ပိုၼ်းၼၢင်းသႅင်လိုၼ်းၶမ်း မေႃႁွင်ႉၵႂၢမ်းသဵင်ဝၢၼ်

 ၶူၼ့်ၶႆႊ “ၼမ့်ၶေးမၢဝ်းႁဵတ်းသၢၵ်ႈသေႇ” တႄႇတီႈသၢႆပိုၼ်း ၼၢင်းသႅင်လိုၼ်းၶမ်း

တႄႇသူင်ၸႂ်ၼိူဝ်ပၢႆးမွၼ်းႁွင့်ၽဵင်းၵႂၢမ်းမႃးမိူဝ်ႈလႂ်၊ ၽွင်းၼၼ့် ဢႃႇယူ့တေမီးၵႃႊႁိုဝ်?

 တေလႆႈမွၵ်ႈ 11 ၶူပ်ႇႁိမ်းႁွမ်းၼၼ့်ယူဝ့်။ လႆႈၶိုၼ်ႈၼိူဝ်ၶဵင်ႇၸၢတ်ႈသႅင်းမႃးဢွၼ်တၢင်း၊ ၽွင်းၼၼ့် ပွၵ့်ၸၢၼ်းႁဝ်း ႁဵတ်းပွၺ်းသၢင်ႇၵၢၼ်းၵၼ်ႇထိၼ်ႇ ယႂ်ႇယႂ်ႇလူင်လူင်ၵူႊပီႊသေ လႆႈၵႂႃႇႁွင့်ၸၢတ်ႈသႅင်းပၢင်ႇသၢႆးၶဝ်မႃး။ မိူဝ်ၼၼ့် လႆႈၶဝ်ႈပဵၼ် “ၼၢင်းမေႊပွၺ်းဢူး” မႃးဢွၼ်တၢင်းသုတ်းယဝ့်။ တႄႇၼၼ့်မႃးႁေ သူင်ၸႂ်မႃးယူႇ။ 

တႄႇယၢမ်ႈၶိုၼ်ႈၼိူဝ်ၶဵင်ႇမႃးမိူဝ်ႈလႂ်?

 မိူဝ်ႈ 1974 ၽွင်းဢႃႇယူ့တိုၵ့်လႆႈ 17၊ ယၢမ်းတွပ်ႇယဝ့်ၸၼ့်ၵဝ်ႈ၊ တီႈပွၺ်းသူင်ႇဢူႇၸဝ်ႈသြႃႇပၺ်ႇၺႃႇသႃႇမိ ဝတ့်မႁႃႇဝၼ်ႇ ဢၼ်မႃး ႁဵတ်းတီႈဝတ့်ၽြႃးလူင်ၼႆ့ဢိူဝ်ႈ။ မိူဝ်ႈၼၼ့် ၼႂ်းၵေႃႁဝ်းၵေႃႈ လႆႈႁဵတ်း Stage Show လႄႈ လႆႈတႄႇၶိုၼ်ႈႁွင့်ၽဵင်းၵႂၢမ်း မိူဝ်ႈယၢမ်းၼၼ့်ယဝ့်။ ၽွင်းၼၼ့် ႁွင့်ၵႂၢမ်းၸၢႆးသၢႆမၢဝ်း ဢၼ်ဝႃႈ “ပွၵ်ႈၶိုၼ်းမႃးလႄႈၸၢႆး” ဢၼ်ၵႂၢမ်းမၼ်းတႄႇသိူဝ်ႇဝႃႈ “ထိုင်ၶိင်ႇႁႅင်ႈမႃး” ၼႆ။  ပွၺ်း 7 ဝၼ်းၼႆ့ ဝၼ်းလႂ်ၵေႃႈ ထိုင်ၶိင်ႇႁႅင်ႈမႃးလႄႈ ပိူၼ်ႈပေႃးလႆႈႁွင့်ဝႃႈ လိုၼ်းလႂ်၊ လိုၼ်းထိုင်ၶိင်ႇႁႅင်ႈမႃး။ (ၶူဝ်သေ)

ပဵၼ်ၽႂ် ၵေႃ့ၸုင်ၸၼ်ၶဝ်ႈမႃး ၼိူဝ်သဵၼ်ႈတၢင်းပၢႆးမွၼ်း?

 ဢၼ်ပဵၼ် လုင်းထီးၶမ်းသႅင်၊ လုင်းၸၢႆးသၢႆလၢဝ် (ယၢမ်းၼႆ့ မီးတီႈမိူင်းထၢႆႇဝၢၼ်း)၊ လုင်းၸၢႆးဢၢႆႈဢေး(ပၢၼ်းသီ)၊ ၸၢႆးမွင်ႇၺုၼ့် ၸိူဝ်းဢၼ်ဢွၼ်ႁူဝ်ၼၢမ်းၼႃႈ ၵေႃလိၵ်ႈလၢႆးလႄႈၾိင်ႈငႄႈတႆး မိူဝ်ႈ 1974 ၼၼ့် ၸုင်ၸၼ်မႃးဢွၼ်တၢင်းယဝ့်။ ၽူႈထွမ်ႇငိၼ်းၵေႃႈဝႃႈ ထုၵ်ႇႁူမႅၼ်ႈၸႂ်ယူႇ။ 

တႃႇႁႂ်ႈပေႃးမေႃႁွင့်ၽဵင်းၵႂၢမ်း လႄႈ မေႃတွၺ်ႇတိင်ႇမႃးၼႆ့ ပဵၼ်ၽႂ်ၵေႃ့သွၼ်ပၼ်?

