်ဢိူဝ်ႈ။ မိူဝ်ႈ 1985 ၼၼ့်ၵေႃႈ ၸၢႆးသၢႆမၢဝ်း ယၢမ်ႈၸူဝ်းႁွင့်ပီႈၸၢမ် ၵႂႃႇၽႃၵၢၼ့်ယူႇ။ 

ဢွၼ်ၼႃႈ ပႆႇပဵၼ်ၽူႈႁွင့်ၵႂၢမ်းၼၼ့် ၸွင်ႇလႆႈႁွင့်ၼိူဝ်ၶဵင်ႇမႃးလၢႆတီႈ၊ ၽဵင်းၵႂၢမ်းဢၼ်ယၢမ်ႈႁွင့်လူး ၸွင်ႇတွင်းလႆႈ?

 လႆႈႁွင့်လၢႆတီႈဢိူဝ်ႈ။ ဢိုမ်း… “မၢဝ်ႇၼုမ်ႇၼုမ်ႇလူမ်းလူင်” သမ့်တင်း ၵႂၢမ်းၼၢင်းၶမ်းၶိၼ်ႇ “ဢႃႈသၢၵ်ႈသိပ်းႁႃႈ” လႄႈ ၵႂၢမ်း ပီႈလႃ့မေႇ(ၼၢင်းမူၺ်ၼုမ်ႇၽွင်) ၶဝ်ၸိူဝ်းၼႆ့ဢိူဝ်ႈ။

ဢွၼ်ၼႃႈ ပႆႇပဵၼ်ၽူႈႁွင့်ၵႂၢမ်းၼၼ့် ၸွင်ႇယၢမ်ႈထူပ်းၵူၼ်းဢၼ် မႃးၸူဝ်း(ႁွင့်) ဢမ်ႇၼၼ် ပၢၵ်ႈသဵၼ်ႈတၢင်း တွၼ်ႊတႃႇတေပဵၼ်ၽူႈႁွင့်ၵႂၢမ်းမႃးႁိုဝ်?

 မီးယူႇ။ ၽူႈတႅင်ႇၽဵင်း N.S ၸၢႆးသိူဝ်ၼုမ်ႇ ယၢမ်ႈမႃးႁွင့်ယူႇ။ မၼ်းၵေႃႈလၢတ်ႈဝႃႈ တေၸုင်ၸၼ်ပၼ်။ ၵူၺ်းၵႃႊ ဢမ်ႇပဵၼ်မႃးႁွတ်ႈ။

ၸွင်ႇလၢတ်ႈၼႄလႆႈ လွင်ႈတၢင်းႁူ့ႁၼ် ဢၼ်ၵဵဝ်ႇလိူၺ်ႈ မိူဝ်ႈလႆႈၶဝ်ႈၼႂ်းႁွင်ႈဢတ်းသဵင် Studio ပွၵ်ႈဢွၼ်တၢင်းသုတ်းႁိုဝ်?

 တိုၼ်ႇတဵၼ်ႈယူႇ။ ၵွပ်ႈပိူဝ်ႈဝႃႈ သဵင်ၸိပ့်သဵင်ၸွပ့်ၵေႃႈ မၼ်းငိၼ်းၵႂႃႇသဵင်ႈလူး။ 

ဝၢႆးသေ ၶဝ်ႈၼႂ်းႁွင်ႈဢတ်းသဵင်ယဝ့် လွင်ႈႁပ့်ႁၼ်၊ ဢမ်ႇၼၼ် လွင်ႈယိူင်းဢၢၼ်းပီႈမွၵ်ႇၸၢမ်ၶမ်း ၸွင်ႇပႅၵ်ႇပိူင်ႈၵႂႃႇ?

 ဢမ်ႇပႅၵ်ႇသင်ၼင်ႇၵဝ်ႇ။ ၵူၺ်းၵႃႊ ယိူင်းဢၢၼ်းဢၼ်မီးမႃးတေႃႇဝၼ်းမိူဝ်ႈၼႆ့တႄ့ ၶႂ်ႈတႄႇပူၵ်းတင်ႈ ၾိင်ႈၵႃႈၸိူင်းတႆးႁဝ်းၶိုၼ်းဢိူဝ်ႈ။ လွင်ႈၼႆ့မီးၼႂ်းၸႂ်ယူႇၵူႊၶၢဝ်း။ ပေႃးဝၼ်းၼိူင်ႈမႃး ယင်းဢၢင်ႈဢၢၼ်းထိုင်တီႈ ၶႂ်ႈလူင်းထုၼ်း(တႄႇၵေးလၢင်း) ပၼ်ၵွၼ်ႇ။

ၶႅပ်းၵႂၢမ်းပီႈမွၵ်ႇၸၢမ်ၶမ်းႁဝ်းဢတ်းမႃး တေမီးမွၵ်ႈလၢႆၶႅပ်း?