 ပၢၼ် 5 ၶူပ်ႇၵွၺ်း ပေႃးမေႃႁွင့်ၵႂၢမ်းၶိူဝ်းမိူင်း (NATIONAL ANTHEM) ၶွင် မိူင်းႁူမ်ႈတုမ်ႊမႅၼ်ႇမႃႇ လႄႈ ၸိုင်ႈပွင်ႊႁၢင်းၵူၼ်းၶႄႇ ယဝ့်။ ပေႃးၵူၼ်းလူင်ယွင်ႈယေႃးပၼ်ဢိတ်းၼိူင်ႈၼႆ ၶႅၼ်းပၢဝ်ႇလႆႈႁႅင်း။ ထိုင်မႃး 11 ၶူပ်ႇ ပီႈမူၺ်း ၸင်ႇႁွင့်ႁဝ်းၵႂႃႇ ႁွင့်ၵႃႈ “ၼၢင်းမေႊပွၺ်းဢူး” ၼႂ်းၸၢတ်ႈသႅင်းၶဝ်။ တႄႇၵမ်းၼၼ့်မႃးၵေႃႈ ၸႂ်ႁတ်းမႃး။ ၵူၺ်းၼႃႇ လႆႈႁွင့်လႆႈၵႃႈ ၼႂ်းႁိူၼ်းၼႂ်းယေးမႃး။ ဢၼ်မေႃတွၺ်ႇတိင်ႇ(Guitar)ၼႆ့သမ့် ၸၢႆးၽူႈႁဝ်းၵႂႃႇသိုဝ့်လႆႈတိင်ႇမႃး လုၵ်ႈၼိူင်ႈသေ မၼ်းတွၺ်ႇယဝ့်သေတမ်းၵေႃႈ ႁဝ်းၵဵပ်းတွၺ်ႇၵမ်းလဵဝ်ယဝ့်။ ၸၢႆးႁဝ်းသွၼ်ပၼ်တႄ့ၵေႃႈ ဢမ်ႇၸႂ်ႈၼင်ႇၵဝ်ႇ ပေႃးမၼ်းတမ်းၼႆ ႁဝ်းၵဵပ်းတွၺ်ႇႁၢင်းၵူၺ်း။ လႆႈမေႃတွၺ်ႇမေႃႁွင့် ၼႂ်းႁိူၼ်းမႃး။ 

ၶႆႊၼေ ၽူႈႁွင့်ၵႂၢမ်းပၢၼ်လဵဝ်ၵၼ် ၽွင်း 1974 ၼၼ့် ဢိတ်းၼိူင်ႈ?

 ၸိူဝ်းႁဝ်းတွင်းလႆႈၼႆ့တႄ့ ၸၢႆးၵျေႃႇမိၼ့်၊ ၸၢႆးၸၢမ်ႇၺုၼ့်၊ ၸၢႆးထုၼ်းတိၼ်ႇ၊ ၸၢႆးထုၼ်းဢေး၊ ၸၢႆးၸၢမ်ႇဢေး၊ ၸၢႆးၵၢၼ်ႇမိၼ့်၊ ၸၢႆးၵၢၼ်ႇၺုၼ့်၊ ၸၢႆးၵၢၼ်ႇတိၼ့်၊ ၸၢႆးထုၼ်းမိၼ့်၊ ၸၢႆးဢႃးပၢင်ႊ၊ ၸၢႆးထုၼ်းသူၺ်ႇ ၶဝ်ၸိူဝ်းၼႆ့ တွၺ်ႇၵေႃႈတွၺ်ႇ ႁွင့်ၵေႃႈႁွင့်ယဝ့်။ ပႃးတင်း ၸၢႆးယီႊၵျေႃႇ၊ ၸၢႆးဢုင်းမွင်ႇ(ၵွၼ်းၶိူဝ်းလႅင်း)၊ ၸၢႆးပူ့(ပၢင်ႇသၢႆး)၊ ၸၢႆးတိၼ်ႇမိၼ့်(USA)၊ ၼၢင်းယိင်းသမ့် ၼၢင်းၼုမ်ႇမၢဝ်း၊ ၼၢင်းႁၢင်ႊသႂ်၊ ၼၢင်းလႃ့ဝိၼ်း(သြႃႇမလႃ့ဝိၼ်း)၊ ၼၢင်းၶိၼ်ႇဢူး ၸိူဝ်းၼႆ့သေ ဢၼ်လႆႈႁွင့်ၸွမ်းၵၼ်မႃးတႄ့ မိူၼ်ၼင်ႇ ပီႈသွၼ်ႊ၊ ပီႈလဵၵ့်၊ ပီႈၶမ်းႁွင်၊ ပီႈလိုၼ်း(ပွၵ့်ႁွင်ႇ)၊ ၼၢင်းႁိူၼ်းၶမ်း(သူၺ်ႇဢဵင်ႇ) ၶဝ်ၸိူဝ်းၼႆ့ဢိူဝ်ႈ။

လႆႈတႄႇဢတ်းၽဵင်းၵႂၢမ်းဢွၼ်တၢင်းသုတ်းမိူဝ်ႈလႂ်?

 မိူဝ်ႈ 1978 ၼၼ့် ၸွမ်းၸၢႆးမွင်ႇလေး(မီးတီႈဝဵင်းလိူဝ်ႇ) ပဵၼ်တူဝ်တႅၼ်းမိူင်းႁူမ်ႈတုမ်ႊသေ ၵႂႃႇပွႆးတီႈတႃႈၵုင်ႈ၊ သမ့်ဢွၼ်ၵႂႃႇဢတ်းသဵင် တီႈႁူင်းပွႆႇသဵင်မိူင်းမၢၼ်ႊ(BBS)။ လႆႈဢတ်းမႃး 4 ႁူဝ်ဢိူဝ်ႈ။ “ၵွပ်ႈၸၢႆးဢမ်ႇထွမ်ႇၵႂၢမ်း” ၼၼ့်တႄ့ လႆႈမီးၸိုဝ်ႈသဵင်ၵႂႃႇ ၼႂ်းႁူင်းပွၺ်ႇသဵင်ၾၢႆႇတႆးၼၼ့်ယဝ့်။။ 

ဢၼ်ဢတ်းဢွၵ်ႇမႃးဢွၼ်တၢင်းပိူၼ်ႈ ပဵၼ်ၶႅပ်းလႂ်?

 ပဵၼ်ၶႅပ်း “ႁဵင်ႁႃႈပၢၵ်ႇလွင်ႈတၢင်းႁၵ့်”  ဢၼ်ဢတ်းၸွမ်း “ၸၢႆးပၢၼ်းသႅင်း” ၼမ့်ၶမ်း ၼၼ့်ဢိူဝ်ႈ။ 

ဢၼ်ဢွၵ်ႇမႃးတင်းမူတ်း မီးလၢႆၶႅပ်း?

 တင်းသဵင်ႈတႄ့ မီးယူႇ 12 ၶႅပ်း။ ၼႂ်းၼၼ့် ဢၼ်ႁွင့်ႁၢင်းၶေႃၶေႃတႄ့ မီး 4 ၶႅပ်း။ (1) ၼမ့်ၶေးမၢဝ်း ႁဵတ်းသၢၵ်ႈသေႇ (2) မိူဝ်ႈပွၵ်ႈၶိုၼ်းမႃး (3) ၶူဝ်လႆလႄႈၽၢၼ်ၸႂ်ၵေႃ့မွင်း (4) လိုမ်း ၸိူဝ်းၼႆ့ယဝ့်။ ၼမ့်ၶေးမၢဝ်းႁဵတ်းသၢၵ်ႈသေႇ လႄႈ မိူဝ်ႈပွၵ်ႈၶိုၼ်းမႃးတႄ့ တၢမ်တူဝ်ႁဝ်း လႆႈၶတ်းၸႂ်ၵႂႃႇဢတ်းႁၢင်းၶေႃ။ ၼွၵ်ႈသေၼၼ့် ၶူဝ်လႆလႄႈၽၢၼ်ၸႂ်ၵေႃ့မွင်း၊ လိုမ်း လႄႈ ဢၼ်တင်းမူႇတင်းၸုမ်း ဢတ်းၸွမ်းၵၼ်ၸိူဝ်းၼၼ့် ပဵၼ်ပီႈၼၢင်းၼုမ်ႇၸၢမ်ၶၢဝ်(ပီႈမေႇ)ႁဝ်း ၶတ်းၸႂ်သႂ်ႇႁႅင်းသေ ဢတ်းမႃးႁႂ်ႈ မီး 8 ၶႅပ်းဢိူဝ်ႈ။

ဢၼ်ႁဵတ်းႁႂ်ႈပီႈၼွင့်ၽူႈထွမ်ႇငိၼ်းၶဝ် ႁူ့ၸၵ်းမၵ်းၸိုဝ်ႈ ၼၢင်းသႅင်လိုၼ်းၶမ်း ၵႂႃႇၼၼ့် တေၸၢင်ႊပဵၼ်ၽဵင်းၵႂၢမ်းႁူဝ်လႂ်?