 တေမီးမွၵ်ႈ သၢဝ်းပၢႆ သၢမ်သိပ်း ၼႆ့ယဝ့်။

တေပဵၼ်ၽဵင်းႁူဝ်လႂ် ဢၼ်ယုမ်ႇယမ်ဝႃႈ ႁဵတ်းႁႂ်ႈပီႈၼွင့်ၽူႈထွမ်ႇငိၼ်းၶဝ် ႁူ့ၸၵ်းၼၢင်းမွၵ်ႇၸၢမ်ၶမ်း?

 ဢိုမ်း… ဢၼ်ယုမ်ႇယမ်ဢွၼ်တၢင်းသုတ်းတႄ့ ပဵၼ်ၽဵင်းၵႂၢမ်း တူၼ်ႈမွၵ်ႇၵွၼ်တႆးမွင်းပႂ့်ၸၢႆးယူႇ၊ ယဝ့်ၵေႃႈ ၸိူဝ်းၾၢႆႇလင်ၼႆ့မႃးသမ့် သၽႃႇဝမိူင်းလွၺ်၊ ၼႂ်းလူၵ်ႈၼႆ့ႁၵ့်မႂ်းၵေႃ့လဵဝ် ၸိူၺ်း(ၸိူဝ်းၼႆ့) ပဵၼ်တီႈမၢႆတွင်းပီႈၼွင့် ႁႅင်းတေ့တေ့။

ႁၼ်ပီႈမွၵ်ႇၸၢမ်ၶမ်း တႅမ်ႈၽဵင်းၵႂၢမ်းမႃးလႄႈ လွင်ႈတၢင်းၶႂ်ႈတႅမ်ႈ ၽဵင်းၼႆ့ တႄႇၸဵမ်မိူဝ်ႈလႂ်?

 ၸဵမ်မိူဝ်ႈ ဢႃႇယူ့သိပ်းသွင် ၼၼ့်ယဝ့်။ တင်းၼၢင်းၶမ်းၶိၼ်ႇၶဝ် ၶိုၼ်ႈပၢႆမႆ့ပူၵ်ႇသေ လူမ်းပဝ်ႇၵႂႃႇပဝ်ႇမႃးၼၼ့် ပေႃးယၢမ်ႈႁဵတ်း ၵႂၢမ်းမိူၼ်ႊ(မိူဝ်ႈၼၼ့်) ယဝ့်။ (ၶူဝ်သေ)

ဢၼ်ပီႈမွၵ်ႇၸၢမ်ၶမ်းၶဝ် ႁဵတ်း Live Show တီႈၼွင်တဝ်းၼၼ့် ပဵၼ် Idea ၽႂ်?

 ဢၼ်လႆႈ ပဵၼ် Live Show ၵႂႃႇၼႆ့တႄ့ ၸၢႆးၸွမ်လၢဝ်ၶိူဝ်း မႃးတိူင်ႇပၢင်ႇသေ ၶတ်းသၢင်ႈႁၢင်ႈပွင် လႆႈပဵၼ်ၵႂႃႇ။

ၵဵဝ်ႇလိူၺ်ႈ လွင်ႈၶိုၼ်းႁွင့်ၵႂၢမ်း ဢၼ်ၽူႈႁွင့်ၵႂၢမ်းၶဝ် ႁွင့်ၵႂႃႇယဝ့်ၼၼ့် လွင်ႈႁပ့်ႁၼ်ပီႈမွၵ်ႇၸၢမ်ၶမ်းႁဝ်း မီးၸိူင့်ႁိုဝ်?