 တေပဵၼ် “ၼမ့်ၶေးမၢဝ်းႁဵတ်းသၢၵ်ႈသေႇ” ၼႆ့ယဝ့်။ မၼ်းၵေႃႈ ပဵၼ်ၸိုဝ်ႈၶႅပ်းၵႂၢမ်းၼႃႇၼေႃႈ။

မီးပီႈၼွင့်ႁူမ်ႈတွင့်လၢႆၵေႃ့၊ ၶႆႊၼေဢိတ်းၼိူင်ႈ?

 မီး 9 ၵေႃ့ဢိူဝ်ႈ။ 1) ပီႈၵေႃႇထွၼ်း 2) ပီႈၶမ်းသွၺ်ႈ 3) ၸၢႆးသႅၼ်ႇပဝ်း 4) ၸၢႆးယိၼ်ႊပဝ်း 5) ပီႈၶမ်းလႃႈ 6) ၸၢႆးၸၢမ်ႇ 7) ၸၢႆးၽူႈ 😎 ပီႈသွၼ်ႊ ယဝ့်ၵေႃ့ ႁဝ်းပဵၼ်ၵေႃ့လိုၼ်းသုတ်းပိူၼ်ႈဢိူဝ်ႈ။

တႄႇၼႃႈႁိူၼ်းမိူဝ်ႈလႂ်၊ မီးလုၵ်ႈလၢင်းလၢႆၵေႃ့?

 တႄႇမိူဝ်ႈ 1988 ၽွင်းဢႃႇယူ့လႆႈ 31 ၶူပ်ႇသေ မီးလုၵ်ႈလၢင်းသွင်ၵေႃ့ (1) လုၵ်ႈယိင်းလူင် ၼၢင်းယေ့သႅင်ဢွၼ်ႊ သုတ်းၸၼ့်ၸွမ် ၾၢႆႇပၵ်းပိူင်ၾိင်ႈပႅင်ႊ L.L.B (Law)၊ လုၵ်ႈၸၢႆးၵေႃ့ဢွၼ်ႇသမ့် ၸၢႆးဢၢႆႈသႅင်ႁၢၼ်၊ ယဝ့်ၸၼ့်ၸွမ် G.T.C ဝဵင်းလိူဝ်ႇ။

ၸိုဝ်ႈၼၢင်းသႅင်လိုၼ်းၶမ်းၼႆ့ ပဵၼ် ၸိုဝ်ႈတေ့ႁႃ့?

 မိူဝ်ႈႁဝ်းၶိုၼ်ႈၶဵင်ႇၸၢတ်ႈသႅင်းၼၼ့် ပဵၼ်ဢေလိုၼ်း။ ၸဵမ်မိူဝ်ႈဢွၼ်ႇ ဢူႈႁဝ်းပၼ်ဝႆ့ဝႃႈ “သႅင်လိုၼ်း” ၼႆၼင်ႇၵဝ်ႇ။ ဢူႈႁဝ်းပဵၼ် ၶိူဝ်းႁိူၼ်းသႅင်။ ၵူၺ်းၼႃႇ ၽႂ်ၵေႃႈႁွင့်ဢေလိုၼ်းၵွၺ်း။ မိူဝ်ႈ 1974 ၽွင်းတေၶိုၼ်ႈၶဵင်ႇႁွင့်ၵႂၢမ်းၼၼ့် သြႃႇၸၢႆးထီးၶမ်းသႅင် ၸင်ႇဝႃႈ သႅင်လိုၼ်းၼႆ့ ႁၢမ့်ပွတ်းဢိတ်းၼိူင်ႈ။ ဢဝ်ၸိုဝ်ႈသြႃႇႁဝ်း သႂ်ႇထႅင်ႈတူဝ်ၼိူင်ႈသေ ႁႂ်ႈၸိုဝ်ႈ “သႅင်လိုၼ်းၶမ်း” ႁေလႃႈ။ ၽွင်းၼၼ့် ၼွင့်ၸၢႆးႁဝ်း(လုၵ်ႈဢူႈဢၢဝ်)ယင်းဝႃႈ ၸိုဝ်ႈပီႈႁဝ်းၼႆ့ သၢင်ႇထုၵ်ႇတႄ့ ဢူႈပဵၼ်ၶိူဝ်းႁိူၼ်းသႅင်၊ မႄႈပဵၼ်ၶိူဝ်းႁိူၼ်းၶမ်း၊ ပီႈႁဝ်းသမ့်ပဵၼ် ၵေႃ့လိုၼ်းသုတ်း ၼႆၵွၼ်ႇဢိူဝ်ႈ။

ထုၵ်ႇၸႂ်ၵႂၢမ်းဢၼ်လႂ် လိူဝ်သေပိူၼ်ႈ?

 ပဵၼ်ၵႂၢမ်း “တၢင်းႁၵ့်ဢွၼ်ႇၵူၼ်းႁၢင်ႊၸႃ့” ဢိူဝ်ႈ၊ လႆႈၸႂ်ဝႃႈလႆႈၸႂ် တေႃႇယၢမ်းလဵဝ်ၼႆ့ယဝ့်။ ၵႂၢမ်းႁူဝ်ၼႆ့ ႁွင့်ၶိုၼ်းမိူဝ်ႈလႂ်ၵေႃႈ ၶုၵ်းၸႂ်လႆႈ မိူဝ်ႈႁဝ်းတိုၵ့်ၼုမ်ႇတိုၵ့်ၵီႊၼၼ့်ဢိူဝ်ႈ။ မၼ်းတိုၼ်းဝႃႈ ယွၼ်ႈသႂ်ႇမၢၵ်ႇႁူဝ်ၸႂ်ႁဝ်းတေ့တေ့။ ပဵၼ်ၵႂၢမ်းၸၢႆးထီးသႅင်တႅမ်ႈဝႆ့ဢိူဝ်ႈ။ ႁဝ်းယွၼ်းၶဝ်သေ ၶဝ်ၵေႃႈပၼ်ႁဝ်းႁွင့်ၵမ်းလဵဝ်ယဝ့်။

ယၢမ်ႈႁွင့်ၵႂၢမ်းၽႂ်မႃးလၢႆလၢႆ?

 ၵႂၢမ်း သြႃႇၸၢႆးမၢဝ်းၶမ်း(မူႇၸေႊ)ႁဝ်း ၼမ်သေပိူၼ်ႈ။ ၵႂၢမ်းမေႃယႃၸၢႆးၶမ်းလဵၵ်းႁဝ်းၵေႃႈ လႆႈႁွင့်မႃးယူႇ၊ “ဝၼ်းၾူၼ်တူၵ်း” ဢၼ်ဝႃႈၼၼ့်ၼႃႇ။ ၵႂၢမ်းၸၢႆးလၢဝ်သႂ်၊ ၸၢႆးသၢႆမၢဝ်း၊ ၸၢႆးထီးသႅင်၊ ၸၢႆးလႃ့(ၼမ့်တူႈ)၊ ၸၢႆးၺုၼ့်၊ ၸၢႆးသၢႆလၢဝ်ႊ၊ ၸၢႆးဢၢႆႈဢေး ၶဝ်ၸိူဝ်းၼႆ့ဢိူဝ်ႈ။ ဢၼ်ပီႈပီႈၼွင့်ၼွင့် ထုၵ်ႇႁူမႅၼ်ႈၸႂ်သဵင်ႁဝ်းသေ တႅမ်ႈမႃး ပၼ်ၵေႃႈမီး မိူၼ်ၼင်ႇ ၸၢႆးၵေႃႇၶိူဝ်း၊ ၸၢႆးယီႊဝၼ်း ၶဝ်ၸိူဝ်းၼႆ့။ 

ၶႆႊၼေ လွင်ႈလႆႈႁွင့်လုၵ်ႈယိင်း ၶဝ်ႈၼႂ်းပၢႆးမွၼ်းမႃးၼႆ့ဢိတ်းၼိူင်ႈ?

 တၢမ်တူဝ်ႁဝ်းၵေႃႈ ပေႃးသူင်ၸႂ်ၾၢႆႇပၢႆးမွၼ်းၽဵင်းၵႂၢမ်းယူႇယဝ့်၊ လုၵ်ႈႁဝ်းၵေႃႈ ၶႂ်ႈႁႂ်ႈသူင်ၸႂ်မိူၼ်ၼင်ႇႁဝ်း။ ႁဝ်းၵေႃႈ ႁႂ်ႈၵူဝ်ႇဢွင်ႇမိၼ်းသဵင်ႇ ၵေႃ့တွၺ်ႇတိင်ႇ တီႈ Top Studio ထွမ်ႇတူၺ်းသေ၊ မၼ်းဝႃႈ သဵင်ဢွၼ်ႇမၼ်း ၶႅမ့်ယူႇလူး  ႁဝ်းလႆႈၸႂ်ဢိူဝ်ႈၼႆၵေႃႈ လုၵ်ႈႁဝ်းၵေႃႈ မီးႁႅင်းၸႂ်မႃးသေ ၸင်ႇပဵၼ်ဢတ်းၸွမ်းႁဝ်းမႃးဢိူဝ်ႈ။

ၶႆႊၼေ လွင်ႈလႆႈၵိုတ်းလိုဝ်ႈၵႂႃႇၸူဝ်ႊၵႅပ့်ၼၼ့် ဢိတ်းၼိူင်ႈ?