 ၵမ်ႈၼမ်တႄ့ ၵွပ်ႈပိူဝ်ႈမၼ်းၸူဝ်ႈၸႂ်ႁဝ်း၊ ယိၼ်းမၼ်းမႃးၶူမ်ႇမႅၼ်ႈတင်းႁဝ်း၊ ဝူၼ့်ဝႃႈ မၼ်းတေထုၵ်ႇၵၼ်တင်းႁဝ်း ၼႆသေ ႁွင့်ၵႂႃႇၵွၺ်း။ ဢမ်ႇမီးၸႂ်ဝႃႈ သူႁွင့်ဢမ်ႇၵျႃ့ၼၼ့်သေဢိတ်း၊ တိုၼ်းဢမ်ႇမီးသေဢိတ်း။

ၵႂၢမ်းဢၼ် ပီႈၸၢမ်ၶမ်းႁွင့်မႃးၸိူဝ်းၼႆ့ ပဵၼ်ၽႂ်ၵေႃ့လိူၵ်ႈပၼ်?

 တၢမ်တူဝ် ပီႈမွၵ်ႇၸၢမ်ၶမ်း လိူၵ်ႈဢဝ် ၵမ်ႈပႃႈၼမ်ယဝ့်။

ၵႂၢမ်းမႂ်ႇ ဢၼ်တႅမ်ႈဝႆ့၊ ဢမ်ႇၼၼ် ဢၼ်ယိူင်းဢၢၼ်းဝႆ့ ၸွင်ႇမီး?

 တႅမ်ႈဝႆ့ Own Tune ႁူဝ်ၼိူင်ႈ “ယွၼ့်ယုမ်ႇငိူဝ်ႈ” ၼႆ ၸူဝ်ႊပႆႇတၢႆပႆႇႁၢႆၼႆ့တႄ့ တေႁႂ်ႈမၼ်းလႆႈဢွၵ်ႇမႃးယူႇ။

ဢၼ်လႆႈလႃႊႁႅၼ်းဝႆ့ ၶႅမ်းၵႂၢမ်းမႂ်ႇ ၸွင်ႇမီး?

 မီးယူႇ ၶႅမ်းၵႂၢမ်းမႂ်ႇ Karaoke “ႁၵ့်ၽၢတ်ႇယၢပ်ႇ” ပဵၼ်ၵႂၢမ်းၸၢႆးသၢႆမၢဝ်း။ ၸၢႆးသၢႆမၢဝ်းၵေႃႈ ပၼ်ၶႂၢင်းယူႇ။ ၵူၺ်းၵႃႊ ၵူဝ်ဝႃႈ တေတုမ့်တိူဝ့်သေၸိူဝ့်သေလွင်ႈလႄႈ ဢမ်ႇပႆႇပဵၼ်ဢွၵ်ႇ။ ထၢႆႇယဝ့် တူဝ်ႈလီငၢမ်းႁိုင်ယဝ့်။ ႁဵတ်းပၼ် တွၼ်ႊတႃႇလုၵ်ႈသၢဝ်ၼင်ႇၵဝ်ႇ။ ၵႂၢမ်းမႂ်ႇတွၼ်ႊတႃႇတေဢွၵ်ႇၵေႃႈ ႁၢင်ႈႁႅၼ်းဝႆ့ယူႇ။

ၸွင်ႇယၢမ်ႈႁွင့်ၸွၺ်ႈ ၼႂ်းၶႅပ်းၵႂၢမ်းၽူႈႁွင့်ၵႂၢမ်းတၢင်ႇၵေႃ့ႁိုဝ်?

 ယၢမ်ႈႁွင့်ယူႇ။ မိူၼ်ၼင်ႇ ၼႂ်းၶႅပ်းၵႂၢမ်း ၸၢႆးၶိူဝ်းဢွင်ႇ(ၵျွၵ်းမႄး)ၵေႃႈ ယၢမ်ႈႁွင့်ၸွၺ်ႈမႃးယူႇ။

ၽဵင်းၵႂၢမ်းမၢင်ႊႁူဝ် ပႃးသဵင်ၾိင်ႈၵဝ်ႇႁဝ်းမႃးၼၼ့် လႆႈ Idea မၼ်းမႃး ၸိူင့်ႁိုဝ်?