 ဝၢႆးသေတႄႇၼႃႈႁိူၼ်းယဝ့်ၵေႃႈ ဢမ်ႇပဵၼ်ႁွင့်ၵႂၢမ်းယဝ့်။ လႆႈၽၢတ်ႇလွင်ႈပၢႆးမွၼ်းၽဵင်းၵႂၢမ်းၵႂႃႇ မွၵ်ႈ 6 ပီႊသေ ထိုင် 1996 မႃး ပီႈၼၢင်းၼုမ်ႇၸၢမ်ၶၢဝ် ၶိုၼ်းၶပ်းၶိုင်ပၼ် ၶႅပ်းၵႂၢမ်း “ၶူဝ်လႆလႄႈၽၢၼ်ၸႂ်ၵေႃ့မွင်း” ဢၼ် ၸၢႆးမၢဝ်းၶမ်း(ႁွမ်သၢမ်ၶၢဝ်း) တႅမ်ႈၼၼ့်သေ ၸင်ႇလႆႈဝၢၵ်ႈၶဝ်ႈပၢႆးမွၼ်းမႃးၶိုၼ်းဢိူဝ်ႈ။ ၽွင်းၼၼ့် လုၵ်ႈၸၢႆးႁဝ်း တိုၵ့်လႆႈ 3 ၶူပ်ႇၵွၺ်းလႄႈ ပေႃးႁဝ်းႁွင့်ၵႂၢမ်းၼိူဝ်ၶဵင်ႇ မၼ်းသမ့်ႁွင့်ၵႂၢမ်းတႂ်ႈၶဵင်ႇ၊ ဢမ်ႇႁၼ်မႄႈလႄႈ ႁွင့်ႁႆႈၼၼ့်ၼႃႇ။

ၶႅပ်းၵႂၢမ်းမၢႆတွင်းႁႃႈသိပ်းပီႊၼၼ့် လႆႈလၢႆးတၢင်းဝူၼ့်(Idea) မၼ်း မႃးၸိူင့်ႁိုဝ်?

 ပီႈၼၢင်းၼုမ်ႇၸၢမ်ၶၢဝ်ဝႃႈ လိုၼ်း၊ သူႁွင့်ၵႂၢမ်းထႅင်ႈၶႅပ်းၼိူင်ႈႁေလႄႈ၊ ၵႂၢမ်းၵဝ်ႇၸိူဝ်းၼၼ့် လႆႈၸႂ်ယူႇလူး ဝႃႈၼႆသေ ႁဝ်းၶုၵ်းၸႂ်လႆႈဝႃႈ တေတဵမ် 50 ၶူပ်ႇယဝ့်လႄႈ ၸင်ႇလႆႈၸႂ်ၵၼ်သေ ႁဵတ်း“ပီႊၵွၼ်းၶမ်းလႄႈၼမ့်ၶေးမၢဝ်း”ၼႆ့သေ ၸင်ႇပဵၼ်ဢွၵ်ႇမႃးဢိူဝ်ႈ။

လႆႈယၢၼ်ၵၼ်တင်းၽဵင်းၵႂၢမ်းၵႂႃႇႁိုင်သေ မိူဝ်ႈလႆႈၶိုၼ်းမႃးဢတ်းၵႂၢမ်းထႅင်ႈၼၼ့် ၸွင်ႇမီးလွင်ႈပႅၵ်ႇပိူင်ႈႁိုဝ်?

 ပႅၵ်ႇဢိူဝ်ႈ၊ ပႅၵ်ႇဝႃႈပႅၵ်ႇယဝ့်။ မိူဝ်ႈႁဝ်းႁွင့်ၼိူဝ်ၶဵင်ႇၼၼ့် ဢမ်ႇလႆႈငိၼ်းသဵင်ႁဝ်းၶိုၼ်းလႄႈ ႁဝ်းထၢင်ႇဝႃႈမၼ်းၶႅမ့်ဝႆ့ယူႇ။ မိူဝ်ႈၵႂႃႇ ဢတ်းၼႂ်း Studio သေ ထွမ်ႇတူၺ်းၶိုၼ်း သဵင်ၸဝ်ႈၵဝ်ႇၼၼ့် မိူၼ်ၼင်ႇဢမ်ႇၸွမ်းသဵၼ်ႈတၢင်းသိုဝ်ႈ၊ ၵိူင်းၵႂႃႇၵိူင်းမႃးဝႆ့။  ႁဵတ်းၼၼ်သေ လႆႈၶိုၼ်းမႃး ၶတ်းၸႂ်သႂ်ႇႁႅင်းတီႈႁိူၼ်းသွင်သၢမ်ဝၼ်းသေ ၸင်ႇၶိုၼ်းပဵၼ်မႃးမိူၼ်ၵဝ်ႇ။ ႁႂ်ႈပေႃးၶိုတ်းဢၼ်ၵဝ်ႇတႄ့ ဢမ်ႇပဵၼ်ယဝ့် ၵွပ်ႈဝႃႈမိူဝ်ႈၼၼ့် တိုၵ့်ၼုမ်ႇတိုၵ့်ၵီႊ။ ၽွင်းမိူဝ်ႈ လႆႈၽၢတ်ႇယၢၼ်ၵၼ်တင်းပိူၼ်ႈလႄႈ မၼ်းမီးယိၼ်း (Feeling) ဝႆ့ဢိူဝ်ႈၼေႃႈ။ ပီႈၼွင့်ၽူႈထွမ်ႇငိၼ်းႁဝ်းၶဝ် ၶႅၼ်းတိူဝ်းႁူ့ဢိူဝ်ႈ။

လွင်ႈဢတ်းၵႂၢမ်းၼႆ့ မိူဝ်ႈၼၼ့်တိူဝ်းယၢပ်ႇႁႃ့၊ မိူဝ်ႈၼႆ့တိူဝ်းယၢပ်ႇ?

 တေလႆႈဝႃႈ မိူဝ်ႈၼၼ့်တိူဝ်းယၢပ်ႇဢိတ်းၼိူင်ႈ။ တေယွၼ်းၶႆႊၼေ တၢင်းငိူဝ်ႈၸဝ်ႈၵဝ်ႇဢိတ်းၼိူင်ႈ။ မိူဝ်ႈၵႂႃႇဢတ်းတီႈ “Studio ဢူးပႃ့တဵင်း” မိူဝ်ႈပီႊ 1978 ၼၼ့် ၵူၼ်းတွၺ်ႇလႄႈၵူၼ်းႁွင့် ဢတ်းႁူမ်ႈၵၼ်။ ပေႃးၽိတ်းၵေႃ့ၼိူင်ႈၵေႃႈ ၶိုၼ်းလႆႈမႄးႁွင့်မႄးတွၺ်ႇတင်းၸုမ်း။ ၵမ်းၼႆ့ ၽိူဝ်ႇထိုင်မႃး မိူဝ်ႈပီႊ 1985 ၶိုၼ်းလႆႈၵႂႃႇဢတ်း တီႈ “Studio မေႇ” ။ ၵူၼ်းတွၺ်ႇမၼ်း ႁွင့်ႁဝ်းဢဝ်ၶီးၽဵင်း(Key)မၼ်းသေ တွၺ်ႇႁွင့်ၸွမ်းၵၼ်ၵႂႃႇတင်းၸုမ်း။ ၵမ်းၼႆ့ ႁဝ်းသမ့်ႁွင့်ၽိတ်း။ ႁဝ်းၵိုတ်းပႅတ်ႈသေတႃ့ ၵူၼ်းတွၺ်ႇမၼ်းဢမ်ႇၵိုတ်း။ ၵႃႊၶဝ်ဢမ်ႇၵိုတ်း ႁဝ်းၵေႃႈ ၸႂ့်ႁႂ်ႈၶဝ်ၵိုတ်းတိၵ်းတိၵ်း။ ၶဝ်ၸင်ႇၵိုတ်းသေ ဝႃႈႁင်းႁဝ်း “ပေႃးပီႈၼၢင်းႁဝ်းၽိတ်းၵေႃႈ ၵိုတ်းႁၢင်းပီႈၼၢင်းၵေႃႈ လႆႈယူႇလူး၊ ၵမ်းမႃး ၸင်ႇၵွၺ်ႈႁွင့်ၶိုၼ်းၵေႃႈလႆႈယူႇ” ၼႆ။ ၵမ်းၼၼ့် ပေႃးဝႃႈၶဝ် ဢဝ်ၶီးၽဵင်း(Key) မၼ်းယဝ့်ၵေႃႈ ၶဝ်ဢမ်ႇပၼ်ႁွင့်ၸွမ်းယဝ့်၊ ၶဝ်တွၺ်ႇႁၢင်းၶဝ်ၵွၺ်း။ 

ယၢမ်းၼႆ့ လုၵ်ႈဢွၼ်ႇတႆးႁဝ်း သူင်ထွမ်ႇၽဵင်းၵႂၢမ်းပိူၼ်ႈၼႃႇ၊ ၸွင်ႇၵႂၢမ်းတႆးႁဝ်း ၸၢင်ႊတေႁၢႆၵႂႃႇယူႇႁိုဝ်?

 တၢင်းႁၼ်ထိုင်ႁဝ်းတႄ့ ၽဵင်းၵႂၢမ်းတႆးႁဝ်းၼႆ့ တိုၼ်းဢမ်ႇႁၢႆလၢႆႊလႆႈ။ လႆႈၸႂ်ၽဵင်းၵႂၢမ်းပိူၼ်ႈ လႆႈၸႂ်လမ်ႇ(Tune)ပိူၼ်ႈၼႆၵေႃႈ ၶိုၼ်းဢဝ်ၶေႃႈၵႂၢမ်းတႆးႁဝ်းသႂ်ႇသေ ႁွင့်မႃးၵေႃႈမီးတင်းၼမ်။ လုၵ်ႈယိင်းႁဝ်းၵေႃႈ ပဵၼ်မေႃသွၼ်တီႈႁူင်းႁဵၼ်းၶႄႇလႄႈ ႁဝ်းယင်းဝႃႈမၼ်းယူႇ၊ ၽဵင်းၵႂၢမ်းၶႄႇၸိူဝ်းဢၼ်လႆႈၸႂ်ၼၼ့် ဢူမ်သူပ်း ႁႂ်ႈမၼ်းလႆႈလမ်ႇ(Tune)မၼ်းလီလီ၊ မႄႈတေဢဝ်ၶေႃႈတႆး သႂ်ႇပၼ်သေ ႁႂ်ႈပေႃးပဵၼ်ၵႂၢမ်းတႆးမႃး ယင်းဢၢင်ႈဢၢၼ်းဝႆ့ၼင်ႇၼႆၵွၼ်ႇ။

တၢမ်တူဝ် ၸွင်ႇယၢမ်ႈတႅမ်ႈၽဵင်းၵႂၢမ်းမႃး?