 မၼ်းပဵၼ်ၸိူင့်ႁိုဝ်ၼႆ ပူၼ့်မႃး ၼႂ်းၽဵင်းၵႂၢမ်းၸၢႆးသၢႆမၢဝ်း ဢၼ်ဝႃႈ “ၽွင်းၶိင်ႇပီႈၼွင့်တႆးႁဝ်း လႆႈလပ်းလႆႈၼွၼ်းယဵၼ်သီႇသီႇ...” ဢၼ်ၼႆ့ ပဵၼ်ပီႈၸၢမ်ၵေႃ့တႄႇပၼ် “ၼၢင်းဢီႇပၢႆႊၽေးၸေးပႃး လုၵ်ႈလၢင်း လႆႈတၢင်းႁွင့်သႅၼ်ႇႁႆႈ ပဵၼ်ၾႆးလမ်း” ၼၼ့်ၼႃ ဢၼ်ၼႆ့ ပီႈၸၢမ်ယၢမ်ႈၵႃႈၸိူင်းလႄႈ ဢဝ်ၼႂ်းၾူးၸိူင်း “ၶုၼ်ယီႊၵႂၢႆးၶမ်း”။ ပဵၼ်ဢၢႆႊထူဝ်ႇၼဝ်ႈၶွင်ႁဝ်း ပဵၼ်ၾိင်ႈၵဝ်ႇႁဝ်း ယႃႇႁႂ်ႈႁၢႆၼႆသေ ပီႈၸၢမ် မွၵ်ႇပၼ်ၸၢႆးသၢႆမၢဝ်း။ ၵမ်းၼႆ့ သမ့်ၼႄၸူဝ်ႈ(မႅၼ်ႈ) ပီႈသူၺ်ႇမေႇ(ၼၢင်းၼုမ်ႇၸၢမ်ၶၢဝ်)ႁဝ်း ၶဝ်မႃးလႄႇတီႈႁိူၼ်း။ ၶဝ်ၵေႃႈ ၶႅၼ်ႇၽၢႆႇ Idea ၊ ၸၢႆးသၢႆမၢဝ်းသမ့် ပိုတ်ႇၼႄ ဢွၼ်တၢင်း တင်းပီႈသူၺ်ႇမေႇ ၸင်ႇႁဵတ်းၵႂၢမ်းၸၢတ်ႈၵႂၢမ်းၸိူင်းႁေ ပဵၼ်ဢၼ်ႁိူင်းၵႂႃႇတေ့တေ့ယဝ့်။ 

ဢၼ်လႆႈၵႂႃႇႁွင့်ၽဵင်းၵႂၢမ်းၸွၺ်ႈပၼ် တီႈပၢင်ပွၺ်းသုၼ်ႇႁူမ်ႈၸိူဝ်းၼၼ့် တေမီးၸိူဝ်းလႂ်လၢႆလၢႆ?

 ဢိုမ်း... မိူၼ်ၼင်ႇ ၵႂႃႇႁွင့်ၵႂၢမ်းပၼ်ႁႅင်း ပီႈၼွင့်တႆး ၸိူဝ်းထူပ်းၽေးၼၼ့်လႂ်၊ ပွၺ်းလူႇပွၺ်းတၢၼ်းၸိူဝ်းၼႆ့ ၼမ်ယူႇ။ ပီႈၸၢမ်တႄ့ ပေႃးၵဵဝ်ႇၵပ်းလိူၺ်ႈ ပွၺ်းလူႇပွၺ်းတၢၼ်း၊ ပွၺ်းယၢတ်ႇၼမ့်ဝတ့်ၵျွင်း၊ ပွၺ်းႁႃငိုၼ်းၵွင်ၵၢင်တႃႇတင်းလၢႆၼႆတႄ့ မႃးႁွင့်လႆႈယူႇ သၢဝ်းသီႇၸူဝ်ႊမူင်း။ တေႃႈၵႃႊ ဢမ်ႇမီးၵႃႊဢွၵ်ႇၶၢဝ်းတၢင်းၵေႃႈ ယင်းတေ ၶၢႆပေႇႁူသေမႃးၵွၼ်ႇ။ ပဵၼ်တူၼ်ႈၸႂ်ပီႈၸၢမ်ဢိူဝ်ႈၼႃ ႁဵတ်းၵဵင်ႈတႄ့ ဢမ်ႇၸႂ်ႈ၊ လၢတ်ႈတေ့ဢိူဝ်ႈ။ (ၶူဝ်သေ)

ၵဵဝ်ႇလိူၺ်ႈ ၵၢၼ်ႁဵတ်းၶႅပ်းပွမ်မႃးၼႆ ၶႂ်ႈထတ်းသၢင်ၸိူင့်ႁိုဝ်?