 ၽဵင်းၵႂၢမ်း “ဢမ်ႇလိုမ်း” ၼၼ့် ပဵၼ်တၢမ်တူဝ်ၵေႃ့တႅမ်ႈယဝ့်။ လမ်ႇ(Tune) တႄ့ ပဵၼ်ၽဵင်းၶႄႇဢိူဝ်ႈ။

ႁၼ်ထိုင်ၼိူဝ် ၽူႈႁွင့်ၵႂၢမ်းႁုၼ်ႈမႂ်ႇၶဝ်ၸိူင့်ႁိုဝ်?

 လုၵ်ႈဢွၼ်ႇယိင်းၸၢႆးတႆးႁဝ်း ဢၼ်ႁွင့်ၵႂၢမ်းတႆးႁဝ်းမႃးၸိူဝ်းၼႆ့ လႆႈဝႃႈ ၶိုတ်းၵၢပ်ႈၶိုတ်းပၢၼ် ၶိုၼ်ႈယႂ်ႇမႂ်ႇသုင်မႃးတေ့ယဝ့်။ တိုၵ့်ၶတ်းၸႂ်ယူႇၵေႃႈ မီးတင်းၼမ်။ ၽူႈပွင်ၵၢၼ်ႁဝ်းၶဝ် တင်းၸိူဝ်းၵေႃႈ လူဝ်ႇၸုင်ၸၼ် ႁႂ်ႈၶဝ်ၶိုၼ်ႈသင့်ၶိုၼ်ႈသုင်။ 

ၶၢဝ်းပီႊမႂ်ႇတႆးၼႆ ယၢမ်ႈၵႂႃႇႁွင့်ၵႂၢမ်းတီႈလႂ်?

 ႁွင့်တီႈ ဢိူင်ႇမူႇၸေႊႁဝ်းတႃႇသေႇၵွၺ်း။ မီးမိူဝ်ႈ ပီႊ ႒႑႐႖ ၼီႈ ၼႆ့ၵွၺ်း ထၢၼ်ၽွင်းလူင်ၾၢႆႇၾႆးၾႃ့ၸိုင်ႈတႆး ၸၢႆးထုၼ်းယိၼ်ႇ ႁွင့်မႃး ႁႂ်ႈၵႂႃႇမူၼ်ႊၸႂ်ပၼ် တီႈဝဵင်းတူၼ်ႈတီးဢိတ်းၼိူင်ႈၼႆလႄႈ လႆႈၵႂႃႇႁွင့်ပၼ်ဢိူဝ်ႈ။

ၶႂ်ႈသင်ႇထိုင် ပီႈၼွင့်ၽူႈသူင်ထွမ်ႇၽဵင်းၵႂၢမ်းႁဝ်းၶဝ် မီးၸိူင့်ႁိုဝ်?

 ၽူႈသူင်ထွမ်ႇၽဵင်းၵႂၢမ်းႁဝ်းၶဝ် မီးၸႂ်မီးၶေႃးသေ ထွမ်ႇၽဵင်းၵႂၢမ်းၶႃႈႁဝ်း ၼၢင်းသႅင်လိုၼ်းၶမ်းၼႆ့ လႆႈထႅင်ႈႁႅင်းၸႂ်ၶႃႈႁဝ်းၵေႃႈ ပဵၼ်ဢၼ်ၸူမ်းသိူဝ်းတေ့တေ့။ ပႅင်ႈၼင်ႇၵၢင်ၸႂ်ၶႃႈႁဝ်းၶတ်းၸႂ်ၼႆ့ၵေႃႈ ပုၼ်ႈတႃႇပီႈၼွင့် ၽူႈထွမ်ႇငိၼ်းၽဵင်းၵႂၢမ်းတႆးႁဝ်းၶဝ် တင်းသဵင်ႈၶႃႈဢေႃႈ။ ၵမ်းလိုၼ်း တႆးၵူႊၵေႃ့၊ တႆးၵူႊတီႈ၊ တႆးတင်းသဵင်ႈ ႁႂ်ႈယူႇလီၵိၼ်ဝၢၼ် ၵတ်းယဵၼ်သိူဝ်းသႃႇ၊ ယိူင်းဢၢၼ်းႁႂ်ႈလႆႈၸဵဝ်း တဵမ်ထူၼ်ႈသေၵမ်းၶႃႈ။

(တွင်ႈထၢမ် - ၸႂ်ႁိၼ်လဵၵ်း)