 ဢၼ်ၼႆ့တႄ့ ပီႈမွၵ်ႇၸၢမ်ၶမ်း ယင်းယၢမ်ႈတႅမ်ႈၼႄ ၼႂ်းပပ့်သၢႆပႅၼ်းမႃး “ၼႆ့ပဵၼ်ႁၵ့်တႆးႁႃ့ ႁၵ်းတႆး” ၼႆၵွၼ်ႇ၊ ပိူၼ်ႈၵၼ့်ၶတ်းသၢင်ႈႁၢင်ႈပွင်မႃး၊ မိူၼ်ၼင်ႇၸုပ်ႇဢွၵ်းၽွၵ်ႈၵိၼ်ၶွင်ပိူၼ်ႈ ဢၼ်ၼႆ့ ထုၵ်ႇလီဝႄႈယူႇ၊ ၵူၺ်းဝႃႈႁိုဝ်ၵေႃႈ ၵူၼ်းႁဝ်း လမ်ႇမၢၵ်ႈလေႃးၽၵေႃႈယႂ်ႇမႃး တႃႇတေဝူၼ့်ၽၢႆႇပိူၼ်ႈ ဢမ်ႇပေႃးမီး၊ လွင်ႈႁၼ်ထိုင်ၵၢင်ၸႂ်ၵၼ်(ကိုယ်ချင်းစာတရား) ဢေႇမႃးတိၵ်းတိၵ်း။ ႁူဝ်သုၵ်းၵေႃႈၵိၼ်ႁူဝ် ႁၢင်သုၵ်းၵေႃႈၵိၼ်ႁၢင် မိူၼ်ၼင်ႇၵႂၢမ်းၸၢႆးမူး လၢတ်ႈၼၼ့်ယဝ့်။ ၵူၺ်းၵႃႊ ၶႅပ်းပွမ်ၼႆ့ ပေႃးပဵၼ်လႆႈ ဢမ်ႇၵိုင်ႇလီႁဵတ်း။ ပဵၼ်ႁိုဝ်ၵေႃႈ လႆႈတၢင်းဝႃႈလၢႆႊလၢႆႊၵွၺ်း။

ၵဵဝ်ႇလိူၺ်ႈ လွင်ႈႁွင့်ၵႂၢမ်းမႃးၼႆ သြႃႇႁူ့သြႃႇႁၼ် သြႃႇပၼ်သြႃႇဝႃႈ ၸိူဝ်းၼႆ့ ၸွင်ႇယၢမ်ႈထူပ်းမႃး?

 ပေႃးသွၼ်ႇမႃးတေ့တေ့ၼႆ ပေႃးပီႈၸၢမ်လဵပ်ႈႁဵၼ်းႁႅင်းႁႅင်း ယင်းတေမေႃၵတ့်မႃးယူႇ။ သြႃႇထုၼ်းသူၺ်ႇ(ၵျွၵ်းမႄး) သွၼ်ပၼ် တူဝ်ႇ၊ ရႄႈ၊ မီႊ။ ၵူၺ်းၵႃႊ ၼႃႈႁိူၼ်းႁဝ်းၵိၼ်းလႄႈ ဢမ်ႇဢိူဝ်လိူဝ်၊ ဝႆ့မဝ်မၢင်ႊမႃး။ သမ့်ဢၢႆပိူၼ်ႈ။ ဝူၼ့်တႃႇၼႃႈႁိူၼ်းႁေ ယဝ့်ၵႂႃႇ။

ယူႇတီႈၽိုၼ်ၶၢဝ်ႇမွၵ်ႇမႂ်ႇႁေ ဢၼ်ၶႂ်ႈသင်ႇထိုင် ပီႈၼွင့်ၽူႈထွမ်ႇ ငိၼ်းၶဝ်ၼၼ့် မီးၸိူင့်ႁိုဝ်လၢႆလၢႆ?

 ၶႂ်ႈသင်ႇထိုင်တႄ့ ပေႃးတင်းဝႃႈ သဵၼ်ႈၸႂ်ပႆႇလူ့ပႆႇႁၢႆပႆႇတၢႆၼၼ့် ပႅင်ႈၼင်ႇယိူင်းဢၢၼ်းႁဵတ်းလႆႈ တေၶိုင်သၢင်ႈႁၢင်ႈပွင်ၵႂႃႇယူႇ။ တႃႇ ၽူႈထွမ်ႇငိၼ်းၽဵင်းၵႂၢမ်းတႆးႁဝ်းၶဝ် တၢမ်တူဝ်ဢမ်ႇႁွင့်လႆႈၵေႃႈ ယူႇတီႈၽူႈတႅမ်ႈၵႂၢမ်းလႄႈသင်၊ ယူႇတီႈၸဝ်ႈၶွင်လႄႈသင် တေ ၶတ်းၸႂ်ၵႂႃႇယူႇၵူႊၶၢဝ်းယၢမ်း။ ဢၼ်ပဵၼ်ၼွင့်ယိင်းၼွင့်ၸၢႆးၶဝ်တင်းသဵင်ႈ ၸိူဝ်းဢၼ်ယၢပ်ႇယၢၼ်းၶၢၼ်ၸႂ်ယူႇ ယႃႇပေၸႂ်တူၵ်း ႁဵတ်းဢၼ်လ်ႂၵေႃႈ ႁႂ်ႈမီးၸႂ်ၽိူၵ်ႇၸိုၼ်ႈၶၢဝ်သႂ်။ ယႃႇပေမုင်ႈမွင်း တွင်းတႃ့(ၶႂ်ႈလႆႈ) ဢၼ်တေတုမ့်တွၵ်ႈပွၵ်ႈၶိုၼ်းမႃး။ ႁဵတ်းဢၼ်လႂ်ၵေႃႈ တတ်းၸႂ်ႁေ ႁဵတ်းၵႂႃႇ။ ပေႃးႁဝ်းမီးၸႂ် ယိုၼ်ႈၽႂ်ႇ(ၸေႇတၼႃႇ)ၼႆၸိုင် တေၶိုၼ်ႈယႂ်ႇယူႇ။ ယဝ့်ၵေႃႈ ယႃႇပေလိုမ်း ၵုၼ်းမုၼ်ၽြႃး၊ တြႃး၊ ပေႃႈမႄႈ၊ မုၼ်ထဝ်ႈမုၼ်ၵႄႇ၊ ယႃႇပေယွၼ်ႇ လွင်ႈၶတ်းၸႂ်။ ပေႃးၶတ်းၸႂ် မၼ်းတေပဵၼ်ယူႇ။ ဢၼ်ၶႂ်ႈယွၼ်းထိုင်ပီႈၼွင့်ၶဝ်တႄ့ သမ့်ဝႃႈ ပီႈမွၵ်ႇၸၢမ်ၶမ်း ယုမ်ႇယမ်တူဝ်ၸႂ် သွင်ပႃးသႅၼ်ႈသႂ်သေတႃ့ ၵူၼ်းႁဝ်းမေႃမီး မိူဝ်ႈၶိုၼ်ႈမိူဝ်ႈလူင်း။ ပေႃးၺႃးမိူဝ်ႈၵမ်းလူင်းၼႆ ႁႂ်ႈလႆႈထႅမ်တိုတ့်ၸၼ်ၵၼ်။ ယႃႇပေဢဝ် မၢၵ်ႇလိမ်း(ႁူၺ်ႇလေႃ့) သႂ်ႇပၼ်ၵၼ်သေၵမ်း။

ဢၼ်ပီႈမွၵ်ႇၸၢမ်ၶမ်း ပၼ်ၶၢဝ်းယၢမ်း ၸုမ်းမွၵ်ႇမႂ်ႇ မႃးတွင်ႈထၢမ်ၼႆ့ ပဵၼ်ဢၼ်ယိၼ်းၸူမ်းတေ့တေ့။

 မိူၼ်ၵၼ်။ ၼင်ႇႁိုဝ် မွၵ်ႇမႂ်ႇႁဝ်း ပေႃးတေၶိုၼ်ႈယႂ်ႇမႂ်ႇသုင်ၵႂႃႇၵေႃႈ ပေႃးဝႃႈ လူဝ်ႇတၢင်းၸွၺ်ႈထႅမ် ၼမ့်မိုၵ့်ယွတ်ႇၼိူင်ႈ ၼင်ႇၵႂၢမ်းၵူၼ်းထဝ်ႈဝႃႈ ၼူၵ့်ၸွၵ်ႇပေ့သဵၼ်ႈၶႃး ၸၢင့်ငႃးပေ့တုမ်မႆ့။ တီႈယူႇ ႁဝ်းပဵၼ်ၼူၵ့်ၸွၵ်ႇၵေႃႈ တေၸၼ်သဵၼ်ႈၶႃးသေ ၸွၺ်ႈထႅမ် ၵႂႃႇယူႇ။

* * *

(ၸၢႆးၶိူဝ်းမၢဝ်း လႄႈ ၸၢႆးသီတႆးဢွင်ႇၵျေႃႇ တွင်ႈထၢမ်)